Qazir óńirde 4 jáne odan da kóp balany tárbıelep otyrǵan 3839 otbasy bolsa, turǵyn úı kezeginde turǵan 691 kóp balaly otbasynyń jaǵdaıy turaqty nazarda. Jalpy, óńirdiń jumyspen qamtý jáne áleýmettik baǵdarlamalardy úılestirý basqarmasynyń málimetinshe, bıyl oblystaǵy kóp balaly jáne az qamtylǵan otbasylardy áleýmettik qoldaýǵa 3 mlrd teńge qarastyryldy.
Sáýir aıynan bastap az qamtylǵan otbasylardaǵy ár balaǵa beriletin aılyq tólemaqy 20789 teńgege jetip, ataýly áleýmettik kómekti esepteýdiń jańa tetigi engizilgeni belgili. О́ńirdegi az qamtylǵan 1251 otbasy jalpy somasy 100 mıllıon teńge bolatyn qarjylaı qoldaýǵa ıe boldy.
– Aqsý qalasy men Aqsý aýyldyq aýmaǵyna qarasty aýyldarda turatyn kóp balaly otbasylarmen kúndelikti jumys isteýdemiz. Qala men aýyldyq aýmaqta kóp balaly 380 otbasy turatyn bolsa, olardyń 108-i turǵyn úı kezegine jazylǵan. Sonymen birge 37 jaǵdaıy tómen otbasyn jeke baqylaýǵa aldyq. Kóp balaly analarmen kezdesip, olardy jeke qabyldaý barysynda barlyǵynyń qandaı muqtajdyqtary baryn, máselelerin anyqtadyq, – deıdi qala basshysy Balǵabaı Ybyraev.
Al Jolqudyq aýylynda turatyn Qýandyq Másimbek pen Nurbaqyt Nııazdyń otbasyna, kóp balaly ana Almagúl Ordabaevaǵa qaladaǵy «Eýroazıattyq energetıkalyq korporasııasy» AQ vıse-prezıdenti Tatıana Nosacheva arnaıy baryp, otbasyn turaqty qamqorlyqqa alyp, korporasııa atynan 120 myń teńgeniń eki torpaǵy, azyq-túlik toly paketter, táttiler, balalarǵa arnalǵan kıim-keshek tabystady. Korporasııanyń óndiristik ujymy buǵan deıin de Bereke, M.Omarov atyndaǵy aýyldarda turatyn kóp balaly otbasylarǵa kómek kórsetken.
