Jalpy, elimizdiń Ortalyq saılaý komıssııasynyń atqaratyn qyzmeti ushan-teńiz. Ony osy 2019 jylǵy 9 maýsymǵa taǵaıyndalǵan Qazaqstan Respýblıkasy Prezıdentiniń kezekten tys saılaýyn uıymdastyrý sharalarynan anyq baıqaımyz. Ol elimizdiń barlyq aýmaǵynda saılaýdy uıymdastyrý jáne ótkizý máseleleri boıynsha sheshimder, sondaı-aq ózge de quqyqtyq aktiler qabyldaıdy. Bul maqsatta Prezıdenttikke kandıdattardy tirkeý barysynda birqatar jaýapty jumystar da atqaryldy. Sonyń arqasynda Konstıtýsııamyzǵa saı erikti saılaýǵa qol jetip otyr. О́ıtkeni bul básekeli, merzimdi jáne ókildik saılaý, onyń prosesinde keń erkindikke ıe azamattar bılik qurylymdaryna ózderiniń ókilderin balama negizde saılaıdy. Básekeli saılaý oǵan túrli partııalardyń jáne kandıdattardyń qatysýyna kepildik beredi. Olardyń barlyǵy sóz, jınalys, qozǵalys bostandyǵyn, olardyń saıası kózqarastarynyń estilýi úshin jáne olar saılaýshylarǵa balama kandıdattardy usyna alýy úshin qajettiniń barlyǵyn paıdalana alady. Qazaqstan Respýblıkasynyń zańnamasy saılaýdyń merzimdiligin, bılik organdarynda eldiń ártúrli áleýmettik toptarynyń ókildigin qamtamasyz etedi.
Búginde prezıdenttikke kandıdattar úshin saılaý aldyndaǵy úgit sharalary bastalyp ketti. Bul máselede de Ortalyq saılaý komıssııasy únemi zańdylyqty basshylyqqa alý qajettigin, neni bilip, neni isteý qajettigin eske salyp otyrady. Bul oraıda Ortsaılaýkom saılaý aldyndaǵy úgit máseleleri «Qazaqstan Respýblıkasyndaǵy saılaý týraly» 1995 jylǵy 28 qyrkúıektegi №2464 Konstıtýsııalyq zańmen, sondaı-aq Ortalyq saılaý komıssııasynyń 2007 jylǵy 25 maýsymdaǵy №90/178 qaýlysymen bekitilgen Qazaqstan Respýblıkasy Prezıdentiniń, Parlament, máslıhattar depýtattarynyń, sondaı-aq ózge de jergilikti ózin ózi basqarý organdary músheleriniń saılaýy kezinde buqaralyq aqparat quraldary arqyly saılaý aldyndaǵy úgitti júzege asyrýdyń jáne ony aqparattyq qamtamasyz etýdiń qaǵıdalarymen retteletindigin qaperge salady.
Atalǵan qaǵıdalardyń 4-taraýynyń 18-tarmaǵynda kózdelgendeı, prezıdenttikke kandıdattardyń sóz sóıleýi úshin efır ýaqyty men baspasóz betinen oryn berý kestesin buqaralyq aqparat quralynyń tehnıkalyq múmkindikterin eskere otyryp, buqaralyq aqparat quralynyń redaksııasy ázirleıdi. Osy kestege kandıdattardyń nemese saıası partııalardyń jarnama jáne úgit materıaldaryn jarııalaýy da engiziledi. Kandıdattardyń nemese saıası partııalardyń úgit materıaldaryn jaryqqa shyǵarýdyń (efırge shyǵarýdyń) kúni men ýaqyty kórsetilgen kesteniń kóshirmesi Ortalyq nemese tıisti aýmaqtyq saılaý komıssııasyna, kestege saı bir táýlik ishinde usynylýy tıis ózgeristerdiń engizilýin qospaǵanda, úsh táýlik ishinde jiberiledi. Osyǵan baılanysty Ortalyq saılaý komıssııasy kestelerdiń kóshirmelerin usyný merzimderin saqtaý qajettigin eske salady.
Al mundaı jaılardan zańdy túrde jetkilikti habardar bolyp otyrý úshin OSK oqytý is-sharalaryn da ótkizedi. Máselen, 2019 jylǵy 13 mamyrda Qazaqstan Respýblıkasy Ortalyq saılaý komıssııasynyń hatshysy S.Mustafına respýblıkalyq qoǵamdyq birlestikterdiń ókilderi úshin oqytý is-sharasyn júzege asyrdy. Oqytý taqyryby Qazaqstan Respýblıkasy Prezıdenti saılaý naýqanyn qarjylandyrý, sondaı-aq saılaý komıssııalarynyń respýblıkalyq qoǵamdyq birlestiktermen ózara is-qımyly máseleleri boldy. Semınar-keńestiń jumysyna Qazaqstan Prezıdenttigine óz kandıdattaryn usynǵan respýblıkalyq qoǵamdyq birlestikter men saıası partııalar: Qazaqstannyń «Aq jol» demokratııalyq partııasy» QB, «QR Kásipodaqtar federasııasy» RQB, «Aýyl» halyqtyq-demokratııalyq patrıottyq partııasy» QB, «Uly dala qyrandary» RQB, «Ult taǵdyry» ulttyq-patrıottyq birlesken qozǵalysy» RQB, «Qazaqstan Kommýnıstik halyq partııasy» QB, sondaı-aq tirkelgen kandıdattardyń senim bildirilgen adamdary, sondaı-aq olardyń shtabtarynyń ókilderi qatysty.
Munda basty nazar Qazaqstan Prezıdenttigine kandıdattardyń shyǵystaryna bólingen respýblıkalyq bıýdjettiń qarajatyn jumsaýǵa (7 331 200 tg), sondaı-aq kandıdattardyń saılaý qorlaryn qalyptastyrýǵa jáne osy qorlardyń qarajatyn «Qazaqstan Respýblıkasyndaǵy saılaý týraly» Konstıtýsııalyq zań men Ortalyq saılaý komıssııasynyń qaýlysymen belgilengen normalarǵa saı jumsaý máselelerine aýdaryldy.
