Jaqynda «Beıbitshilik álemi» shyǵarmashylyq birlestiginiń uıymdastyrýymen «Qazaqstan – kúlli túrki halyqtarynyń qasıetti «Qara shańyraǵy» atty halyqaralyq ǵylymı jobalar baıqaýy ótken bolatyn. Osy baıqaýda kishkentaı Ranona «Jetisýdyń baǵa jetpes baly» jobasyn tanystyrdy. Ol sabaqtan tys ýaqytta ara balynyń shyǵý tarıhyn, quramyn, qoldanylýyn, paıdaly qasıetteri men Jetisý óńirindegi bal arasynyń túrlerin zertteýmen aınalysady eken.
- Jylda biz anam ekeýmiz aýylǵa ara balyn alýǵa baramyz. Meni ara balynyń qansha túri bar ekeni, aralardyń baldy qalaı jınaıtyny qyzyqtyrdy. Ásirese, Jetisý jerinde ósetin bal arasynan jınalatyn baldyń quramy jaıynda izdengim keldi. Osy oıymdy anama aıtyp em, ol meni bal arasyn ósiretin sharýashylyqtarǵa ertip baryp, omartashylarmen tanystyrdy. Olar bal jınaýdyń qyr-syryn úıretip, baldyń túrlerin tanýǵa kómektesti, - deıdi Ranona.
Jas aratanýshy Alakól aýdanyndaǵy «Lepsi ónimderi» bal zaýytyndaǵy jumysty kózimen kórgen. Sondaı-aq, baldyń densaýlyqqa paıdasy dárigerlerdiń keńesin surap, baldyń paıdaly jáne zııandy qasıetterin medısına turǵysynan qalaı qoldaný kerektigi týraly da maǵlumat jınapty.
Jalpy, Ranonanyń ǵylymı jumysynda Jetisý óńirinde jınalatyn baldyń úsh túri jaıynda qyzyqty derekter bar. Jas ǵalym jerlesteri ósirgen bal arasynyń kúnbaǵys, qaraqumyq, shyrynnan bal jınaıtynyn nanymdy dáıektermen dáleldepti. Qazylar alqasynan joǵary baǵa alǵan Ranonanyń zertteý jumysy «Qazaqstan – kúlli túrki halyqtarynyń qasıetti «Qara shańyraǵy» atty eń úzdik ǵylymı jobalar kitabyna engiziledi.
Almaty oblysy
