Dóńgelek ústel formatynda ótken kezdesý barysynda álemdik ekonomıkadaǵy, saýdadaǵy jáne saıasattaǵy jahandyq úrdister talqylandy. Baıandamalarda Qazaqstan men Ortalyq Azııany damytýdyń perspektıvalaryna jáne «Bir beldeý, bir jol» bastamasyn júzege asyrýǵa erekshe kóńil bólindi.
AQSh-tyń Federaldy rezervi tóraǵasynyń burynǵy orynbasary, Izraıl Ortalyq bankiniń eks-basshysy Stenlı Fısher álemdik ekonomıkadaǵy ahýalǵa óz pikirin bildirdi. Ol qazirgi jaǵdaıda turaqty ekonomıkalyq ósimdi qamtamasyz ete alatyn monetarlyq saıasattyń negizgi faktorlaryna egjeı-tegjeıli toqtaldy. Sarapshy kez kelgen baǵytta tabysqa qol jetkizý úshin bilimniń mańyzdy ról atqaratynyn aıtty.
Oksford ýnıversıtetiniń professory Pıter Frankopan Ortalyq Azııadaǵy jáne Eýrazııalyq keńistiktegi ıntegrasııalyq úderisterge, sondaı-aq, «Bir beldeý, bir jol» jobasyn júzege asyrý jónindegi Qytaı bastamasyna qatysty óz pikirin aıtty.
Kolýmbııanyń burynǵy prezıdenti, álemdik Nobel syılyǵynyń laýreaty Hýan Manýel Santos Kalderon barlyq shıelenisti jaǵdaılarda beıbit dıalogtyń mańyzdy ekenin atap ótip, Venesýeladaǵy qazirgi saıası turaqsyzdyqtyń Latyn Amerıkasy elderiniń jáne jalpy álem ekonomıkasy úshin qaýip tóndiretinin aıtty.
Pikirtalasqa Básekege qabilettilik ortalyǵy IMD dırektory Artýro Brıs, Beıjiń ýnıversıteti, Jańa qurylymdyq ekonomıka ınstıtýtynyń dekany Djastın Ifý Lın, The Other Canon Foundation saraptamalyq ortalyǵynyń negizin qalaýshy Erık Raınert, «Nokia Corporation» kompanııasy dırektorlar keńesiniń tóraǵasy Rısto Sıılasmaa, The Boston Consulting Group tóraǵasy Hans-Pol Bıýrkner qatysty.
Qazaqstan Prezıdenti Qasym-Jomart Toqaev Elbasy Nursultan Nazarbaevtyń basshylyǵymen Qazaqstan keıingi jyldary belgili bir deńgeıde damyǵanyn jáne elimizdiń óz qarqynyn odan ári ilgerilete beretinin atap ótti.
– Qazaqstan bıik maqsattary men strategııalyq josparlary bar jahandyq trendter aıqyndalatyn jańa dáýirge qadam basty. Olardyń tabysty júzege asyrylýy elimizdiń damýyna mańyzdy úles qosýy tıis. Biz búginde barlyq kórshilerimizben, strategııalyq áriptesterimizben yntymaqtastyq ornatýǵa ashyqpyz. Qazaqstan aldaǵy ýaqytta da óziniń damý josparyn júzege asyrý úshin úzdik halyqaralyq tájirıbelerdi eskeretin bolady. Biz úshin halyqtyń ál-aýqatyn arttyrý, bilim jáne densaýlyq salalaryn damytý basym baǵyt sanalady, – dedi Memleket basshysy.
Kezdesý sońynda Qasym-Jomart Toqaev dóńgelek ústel jumysyna qatysqandarǵa mazmundy dıalogy jáne qundy keńesteri úshin rızashylyǵyn bildirdi.
