Memleket basshysy Azııa jáne Tynyq muhıtyna arnalǵan ekonomıkalyq jáne áleýmettik komıssııanyń Atqarýshy hatshysy Armıda Alısdjabana bastaǵan BUU delegasııasymen kezdesti.
– Sizdermen Nur-Sultan qalasynda kezdeskenime qýanyshtymyn. Sizderdiń BUU atynan kelip, Astana ekonomıkalyq forýmyna qatysqandaryńyz jıynnyń tabysty ótýine septigin tıgizedi. Uıymyńyzdyń negizgi maqsat, mindetterin jaqsy bilemin. Men Qazaqstan Respýblıkasynyń Syrtqy ister mınıstri qyzmetinde bolǵan kezimde birneshe jıynyna qatysqan bolatynmyn. Qazaqstan Uıymmen ashyq jan-jaqty is-qımylǵa daıyn, kez kelgen sharasyna qatysýǵa ázir, – dedi Qasym-Jomart Toqaev.
Armıda Alısdjabana Qazaqstan Prezıdentine Astana ekonomıkalyq forýmyna shaqyrǵany úshin BUU delegasııasynyń atynan alǵys bildirip, Qazaqstannyń bastamalaryna qoldaý bildiretinin jetkizdi.
Kezdesýge BUU Bas hatshysynyń kómekshisi, Eýropa jáne TMD elderi boıynsha BUU damý baǵdarlamasynyń aımaqtyq bıýro dırektory M.Egger, «BUU – áıelder» uıymy atqarýshy hatshysynyń orynbasary O.Regner, BUU-nyń Qazaqstan Respýblıkasyndaǵy turaqty úılestirýshisi N.Shımomýra, Azııa jáne Tynyq muhıtyna arnalǵan ekonomıkalyq jáne áleýmettik komıssııanyń Soltústik jáne Ortalyq Azııa elderi boıynsha sýbaımaqtyq ofıs basshysynyń mindetin atqarýshy Nıkolaı Pomoshnıkov qatysty.
