Senat depýtaty Dınar Nóketaeva Túrkııa Uly Ulttyq Jınalysy uıymdastyrǵan TÚRKPA-nyń Áleýmettik, mádenı jáne gýmanıtarlyq máseleler jónindegi komıssııanyń jetinshi otyrysyna qatysty.
Otyrystyń kún tártibiniń negizgi tarmaǵy «BUU-nyń genderlik máseleler jónindegi ornyqty damý maqsattary. TúrkPA-ǵa múshe elderdegi qazirgi otbasylyq qundylyqtardyń mádenı uqsastyǵy (zańnama bolashaǵy)» taqyrybyna arnaldy.
Sharaǵa qatysqan parlamentshiler BUU-nyń genderlik máseleler jónindegi ornyqty damý maqsattary turǵysynda túrkitildes elderdegi otbasylyq qundylyqtar men mádenı biregeılik máselelerin, sondaı-aq osy saladaǵy ulttyq saıasat týraly jan-jaqty talqylady, ulttyq zańnamalardyń keleshegi men osy saladaǵy ulttyq jáne kópjaqty zańnamany úılestirý jóninde birqatar usynystardy ortaǵa saldy.
Qazaqstan tarapynan Parlament Senatynyń depýtaty Dınar Nóketaeva men Májilis depýtaty Janat Omarbekova sóz sóıledi.
D. Nóketaeva Qazaqstannyń genderlik, demografııalyq jáne otbasylyq saıasatynyń negizgi erejelerin túsindirdi. Senator Qazaqstan genderlik teńdikke qatysty barlyq halyqaralyq konvensııalardy ratıfıkasııalaǵanyn, TúrkPA-ǵa múshe elderde mádenı otbasylyq qundylyqtardy jańǵyrtýdyń mańyzdylyǵyn atap ótti, elimizdegi otbasy ınstıtýtyn nyǵaıtý jóninde júrgizilip jatqan reformalar týraly áńgimeledi.
J.Omarbekova bilim berýdi damytýǵa jáne aýyldyq aýmaqtardaǵy múmkindikterdi keńeıtýge, ajyrasýdyń dabyldy derekterine nazar aýdara kelip, bizdiń elimizde osy máseleler boıynsha ulttyq jobalar ázirlenip jatqanyn atap ótti.
