«Sizdi PASD komıssııasynyń múshesi etip taǵaıyndaǵanyma qýanyshtymyn. Sizge áriptestigińiz úshin alǵys aıta otyryp, jaqyn arada kezdesetinimizge senimdimin» delingen hatta.
Atalǵan komıssııa buǵan deıin halyqaralyq qatynastar jónindegi Komıssııa dep atalatyn. PASD negizgi mindetteri qataryna HOK sessııalaryn ótkizý, uıymnyń atqarýshy komıteti men HOK prezıdentine álemdegi Sport pen Olımpızm rólin damytý strategııalaryn túsindirý, Olımpıadalyq qozǵalysty damytý, BUU jáne Olımpıadalyq oıyndardan bólek ózge de uıymdarmen baılanys ornatý jóninde keńes berý jatady.
Aıta ketý kerek, Qazaqstan UOK prezıdenti alǵash ret 2017 jyldyń sáýir aıynda atalǵan Komıssııa qataryna engen. 2018 jyldyń tamyzynda HOK basshysy PASD quramyn qaıta qarap, T. Qulybaevty qaıtadan taǵaıyndady. 2019 jyly álemdegi genderlik jáne qurlyqtyq teńdikti saqtaý maqsatynda Tomas Bah jetekshi mamandarmen birge komıssııa quramyn qaıta qarady. Búginde PASD quramynda 10 áıel adam jáne 18 er adam bar.
Komıssııa quramyna HOK Atqarýshy komıtetiniń músheleri, UOK basshylary, halyqaralyq federasııalar men sporttyq uıym jetekshileri kiredi. Atap aıtar bolsaq, Halyqaralyq jeńil atletıkalyq federasııalar Qaýymdastyǵynyń IAAF basshysy Sebastıan Koe men Halyqaralyq trıatlon federasııasynyń ITU prezıdenti Marısol Kasado jáne taǵy basqa da tanymal sport tulǵalary. Komıssııaǵa HOK múshesi ári Amerıkaaralyq damý bankiniń basshysy, Búkilálemdik ekonomıkalyq forým Qory basqarmasynyń múshesi, kolýmbııalyq Moreno Lýıs Alberto jetekshilik etedi.
Qazaqstan UOK basshysy 24 mamyr kúni Lozannada (Shveısarııa) ótetin Ulttyq Olımpıadalyq komıtetter Qaýymdastyǵy (UOKQ) atqarýshy komıtetiniń 78-shi otyrysyna qatysady dep josparlanýda.
Eske sala keteıik, byltyr jyl sońynda ótken UOKQ Bas Assambleıasynyń otyrysynda T. Qulybaevty 2022 jylǵa deıingi UOKQ Atqarýshy komıtetiniń múshesi etip taǵaıyndaǵan bolatyn. Úmitkerler álemdegi barlyq 206 UOK arasynan qarastyryldy. Atqarýshy komıtet quramyna qurlyqtyq qaýymdastyqtar usynǵan 24 mańyzdy sporttyq fýnksıoner engen bolatyn. Sondaı-aq, Tımýr Qulybaev Azııa Olımpıadalyq Keńesiniń vıse-prezıdenti. Ol osy qyzmetine bıylǵy mamyrda qaıta taǵaıyndaldy.
