Qasıetti Ramazan aıynda Ulan aýdanynyń Bozanbaı aýylynda turatyn 9 balaly ana Alma Beketaeva qýanyshqa bólendi. Qanshama jyl jaldamaly 2 bólmeli páterdi panalap kelgen kóp balaly otbasyǵa páter kiltin aýdan ákimi Nurymbet Saqtaǵanov tabys etti. Aıta keteıik, bul baspana aýdanda uıymdastyrylǵan «Aıaýly analarǵa qurmet pen qamqor» qaıyrymdylyq keshinen jınalǵan qarajatqa alynǵan eken.
N.Saqtaǵanovtyń aıtýynsha, Ulan aýdanynda 950 kóp balaly otbasy bar bolsa, onyń 459-y Altyn alqa, Kúmis alqa ıegerleri, 491-i 4 jáne odan da kóp kámelettik jasqa tolmaǵan balalary bar shańyraqtar. Osy 491-diń 136-y turmys deńgeıi tómen otbasylar eken. «Olardyń barlyǵyna ataýly áleýmettik kómek taǵaıyndalǵan. Onyń ishinde 120 otbasynyń jeke baspanalary joq. Olar jaldamaly úıde turyp jatyr. Oblys ákimi Danıal Ahmetov kóp balaly otbasylardyń búldirshinderi balabaqshaǵa tegin barýy qajettigin tapsyrǵan bolatyn. Bizdiń aýdanda mundaı sanattaǵy 133 bala bar. Mektep jasyndaǵy 822 oqýshy ystyq tamaqpen qamtylǵan, mektep formasy olarǵa tegin beriledi», - deıdi aýdan ákimi.
9 balaly ana Alma Beketaeva óz kezeginde «óz úıi – óleń tósegine» qol jetkizgen Atymtaı jomart azamattarǵa alǵysyn jetkizdi. «Bizge úlken úı satyp ápergen jandarǵa alǵysym sheksiz. О́zim sııaqty kóp balaly analardyń barlyǵyna osyndaı qýanysh tileımin. Oraza aıynda jasaǵan jaqsylyqtary saýapty bolsyn», - deıdi qýanyshqa kenelgen kóp balaly ana.
Shyǵys Qazaqstan oblysy,
Ulan aýdany
