Alqaly jıynǵa Túrkııanyń Qazaqstan Respýblıkasyndaǵy Tótenshe jáne ókiletti elshisi Nevzat Ýıanyk, Ázerbaıjan Respýblıkasynyń Tótenshe jáne ókiletti elshisi Rashad Mammadov, qoǵam qaıratkerleri, túrki áleminiń syıly aqsaqaldary Myrzataı Joldasbekov, Ádil Ahmetov, Parlament Májilisiniń depýtaty Nurlan Dýlatbekov, kórnekti qoǵam qaıratkerleri, belgili ǵalymdar, túrkologtar jáne etnomádenı ortalyqtardyń jetekshileri qatysty.
Jıynda sóz alǵan Halyqaralyq Túrki akademııasynyń prezıdenti Darhan Qydyráli túrik halqyn aıtýyly merekemen quttyqtaı otyra, bıylǵy jyldyń «Atatúrk jáne ult-azattyq kúres» jyly dep jarııalanǵanyn, soǵan baılanysty birqatar shara ótkizilip jatqanyn aıtyp ótti. «Atatúrk – tek túrik elininiń emes túgel túrki halqynyń syıly perzenti. О́ziniń ult-azattyq qozǵalysymen kúlli túrki álemine serpilis alyp keldi», dedi Darhan Qydyráli.
Túrkııa Respýblıkasynyń Qazaqstandaǵy Tótenshe jáne ókiletti elshisi Nevzat Ýıanyk jıyn uıymdastyrýshylaryna alǵysyn bildirip, «1919 jyly 19 mamyrda Samsýn qalasynda bastalǵan ult-azattyq kúresiniń Túrkııa Respýblıkasynyń memleket retinde qurylýynda mańyzy zor. Ult-azattyq kúres Otanymyzǵa basqynshylyq jasap, halqymyzǵa tutqyn shynjyryn taǵýdy kózdegenderge qarsy dańqty toıtarys boldy. Bir jaǵadan bas, bir jeńnen qol shyǵara bilgen halqymyz bir shańyraq astynda bas qosty», dedi.
Táýelsizdik alǵan jyldary Túrkııaǵa Qazaqstan delegasııasyn bastap barǵan túrki áleminiń syıly aqsaqaly Myrzataı Joldasbekov sol kezdiń estelikterimen bólise otyra, túrik halqynyń qazaqtarǵa jasaǵan jaqsylyǵy men qoldaýy týraly áńgimelep berdi.
Budan bólek Qazaqstannyń eńbek sińirgen qaıratkeri, Halyqaralyq joǵary mektep Ǵylym akademııasynyń akademıgi Ádil Ahmetov, Parlament májilisiniń depýtaty Nurlan Dýlatbekov sóz sóılep, baýyrlas memleketke óz lebizderin bildirdi.
Jıynda Túrkııa Respýblıkasynyń negizin qalaýshy Mustafa Kemal Atatúrk týraly derekti fılm kórsetilip, fotokórme uıymdastyryldy. Shara sońynda túrkologııa fakýltetiniń stýdentteri Atatúrkke arnalǵan óleńder oqydy.
