«Minsiz ushaq degen bolmaıdy. Biraq sen óz ushaǵyńdy jaqsy kórýiń kerek. Ol jansyz zat bolsa da, óz súıispenshiligimen saǵan jaýap beredi. Mashınanyń jany siri boldy. Keıde qaıta bergende – onyń bútin, aman qalǵan bir jeri joq, shurq-tesik jyrtylǵanyn kóresiń. Al biraq ushaq jumys istep turady...» deıtin batyrdyń aspanmen talasqan taǵdyrynda qanshama tylsym jatyr.
Al búgingi sýret bizdi Talǵat Bıgeldınov syndy birtýar qazaqpen qaıta qaýyshtyryp otyr.
– Bul sýretti 2000 jyldary túsirdim. Men ol kezde oblystyq «Syr boıy» gazetiniń fototilshisimin. Oblys ákimi ótkizetin jınalystardyń birinen qalmaımyn. Gazet nómirine kúndelikti sýret beremin. Oblys ákimi kezekti jıyn ótkizip jatqan bolatyn, sol arada jýrnalıster ózara sybyrlasyp jatty. Sózderinen uqqanym, birinshi qabattaǵy Kishi zalda Keńes Odaǵynyń eki márte batyry Talǵat Bıgeldınov otyr.
Munda oblys ákiminiń Parlament depýtattarymen kezdesýi júrip jatqan bolatyn. Sol jınalystan shyǵyp 5-6 jýrnalıspen birinshi qabatqa kelsek, Talǵat aǵamyz sóılep jatyr eken. Biraq batyr qatysyp jatqan jıynda adam az. Qoǵamdyq otyrys pa eken, álde DOSAAF-tyń jınalysy ma, anyǵy esimde joq. Meniń mindetim – dańqty batyrdyń ózi kelip turǵanda, kadr túsirip alyp qalý.
