DDSU málimeti boıynsha sozylmaly aýyrsyný sezimi jer betindegi eresekterdiń úshten biriniń janyna batady. Al búkil álemdegi halyqtyń 14%-y ortasha eseppen 18 saǵatqa sozylatyn bas saqınasymen aýyrady. Sondyqtan kóptegen damyǵan elder sozylmaly aýyrsynýdy óz aldyna bólek bir aýrý retinde moıyndap, qazir algologııa nemese pain management (aýyrsyný sezimin basqarý) dep atalatyn arnaıy dárigerlik mamandyq paıda boldy.
Kongreske shaqyrylǵan spıkerlerdiń biri – «Qazaq úzdiksiz medısınalyq bilim berý ýnıversıteti» AQ travmatologııa jáne ortopedııa kafedrasynyń dosenti, medısına ǵylymynyń kandıdaty, joǵary sanattaǵy travmatolog-dáriger Qaırat Orazalıev jyl saıyn ártúrli aýyrsyný túrlerimen betpe bet keletindigin aıtady. Bul aýyrsyný sezimi naýqastyń belsendiligine, ómir súrý sapasyna ǵana emes, sonymen birge, áleýmettik ómirine, otbasyndaǵy qarym-qatynasqa, aınalasyna keri áserin tıgizip jatady.
«Biz aýyrsynýdy basatyn tıimdi dárilik zattardy shyǵaratyn, jolǵa qoıylǵan óndiristiń Qazaqstanda bar ekendigin maqtan tutýymyz qajet. Farmasevtıkalyq ındýstrııa jyldam qarqynmen damyp, SANTO kompanııasy kóp satyly emdi júrgizý úshin tabletkalar, kapsýlalar, ıneksııalar, jabystyrǵyshtar túrindegi preparattardyń keń túrlerin usyna alatyndyǵyna qýanyshtymyn», – deıdi Qaırat Orazalıev myrza.
Osy tusta dárigerler naýqastardyń óz betinshe em jasaýy, dárilerdi durys qabyldamaýy jáne jaǵymsyz saldardyń týyndaýy syndy máselelerge tap bolyp otyr. Bas saqınasy týraly aıtar bolsaq, álemniń 101 elinde júrgizilgen jahandyq zertteýlerge sáıkes bas saqınasymen aýyratyndardyń 50%-ǵa jýyǵy óz betinshe em jasaıdy, taǵy 5%-y balamaly emdeý tásilderine júginedi. Sondyqtan der kezinde dıagnostıka jasaý, aýyrsynýdyń sebepterin anyqtap emdeý – nazar aýdarýǵa turatyn jáne jańa emdeý tásildemelerin qajet etetin asa ózekti másele.
«Manage Pain» («Aýyrsyný sezimin basqar!») jobasy – Aýyrsynýǵa qarsy kúres jónindegi Eýropa lıgasynyń (EULAP), Pánaralyq medısına qaýymdastyǵynyń (AMM) jáne Reseı Densaýlyq saqtaý mınıstrligi I.M.Sechenov atyndaǵy tuńǵysh Máskeý memlekettik medısınalyq ýnıversıtetiniń birlesken bilim berý jobasy. Al Qazaqstanda ótken alǵashqy kongreske SANTO kompanııasy bas demeýshilerdiń biri retinde at salysty.
Jobany Almatydaǵy kongress kezinde Pánaralyq medısına qaýymdastyǵynyń atqarýshy dırektory, professor, I.M.Sechenov atyndaǵy tuńǵysh Máskeý memlekettik medısınalyq ýnıversıtetiniń júıke aýrýlary kafedrasynyń meńgerýshisi Alekseı Danılov tanystyrdy. Sondaı-aq, travmatologııa men ortopedııadaǵy aýyrsyný sındromdaryn emdeýdiń erekshelikteri jaıly SANTO atynan shyqqan spıker, joǵary sanattaǵy travmatolog-dáriger Qaırat Orazalıev baıandama oqydy.
ALMATY
