Týǵan jerinde qaıta jerlendi
Sársenbi, 8 mamyr 2013 2:31
Byltyr Kókshetaý qalasyndaǵy tarıhı murajaıǵa Sankt-Peterbýrgten hat keldi. Onda «Front» izdestirý birlestiginiń ókili Iýrıı Gonchar 1907 jyly týǵan Vasılıı Nıkıtınniń týǵan-týystaryn taýyp berýge járdemdesý jóninde ótinish bildirgen edi. Aryqbalyq aýdany Rýhlovka aýylynan qan maıdanǵa attanǵan maıdangerden 1942 jyly habar-oshar úziledi. Endi arada 70 jyl ótken soń jerlesimizdiń súıegi – jeke múlikterimen, arnaıy medalonmen,
Sársenbi, 8 mamyr 2013 2:31
Byltyr Kókshetaý qalasyndaǵy tarıhı murajaıǵa Sankt-Peterbýrgten hat keldi. Onda «Front» izdestirý birlestiginiń ókili Iýrıı Gonchar 1907 jyly týǵan Vasılıı Nıkıtınniń týǵan-týystaryn taýyp berýge járdemdesý jóninde ótinish bildirgen edi. Aryqbalyq aýdany Rýhlovka aýylynan qan maıdanǵa attanǵan maıdangerden 1942 jyly habar-oshar úziledi. Endi arada 70 jyl ótken soń jerlesimizdiń súıegi – jeke múlikterimen, arnaıy medalonmen, áıeli Olgamen túsken sýretpen, atategi jazylǵan qujatpen qosa, Novgorod oblysynyń Starorýss aýdanynda izdestirý jumystaryn júrgizý barysynda tabylǵan.
Tarıhı murajaı qyzmetkerleri birneshe aı boıy soǵysta qaza tapqan jaýyngerdiń týǵan-týystaryn anyqtaýmen aınalysty. Soltústik Qazaqstan oblystyq qorǵanys isteri jónindegi departamentpen habarlasty. Jergilikti buqaralyq aqparat quraldary arqyly izdeý saldy. Eshbirinen nátıje bolmaı kúder úzildi-aý degen shaqta Vera Nıkıtına degen kókshetaýlyq turǵyn telefon arqyly habarlasyp, habar-osharsyz ketken marqumnyń ortanshy qyzy ekenin málimdedi. Onyń aıtýyna qaraǵanda, Vasılıı Nıkıtınniń 4 ini-qaryndasy bolǵan. Bári dúnıeden ótken. Olardan týǵan balalar da kóz jumǵan. Al nemere, jıenderi Reseıde, Germanııada turatyn kórinedi.
Týystary aqyldasa kelip, maıdangerdiń súıegin týǵan aýylyndaǵy qorymǵa qoıýdy uıǵardy. Jaqynda «Front» izdestirý birlestiginiń músheleri marqumnyń súıegi men jeke múlikterin jetkizdi. Qaıta jerleý rásimine shetelderde qonys tepken urpaqtary, jergilikti turǵyndar, ardagerler qatysty. Sóıtip, marqumnyń arýaǵy týǵan jerinde damyldady.
Jaqsylyq JÚSIPOV,
Aıyrtaý aýdandyq ishki saıasat
bóliminiń meńgerýshisi.
