Bıyl aqpan aıynda «Almatykitap baspasy» www.opiq.kz platformasynda elektrondy oqýlyqtardy engizýge baılanysty baıqaý jarııalaǵan edi. Bul baspa elektrondy oqýlyqtardy engizýdi 2018 jyly 1 qyrkúıekten bastap Qazaqstannyń 11 mektebinde qolǵa alǵan-dy. Astana qalasyndaǵy №85 mektepte ótken alǵashqy sabaqqa Elbasy qatysyp, jaqsy baǵalaǵan bolatyn.
Sonymen, búgin bul joba márege jetip, ony jyljytýǵa atsalysqan jeńimpaz muǵalimder men oqýshylardy marapattaý rásimi ótti.
О́z kezeginde elimizdiń 6 oblysyndaǵy (Nur-Sultan, Almaty qalalary men Almaty, Jambyl, Qaraǵandy, Túrkistan oblystary) 12 mektepte elektrondy oqýlyqtar synaqtan ótti. Baıqaý kezeńinde mektep basshylyǵy, ustazdar, oqýshylar men ata-analar qaýymy opiq.kz platformasyndaǵy elektrondy oqýlyqtardyń (ınformatıka, matematıka, ádebı oqý) tıimdiligin baqylap otyrdy. Pılottyq jobaǵa 3, 6 jáne 8-synyp oqýshylary qatysty.
Jalpy baıqaýǵa 350 úmitker qatysyp, nátıjesinde «Sıfrlyq tehnologııany jaqsy meńgergen Úzdik oqýshy», «Innovasııalyq oqytý ıdeıasyn qoldaýshy Úzdik mektep basshysy» atalymdary boıynsha marapattaldy.
Jeńimpazdardy saltanatty túrde marapattaý rásimine «Almatykitap baspasynyń» prezıdenti Gaýhar Saımasaeva, EDTECH.KZ halyqaralyq bilim berý ortalyǵynyń bas dırektory Ǵanı Beısembaev, IýNESKO mektepteriniń ulttyq koordınatory Leonıd Kım qatysty.
Osy arada Opiq.kz elektrondy oqýlyqtardy «Almatykitap baspasy» estonııalyq AVITA kompanııasymen birlese otyryp jasaǵanyn atap ótý kerek.
Opiq.kz platformasynda elektrondy oqýlyqtardyń negizgi mazmunyna kóptegen qosymsha materıal, ıaǵnı aýdıo, vıdeo, grafıka, slaıdtar beriledi. Bul elektrondy oqýlyqtar barlyq zamanaýı qurylǵylarǵa laıyqtalǵan (noýtbýk, kompıýter, smartfon, planshet) jáne qosymsha baǵdarlamalyq qurylǵylardy qajet etpeıdi.
Tájirıbe kórsetkendeı, elektrondy oqýlyqtar oqýshy men muǵalimge ǵana emes, ata-analar úshin de tıimdi. Bul oqýlyqtaǵy tapsyrmalardy balanyń bilim deńgeıine laıyqtap qurýǵa bolady. Ekinshi bir artyqshylyǵy, oqýshy ózine unaǵan bir taqyrypty tereń zertteýine múmkindik beredi.
Elektrondy oqýlyqtar kórkem bezendirilgen, mýltımedııalyq qosymshaǵa baı, elimizdiń memlekettik oqý standarty men pándik baǵdarlamalarǵa (bastaýysh jáne orta bilim) tolyq sáıkes keledi dep esepteıdi mamandar.
Sonymen, bas júldege Nur-Sultan qalasyndaǵy №79 mektep-lıseıiniń ustazy Aıman Ryspaeva laıyq dep tanyldy. Birinshi oryndy Almaty qalasyndaǵy №110 mektep-gımnazııasynan Gýlmera Rozıeva, ekinshi oryndy Qaraǵandy qalasyndaǵy №93 mektep-gımnazııasynan Elena Martemıanova men Taraz qalasyndaǵy «A-Status» mektebiniń muǵalimi Larısa Gıleva, úshinshi oryndy Kentaý qalasyndaǵy №14 mektep-gımnazııasynan Qamajaı Baısymaqova, Nur-Sultan qalasyndaǵy №62 mektep-lıseıinen Aıagóz Kenbeılova men Almaty qalasyndaǵy B.Momyshuly atyndaǵy №131 mektep- lıseıiniń ustazy Dınara Álıeva aldy.
