Sharaına
Beısenbi, 17 qańtar 2013 6:59
Jarylys qurbandary– 82 adam
Sırııanyń Aleppo qalasynda qosarlanǵan jarylys jasaldy. Atalǵan qaladaǵy ýnıversıtette júzege asyrylǵan taǵylyq áreketterden 80-nen astam adam kóz jumdy. 160-tan astam adam túrli dene jaraqattaryn aldy.
Beısenbi, 17 qańtar 2013 6:59
Jarylys qurbandary– 82 adam
Sırııanyń Aleppo qalasynda qosarlanǵan jarylys jasaldy. Atalǵan qaladaǵy ýnıversıtette júzege asyrylǵan taǵylyq áreketterden 80-nen astam adam kóz jumdy. 160-tan astam adam túrli dene jaraqattaryn aldy.
Shahar gýbernatory Mohamed Vahıd Akkadtyń aıtýynsha, ázirshe eshqandaı uıym jarylystarǵa jaýapkershilikterdi moıyndaryna almaǵan kórinedi. Úkimet áskerleri jarylystarǵa búlikshilerdi kináli dep tapsa, óz kezeginde búlikshiler úkimet áskerlerin aıyptap otyr. Qala basshylyǵy men memlekettik televızııa oqıǵaǵa lańkestik degen baǵa berdi. Al jarylǵan ýnıversıtet Sırııa armııasynyń baqylaýyndaǵy aýmaqta ornalasqan.
Malıdi bólshekteýge jol joq
Ulybrıtanııa Malıge taǵy bir áskerı-kólik ushaǵyn kómekke jiberý týraly sheshim qabyldady. Osy aralyqta atalǵan eldegi fransýz kontıngentiniń tankteri ıslamshylar basyp alǵan soltústik óńirlerdi qaıtarý úshin jolǵa shyqty.
Fransýzdarǵa Batys Afrıka elderi ekonomıkalyq qoǵamdastyǵyna kiretin memleketterdiń qarýly kúshteri de kómek qoldaryn sozýǵa bilek sybanyp otyr. Olar jaqyn kúnderi Malı bıligine járdemdesýge attanatyn áskerı kontıngent jasaqtamaq. Onyń quramyna 3300 soldat kiretin bolady. Al kontıngent Kot-d,Ivýar, Benın, Gana, Nıger, Senegal, Býrkına-Faso jáne Togo elderiniń áskerılerinen quralady.
Izraıldi balaǵattamaǵan jón
AQSh-tyń memlekettik departamenti Egıpet prezıdenti Muhammed Mýrsıden Izraıl men onyń azamattaryna qatysty óziniń balaǵat mazmunyndaǵy málimdemelerinen bas tartýdy talap etti. M.Mýrsı 2010 jyldyń qańtar aıynda jarııalanǵan suhbatynda Izraılge qatysty qattyraq sóılep qoıǵan bolatyn.
Memlekettik departamenttegiler M.Mýrsıdiń «qansorǵyshtar», «dońyzdar men maımyldardyń urpaqtary» degen sózderin qatty aıyptaǵan pikir tanytty. Bul jóninde vedomstvonyń resmı ókili Vıktorııa Nýland málimdedi. Onyń sózine qaraǵanda, Egıpet prezıdenti basqa dindegi adamdardyń da quqyn qurmetteıtinin dáleldeýi tıis. M.Mýrsıdiń suhbaty «Musylman baýyrlar» qozǵalysynyń kóshbasshysy bolyp turǵan kezinde jarııalanǵanyn aıta keteıik.
«Arman laınerleri» ushýy toqtatyldy
Japonııanyń All Nippon Airways jáne Japan Airlines avıakompanııalary «Arman laınerleri» atalyp ketken Boıng-787 ushaqtarynyń ushýyn toqtatýǵa sheshim qabyldanǵanyn habarlady.
Mundaı sheshim sońǵy kezderi atalǵan ushaq túrlerine qatysty qaýipti jaǵdaılardyń jıi oryn alýlaryna baılanysty qabyldanyp otyr. Endi atalǵan avıakompanııalar Boıng-787-niń ushýlaryn ózderiniń parkterindegi osy úlgidegi barlyq ushaqtardy egjeı-tegjeıli tekserýlerden ótkizgennen keıin ǵana qaıta bastamaq. Keshe Iаmagýtı qalasynan Tokıoǵa ushyp shyqqan Boıng-787 ushaǵy apatty jaǵdaıda áýejaıǵa qaıta qondyrylǵan bolatyn.
Qarý ustap úırengender qarsy
AQSh-tyń Tehas shtatynan senator Stıv Stokmen eger prezıdent Barak Obama jarlyqtarynyń kómegimen qarý-jaraqqa baqylaý ornatýdyń jańa erejelerin qalyptastyratyn bolsa, onda prezıdenttiń ımpıchmenti týraly másele kóteretinine ýáde berdi.
S.Stokmenniń sózine qaraǵanda, AQSh prezıdenti respýblıkanyń negiz qalaýshy qaǵıdattaryna uıatsyzdyqpen shabýyl jasaýdy júzege asyrýda jáne bul konstıtýsııa talaptaryna da qaıshy keledi. Sondyqtan senator Obamaǵa kúrestiń qandaı túrin paıdalanyp bolsa da qarsy shyǵatynyn málimdeýde. Al prezıdenttiń mundaı qadamǵa sońǵy kezderi elde ońdy-soldy qarý qoldaný oqıǵalary jıilep ketýine baılanysty barýǵa májbúr bolyp otyrǵany túsinikti.
Ereje buzý lımıti belgilenbek
Qyrǵyzstan astanasy – Bishkek qalasynyń basshylyǵy árbir marshrýtty taksı úshin ereje buzý lımıtin belgileý týraly sheshim qabyldady. Eger ereje buzý oqıǵalary shekteýden asyp ketse, kólik jolaýshylar tasymaldaý úshin paıdalanylmaıtyn bolady.
Bul týraly Bishkek meri Isa О́mirqulov jarııa etti. Ol sondaı-aq atalǵan bastama marshrýtty taksıler júrgizýshileri jol beretin kóptegen jol erejesin buzýlarǵa qatysty aryz-shaǵymdardan aıaq alyp júrý múmkin bolmaı qalǵandyqtan kóterilip otyrǵanyn kóldeneń tartty. Sóıtip, ár kólik úshin eń kóp degende 15-20 ereje buzý qarastyrylmaq eken.
Qysqa qaıyryp aıtqanda:
Londonnyń ortalyǵynda tikushaq qurylys kranyna soǵyldy. Krannyń jerge qulaýy saldarynan eki adam opat boldy. Oqıǵaǵa kóz baılaǵan qalyń tuman sebep bolǵan sekildi.
Úndistan áskerıleri Kashmırde 16 qańtarǵa qaraǵan túni pákstandyq áskerı qyzmetshini óltirgen. Bul jóninde Pákstan armııasynyń ókiline silteme jasaı otyryp, «Reıter» agenttigi habarlady.
Memlekettik Dýma depýtattary qoǵamdyq oryndarda temeki shegýge oraı aıyp kólemin aıqyndady. Qoǵamdyq oryndarǵa, zań boıynsha, meıramhanalar men dámhanalar, aýrýhanalar men dúkender, kólik jáne basqa da temeki shegýge bolmaıtyn jerler kiredi.
Internet materıaldary negizinde ázirlendi.
