«Qurmetti, ýkraınalyqtar. Saılaýdaǵy jeńisimnen keıin alty jasar ulym: «Teledıdardan estidim, Zelenskıı prezıdent degendi. Endi men de prezıdentpin be?» dep surady. Qazir túsindim, bul – aqıqat. Árqaısymyz prezıdentpiz. Maǵan daýys bergen 73 paıyz ǵana emes, bárimiz 100 paıyz prezıdentpiz. Bul – barshamyzǵa ortaq jeńis, ortaq jaýapkershilik», dep sóz basyn osylaı ózine tán erekshe stılmen bastaǵanymen, keıin saıası salmaqty suraqtarǵa kóshti. Eń aldymen, ol Joǵary Radany taratamyn dep málimdedi. Ol túsinikti de. Sebebi qazir parlamenttegi eń kóp oryndy saılaýdaǵy qarsylasy Petr Poroshenkonyń partııasy alyp otyr. Keıingi orynda eks-premer Arsenıı Iаsenıýktiń partııasy. Osy eki blok parlamenttegi 450 orynnyń 215-in ıemdengen. Iаǵnı, erteń Zelenskıı qandaı da bir zańdy usynsa, depýtattar oǵan qarsy shyǵýy ábden múmkin edi. Sol úshin Zelenskıı parlamentti taratyp, 21 shildege jańa saılaý taǵaıyndady.
Osy boljamdy rastaǵandaı, 22 mamyr kúni Joǵary Rada depýtattary Zelenskıı usynǵan «Ýkraınanyń halyq depýtattaryn saılaý» týraly zańyna qarsy daýys berdi. Jańa ýkraınbasy qazirgi proporsıonaldy-majorıtarly saılaý júıesinen taza proporsıonaldy júıege ótýdi usyndy. Oǵan qosa, parlamentke partııalardyń ótý mejesin 3 paıyzǵa túsirmek boldy. Alaıda Joǵary Rada bul oımen kelispedi.
Ulyqtaý rásiminde Zelenskıı aıtqan taǵy bir usynys jańa prezıdenttiń portretin kabınetterge ilmeý boldy. Onyń ornyna sheneýnikterge óz balalarynyń sýretin qoıyp, ár sheshim qabyldaǵanda solardyń kózine qaraýǵa keńes berdi. Kadr máselesi de kóterildi. Zelenskıı Ýkraınanyń Qorǵanys mınıstrin, Bas prokýroryn, Qaýipsizdik qyzmet basshysyn qyzmetinen alý týraly usynys jasady. Sebebi ol úshin Parlamenttiń kelisimi qajet. Alaıda bul tizimde Ýkraınanyń Ishki ister mınıstri Arsen Avakovtyń esimi atalmady. Nege ekeni belgisiz. Biraq oǵan mıllıarder Igor Kolomoıskııdiń qatysy bolýy múmkin. Sebebi olıgarh buǵan deıin Avakovty qyzmetinde qaldyrý kerek dep jýrnalısterge pikir bildirgen. Al jańa prezıdent Zelenskııdi álgi Kolomoıskıı jan-jaqty qoldap jatyr degen aqparat byltyrdan beri tarap keledi.
Volodımır Zelenskıı prezıdent retinde óziniń eń alǵashqy mindeti qazir eldiń Shyǵysynda júrip jatqan soǵysty toqtatý dep málimdedi. Syrttaı qarasańyz, óte durys, qoldaýǵa laıyq sóz. Alaıda eks-prezıdent Poroshenko sońǵy bes jylda sol soǵysty toqtata almady. Al endi jańa prezıdent bul oıyn qalaı júzege asyratyny belgisiz. Sebebi qazir Don jáne Lýgan aımaǵy Kıevke baǵynbaıdy, ózin táýelsiz respýblıka dep jarııalady. Oǵan qosa, Reseıdiń tolyq qoldaýyna ıe. Tipti áskeri de tur.
Jalpy kez kelgen prezıdenttiń óz komandasy, ıaǵnı naqty mamandardyń bolýy asa mańyzdy. Sebebi olar basshysynyń saıasatyn júzege asyrýshylar. Prezıdenttiń abyroıy keıde sol mamandarynyń jumys nátıjesine de baılanysty. Zelenskıı osy aptada mańyzdy memlekettik qyzmetterge óziniń burynǵy áriptesterin taǵaıyndady. Burynǵy degenim «95 kvartal» stýdııasynda birge istegen azamattar. Máselen, prezıdenttiń birinshi kómekshisi bolyp Sergeı Shefır taǵaıyndaldy. Ol «95 kvartaldyń» prodıýseri edi. Al Sergeı Trofımov prezıdent ákimshiliginiń birinshi orynbasary atandy. Ol da álgi stýdııanyń burynǵy atqarýshy prodıýseri bolǵan. Prezıdent ákimshiliginiń basshylyǵyna 42 jasar zańger Andreı Bogdan taǵaıyndaldy. Kezinde Ádilet mınıstriniń orynbasary bolǵan. Saılaý barysynda kómektesti. Budan bólek, joǵaryda aıtylǵan mıllıarder Kolomoıskııdiń keńesshisi de bolǵan. Soǵan qaraǵanda, álgi olıgarhtyń jańa prezıdentke yqpaly az emes sekildi.
Eks-prezıdent Petr Poroshenko qyzmetinen ketken kezde basyna qara bult úıirile bastady. Ýkraınanyń Memlekettik tergeý bıýrosy Poroshenkoǵa memleketke opasyzdyq jasady degen aıyp taqty. Iаǵnı, byltyr eks-prezıdent Kerch buǵazyna ýkraın teńizshilerin ádeıi jiberip, Reseıge qarsy áskerı jaǵdaı jarııalaýyn zańsyz dep tanyp otyr. Aıtpaqshy, ol teńizshiler áli kúnge Reseıdiń túrmesinde jatyr. Zelenskıı Reseıdegi barlyq tutqyndaǵy azamattarymyzdy qaıtaramyn dep ýáde berdi. Alaıda taǵy da qalaı qaıtaratynyn aıtqan joq. Máskeý olardy ońaılyqpen bere qoımas.
Kezinde Armenııada halyqtyń qoldaýymen bılikke kelgen Nıkol Pashınıannyń tájirıbesine qarasaq, ol eski parlamentti taratyp, jańa saılaýda elektorattyń 70 paıyz qoldaýyna ıe boldy. Sodan keıin ǵana reformalardy júrgize bastady. Volodımır Zelenskıı de dál osylaı isteýine týra keledi. Qazirgi áleýmettik saýalnamaǵa sensek, onyń serıaly attas «Slýga naroda» partııasyna halyqtyń 40 paıyzy daýys berýge daıyn. Iаǵnı, prezıdent osy qoldaýdy paıdalanyp, óziniń parlamenttegi jaǵdaıyn rettep alýyna múmkindik bar. Qysqasy, endi aldyn ala ssenarıi jazylǵan serıal emes, shynaıy saıası ómir bastaldy. Eks-akter, jańa prezıdent oǵan daıyn ba, joq pa, ony ýaqyt kórsetedi.
