Aıtýly kúni ushqan uıasyna degen salqar saǵynyshyn arqalap kelgen túlekter aldymen ýnıversıtet qaqpasyndaǵy «Máńgilik el» trıýmfaldy arkasyna jınaldy. Túlekter qaýymdastyǵynyń 25 jyldyǵyna arnalǵan forým jumysyna 2 myńnan astam túlek qatysty.
Ýnıversıtet tarıhynda eks-stýdentterdiń sleti tuńǵysh ret 2014 jyly uıymdastyrylsa, al túlekter kúni mamyr aıynyń sońǵy senbisinde dástúrli túrde ótip keledi. Oqý oshaǵynyń ujymy túlekter ýnıversıtetpen tyǵyz baılanysyn úzbeı úlken ómirge joldama bergen altyn uıasynyń árbir jetistigi men jeńisine birge qýanyp otyratynyn aıtady.
Ýnıversıtet pen túlekter qoǵamdastyǵy arasyndaǵy dáneker, is-sharanyń uıytqysy – QazUÝ túlekteri qaýymdastyǵy. Qaýymdastyqty 1981 jylǵy zań fakýltetiniń túlegi, Konstıtýsııalyq Keńes Tóraǵasy Qaırat Mámı basqarady. Tóralqa quramyna Oljas Súleımenov, Myrzataı Joldasbekov, Kenjeǵalı Saǵadıev, Aqmaral Arystanbekova, Armanjan Baıtasov, Almasadam Sátqalıev, Nurlan Smaǵulov jáne t.b. tanymal tulǵalar engen.
II forýmnyń is-sharalaryna ýnıversıtet shákirtteri, memlekettik qurylymdar, ǵylymı qoǵam, bıznes-qaýymdastyq, Qazaqstannan, alys jáne jaqyn shetelderden kelgen seriktes joǵary oqý oryndarynyń, Qazaqstandaǵy dıplomatııalyq mıssııalardyń ókilderi, ýnıversıtet oqytýshylary qatysty.
Forýmnyń saltanatty ashylýynda sóz alǵan Almaty qalasynyń ákimi Baýyrjan Baıbek Memleket basshysy Qasym-Jomart Toqaevtyń quttyqtaý hatyn oqydy. QazUÝ rektory, akademık Ǵalym Mutanov, Parlament Senatynyń apparat basshysy Serik Sydyqov, Parlament Májilisiniń vıse-spıkeri Gúlmıra Isımbaeva, aqyn Oljas Súleımenov, Ishki ister vıse-mınıstri Rashıd Jaqypov, BǴM departamentiniń dırektory Ádilet Toıbaev, «Astana Group» kompanııasynyń prezıdenti Nurlan Smaǵulov jáne basqa da belgili túlekter sóz alyp, jınalǵan jurtshylyqty ataýly kúnmen quttyqtady.
QazUÝ rektory Ǵalym Mutanovtyń aıtýynsha, alma-mater – otandyq elıta kadrlardyń basty «ustahanasy». Búginde QazUÝ álemdik deńgeıdegi zertteý ýnıversıtetine aınalyp keledi. QS jalpy tanylǵan halyqaralyq reıtıngte álemniń 800 úzdik JOO ishinen 220-orynǵa taban tirep, top-250 ýnıversıtettiń qataryna engen. Álemdegi eń ekologııalyq 200 joǵary oqý ornynyń jáne tehnologııalyq damyǵan 50 ýnıversıtettiń sapyna kiretin oqý oshaǵy «Túrki áleminiń eń úzdik ýnıversıteti» dep tanylǵan.
«Túlekter kúnin toılaý ıdeıasy Elbasynyń «Týǵan jer» baǵdarlamasymen úndesedi. Otanǵa degen qurmet eline, týǵan aýyly men qalasyna degen mahabbattan bastalady. Túlekterimizdiń ózi bilim alyp, stýdenttik shaǵyn ótkizgen, alma-materge degen erekshe yqylasy – bul da jalpyulttyq patrıotızmniń eń erekshe qyry. Biz elimizdiń ekonomıka, ǵylym, bilim, mádenıet salalaryna qomaqty úlesin qosyp júrgen túlekterimizdi maqtan tutamyz», dep atap ótti ýnıversıtet rektory.
«Men Qazaqstannyń eń úzdik joǵary oqý ornynyń túlegi ekenimdi maqtanyshpen aıtyp júremin. Alma-mater qurylǵan sátten bastap daryndy da talantty mamandardy jınady. Qazirgi tańda túlekter bizdiń táýelsiz respýblıkamyzdyń damýyna atsalysyp, el ıgiligi jolynda eńbek etip keledi», dedi Oljas Súleımenov.
Forýmda ýnıversıtetpen tyǵyz baılanysty qoldap qana qoımaı, alma-materge demeýshilik kórsetip júrgen birqatar túlekter marapattaldy. Atap aıtar bolsaq, «QazUÝ mesenaty» sertıfıkattary mehanıka-matematıka fakýltetiniń túlegi Asylbek Qojahmetovke, jýrnalıstıka fakýltetiniń túlegi Armanjan Baıtasovqa, hımııa fakýltetiniń túlegi Abdrasıl Jarmenov pen Zelına Katranovaǵa tabystaldy.
Sonymen qatar ál-Farabı atyndaǵy QazUÝdyń «Eren eńbegi úshin» medalimen Oljas Súleımenov, Eýrazııalyq gýmanıtarlyq ınstıtýtynyń rektory, 1969 jyldyń túlegi Amangeldi Qusaıynov, belgili qoǵam qaıratkeri Rahman Alshanov, «Eýrazııa» birinshi arnasynyń bas dırektory Sergeı Kıselev, «Bilimdi el» qoǵamdyq-saıası gazetiniń bas redaktory Lázzat Túrkistanova marapattaldy.
