Aımaqtar • 30 Mamyr, 2019

Syrdyń jastary syrtta oqıdy

940 ret

kórsetildi

3 mın

oqý úshin

Qazaqstan talantty jastardy sheteldiń mańdaıaldy oqý oryndarynda oqytyp, mamandyq alýyna jaǵdaı jasap keledi.

Baqtııar TAIJAN

2014 jyldan bastap Reseıdiń jetekshi ınjenerlik joǵary oqý oryndaryna RF úkimetiniń granty esebinen qyzylordalyq 500-ge jýyq túlek oqýǵa qabyldanǵan bolatyn. Byltyr alǵashqy 32 túlek oqýyn aıaqtap, elge oraldy. Olar qazirgi tańda óńirdiń jetekshi kásiporyndarynda jumys istep jatyr. Al 42 túlek oqýyn magıstratýrada jalǵastyrdy. Bıyl taǵy 123 túlek oqýyn támamdaıdy dep kútilýde. 2018 jyly Máskeý jáne Sankt-Peterbýrgtiń joǵary oqý oryndaryna 58 qyzylordalyq jas oqýǵa tústi.

Bıyl Qyzylordada Nazarbaev zııatkerlik mektebiniń bazasynda álemniń úzdik joǵary oqý oryndaryna túsýge daıyndaıtyn ortalyq ashý josparlanyp otyr. Oblys ákimi Qyrymbek Kósherbaev daryndy túlektermen kezdesý barysynda osylaı dedi.

Bul kezdesýge respýblıkalyq jáne halyqaralyq baıqaýlardyń, olımpıadalardyń 55 qatysýshysy shaqyrylǵan edi. Olar bıyl 58 júlde, atap aıtqanda, 15 altyn, 13 kúmis jáne 30 qola medal alǵan bolatyn.

О́ńir basshysy jastarmen aımaqtyń damýy týraly áńgimelesip suraqtaryna jaýap berdi.

– Ekinshi jyl qatarynan bizdiń mektep túlekteriniń 97%-y joǵary oqý oryndary men kolledjderge túsedi. Endi kem degende oblystaǵy mektep bitirýshilerdiń 50%-y joǵary oqý oryndaryna, onyń ishinde sheteldik ýnıversıtetterge de túsýin kózdep otyrmyz. Maqsatymyz – aımaq jastarynyń Garvard, Iel jáne Massachýsets ýnıversıtetterinde bilim alýyna jaǵdaı jasaý. Sondaı-aq talantty jastarǵa kásipkerlik, dızaın, kommýnıkasııa sııaqty salalarda jańa tehnologııalardy engizip, qoldanatyn Reseıdiń «Kvantorıým», «Sırıýs» sekildi iri ortalyqtardyń tájirıbesin meńgerýi óte mańyzdy – dedi aımaq basshysy.

Osy maqsatta qyzylordalyq oqýshylardy «Bolashaq» baǵdarlamasynyń túlekteri qurǵan elordalyq «Astana Garden School» jekemenshik mektebinde oqytýdy uıymdastyrý jáne Nazarbaev zııatkerlik mektebiniń bazasynda oqýshylardy shet memlekettegi irgeli ýnıversıtetterge túsýge daıyndaıtyn arnaıy ortalyq ashý josparlanýda. Bul tájirıbe 2016 jyldan bastap elordada júzege asyrylyp jatyr.

Jastar saıasaty jónindegi basqarmanyń basshysy Qýanysh Januzaqov bıyl 117 bitirýshiniń 53 túlegi «MBjQI» ulttyq zertteý tehnologııalyq ýnıversıtetin, 41 túlegi K.A.Tımırıazev atyndaǵy Reseı memlekettik agrarlyq ýnıversıtetin, 23 túlegi Sankt-Peterbýrg qalasyndaǵy Tehnologııa jáne energetıka joǵary mektebin támamdaıtynyn aıtty. Olar «Nanotehnologııa jáne mıkrosıstemalyq tehnıka», «Metallýrgııa», «Tehnologııalyq mashınalar men jabdyqtar», «Elektr energetıkasy jáne elektrotehnıka», «Agroınjenerııa» jáne taǵy basqa 22 mamandyq boıynsha bilim alǵan. Olardyń 50-i magıstratýrada oqýyn jalǵastyrýdy josparlap otyrsa, 67 túlek elge oralmaq. Osyǵan oraı, «Bıyl óńirde agroónerkásip kesheni salasynda 76 joba iske asyrylýda. Aımaqta iske qosylýy josparlanǵan 4 joba boıynsha 400-den asa adamdy jumyspen qamtý josparlanǵan. Jas mamandar osy jobalar jáne basqa da iri kásiporyndar men mekemelerde jumyspen qamtylýy tıis», dedi oblys ákimi.

Qyzylorda oblysy