Eske alý jıyny barysynda Mamochkıno qorymynyń aýmaǵyn abattandyrý jumystarynyń jospary jáne ol jerde boı kóteretin memorıaldyq keshenniń jobasy tanystyryldy.
– Sáýletshiler Qaırat Jıenbaev, Iýlııa Lı jáne músinshi Taras Kıshkarev quramyna engen shyǵarmashylyq top bul jobany ázirleýge birneshe jyldy sarp ettik. Jalpy, zıratty qaıta qurý ıdeıasy buryn da kóterilgen edi, onyń ústine jergilikti turǵyndar da bul týraly kópten beri aıtyp júrgen bolatyn. Al ótken jyly oblys ákimdigi tarapynan Mamochkıno zıratyn retke keltirý jóninde tapsyrma berilgen soń jumystyń alǵa basqan túri bar, – deıdi sýretshi, joba avtorlarynyń biri Igor Bagramov.
Jospar boıynsha jańǵyrtý jumystarynan keıin zırattaǵy tozyǵy jetken temir qaqpanyń orynyn jańa mazmundaǵy kireberis basady. Iаǵnı, onyń orta tusynda «Ana qaıǵysy» monýmenti ornalasatyn bolady. Eki qolymen betin basyp jylap otyrǵan qaıǵyly áıeldiń músinin jan-jaǵynan tikenek symmen shańdylǵan dar aǵashyna uqsas úsh baǵan qorshap turady. Al baǵandardyń basynda aq tastan jasalǵan kógershinder qonaqtap otyrady. Músin avtorlary muny jer betinen ushyp ketse de, anasyn qııa almaı júrgen beıkúná sábıler rýhynyń belgisi dep túsindirdi.
Budan bólek, zırat janynda minájat úıi salynbaqshy. Onda dástúrli úsh konfessııanyń – musylmandar, pravoslavıe jáne katolıkterdiń rámizderi bar úsh kireberis bolady. Minájat úıiniń ishi úsh bólek bólmeden turady: olardyń árqaısysy dinı kanondarǵa sáıkes rásimdeledi. Máselen, bir qabyrǵada Quran tursa, qalǵan ekeýine ıkonalar ornatylady. Minájat úıine úsh jaǵynan da kirýge bolady.
Sonymen qatar, Mamochkıno zıratynyń aýmaǵy tolyqtaı abattandyrylady. Kelýshilerge qolaıly bolý úshin kirme jol tóselip, memorıaldyq keshen mańyna oryndyqtar, qoqysqa arnalǵan jáshikter jáne baǵanshamdar ornatylady. Atalǵan jumystar aıaqtalǵannan keıin Mamochkıno memorıaldyq kesheni Dolınkadaǵy saıası qýǵyn-súrgin qurbandaryna arnalǵan murajaıdyń qaramaǵyna beriledi.
Eske salsaq, Mamochkıno zıratyna 1930-40 jyldar aralyǵynda saıası qýǵyn-súrginge ushyraǵandarǵa arnalǵan atyshýly Qarlagtyń túrli aýrý men ashtyqtan kóz jumǵan tutqyndary jáne olardyń balalary jerlegen.
