«Aq jol» demokratııalyq partııasynan prezıdenttikke kandıdat Danııa Espaeva Pavlodar oblysynyń turǵyndaryn saılaýaldy baǵdarlamasymen tanystyryp júr. Ol óziniń senim bildirilgen adamdarymen birge Ekibastuz qalasyna baryp, jergilikti kásipker, energetıka jáne áleýmettik saladaǵy jumyskerlermen kezdesti. Ekibastuzda energetıka, kómir ónerkásibi, baǵaly metaldardy óndirý salalary jaqsy damyǵan. Búgingi tańda qalada 8 myńdaı shaǵyn jáne orta bıznes nysandary bar. Byltyrdyń ózinde jańadan 15 jańa kásiporyn ashyldy.
Ekibastuzda úmitker jergilikti ónerkásip pen áleýmettik obektilerge bardy. Kezdesýlerge jergilikti bıznesmendermen qatar qalanyń basqa da turǵyndary qatysyp, kandıdattyń baǵdarlamasyndaǵy negizgi baǵyttarǵa qyzyǵýshylyq tanytty. «Baǵdarlamada kásipkerlerge shaǵyn bıznesti yntalandyrý úshin salyqty tómendetý, salalar úshin qosymsha qun salyǵynyń mólsherlemesin azaıtý qarastyrylǵan eken. Taýar baǵasynyń quny osyǵan baılanysty bolǵandyqtan, bul – óte ózekti másele. Maǵan shaǵyn jáne orta bıznes úshin banktegi nesıe mólsherlemesin tómendetý týraly oıy unady. Bul da kókeıkesti másele», dedi kásipker Vıktorııa Ostrıkova.
«Aq jol» partııasynyń úmitkerimen kezdesý barysynda turǵyndar áleýmettik máselelerdi de kóterdi. Ekibastuzdaǵy halyq sany 150 myńnan asady. Munda metallýrg, ınjener, shahterlerdiń áýleti turady. Qala turǵyndarynyń sózine qaraǵanda, sońǵy jyldary mektep bitirýshiler kórshi memleketke oqýǵa túse bastaǵan. Olar onda tehnıkalyq baǵyttaǵy sapaly bilim alyp, jumyspen qamtylady. Buǵan qatysty D.Espaeva óz oıyn bildirip: «Bizdiń daryndy jastarymyz syrt jaqqa ketýde, bul máselege basa nazar aýdarý qajet. Birinshiden, tehnıkalyq qana emes, barlyq sala boıynsha bilim sapasyn kóterý kerek. Joǵary oqý ornynan soń bitirýshiler jumys tájirıbesiniń joqtyǵyna qaramastan jumyspen qamtylýy tıis», dedi.
* * *
«Aýyl» halyqtyq-demokratııalyq patrıottyq partııasy usynǵan prezıdenttikke kandıdat Tóleýtaı Raqymbekov Mańǵystaý oblysynyń turǵyndaryna saılaýaldy baǵdarlamasyn tanystyrdy. Ol qoǵamdyq shtabynyń ókilderimen birge ár aımaqqa tán máselelerdi kóterip, onyń sheshý joldaryn usyndy.
«Mańǵystaý óńirine kúndelikti tutynatyn azyq-túliktiń basym bóligi basqa aımaqtardan ákelinedi. Soǵan sáıkes, baǵa da joǵary. Bul máseleni sheshý úshin aýyl-aımaqta jylyjaılardy kóbeıtý kerek. Buǵan qosa shubat óndirisin bir jolǵa qoıyp, tabys kólemin eselep arttyrýǵa bolady. Osy tektes bastamalarǵa qazir memleketten jaqsy qoldaý bar. Endi turǵyndarǵa osyndaı múmkindikti utymdy paıdalanyp, iske asyrylyp jatqan is-sharalardan ýaqtyly habardar bolyp, kásip ashýdyń túrli tetikterin tıimdi qoldaný da mańyzdy», dedi Tóleýtaı Raqymbekov.
Buǵan qosa kezdesýler barysynda jumyssyzdyq máselesi keńinen talqylandy. О́ıtkeni munaıly ólke dep aýyl jastary osynda aǵylady. Biraq bárine birdeı turaqty jumys tabylmaıdy. Sondyqtan prezıdenttikten úmitker qatań jáne qurǵaq klımatty syltaýrata bermeı, sońǵy tehnologııalardyń negizinde aýyl sharýashylyǵyn jandandyrýǵa kúsh salý kerektigin aıtty. Onyń saılaýaldy baǵdarlamasy tek aýyl sharýashylyǵyn damytýǵa negizdelmegen. Sondaı-aq baspanamen qamtý, ınfraqurylymdy damytý jáne jastar saıasatyna qatysty da baǵyttar bar. О́ńirdegi kezdesý barysynda osy máseleler de egjeı-tegjeıli baıandaldy.
Sonymen qatar kandıdat Atyraýdaǵy Damby balyq ınspeksııasynda ǵylymı balyq aýlaý prosesimen tanysyp, balyqshylarmen júzdesti. Onda óńirdegi balyqshylardyń eńbekaqysyn ósirý kerektigi sóz boldy. T.Raqymbekov balyq sharýashylyǵyn damytýǵa arnalǵan, naqtyraq aıtqanda, akvamádenıet, ıhteologııa baǵytynda memlekettik deńgeıde tıisti strategııalyq tujyrymdama qabyldanýy tıis dep sanaıdy.
* * *
Kásipodaqtar federasııasynan prezıdenttikke kandıdat Amangeldi Taspıhovtyń Mańǵystaý oblystyq qoǵamdyq shtabynyń músheleri bilim berý mekemeleriniń qyzmetkerlerimen kezdesti. Senim bildirilgen adamdar aldymen oblystyq energetıka kolledjiniń ujymymen, sodan keıin Aqtaý qalalyq tehnologııalyq qyzmet kórsetý kolledjiniń eńbek ujymymen jıyn ótkizdi. Oǵan oblystyq kásipodaqtar ortalyǵy basshysynyń orynbasary Telman Mataev pen bilim jáne ǵylym qyzmetkerleriniń salalyq kásiptik odaǵynyń oblystyq uıymynyń tóraıymy Tarbııa Baıymbetova qatysyp, sóz sóıledi.
Basqosýda Almaty aýyr mashına jasaý zaýytynda ınjener-tehnolog bolyp eńbek jolyn bastaǵan A.Taspıhovtyń ómirbaıany tanystyryldy. T.Mataev úmitkerdiń tuǵyrnamasyn jan-jaqty ashyp kórsetip, bul qujatta qarapaıym eńbek adamdarynyń múddesin qorǵaýǵa, halyqtyń áleýmettik jaǵdaılaryn kúsheıtýge arnalǵan baǵyttar baryn atap ótti. Kezdesýge 120-dan asa adam qatysyp, A.Taspıhovtyń saılaýaldy baǵdarlamasyn biraýyzdan qoldaıtyndaryn jetkizdi.
Sonymen qatar saılaýaldy naýqan jumystarynyń aıasynda Nur-Sultan qalasynyń kásipodaq ortalyǵy músheleri Aqkól qalasynyń irgesinde ornalasqan balalarǵa arnalǵan «Arman» dene shynyqtyrý jáne saýyqtyrý ortalyǵyna bardy. Munda elordalyq orta mektepter arasynda «Týrıstik jıyn» ótti. Bul – Tastanbek Esentaev bastaǵan elordalyq qoǵamdyq shtabtyń kezekti saılaýaldy úgit-nasıhat aksııasy. Kásipodaq músheleri muǵalimder men oqýshylar arasynda óz kandıdattarynyń tuǵyrnamasyn tanystyryp, qoldaý kórsetýge shaqyrdy.
Jınalǵan qaýym kandıdat A.Taspıhovtyń baǵdarlamasyndaǵy eńbek ujymynyń mártebesin kóterýge qatysty baǵyttarǵa qyzyǵýshylyq tanytyp, kókeılerinde júrgen máselelerin ortaǵa saldy. Buǵan qosa, elimizdegi saıası naýqanǵa selqos qaramaıtyndaryn ańǵartyp, belsendi qatysatyndaryn aıtty.
* * *
Qazaqstan Kommýnıstik halyq partııasy atynan saılaýǵa túsip jatqan Jambyl Ahmetbekovtiń senim bildirilgen adamy, Almaty oblystyq saılaýaldy shtabynyń jetekshisi S.Bıǵarova Taldyqorǵan qalasyna baryp, D.Qonaev atyndaǵy etnografıkalyq mýzeıdi aralady. Sondaı-aq Oqýshylar saraıynda da saılaýshylarmen kezdesti.
S.Bıǵarova batystyń tek paıda úshin, kez kelgen jolmen aqsha tabýdy kókseıtin adamgershilikke jat dástúri bizdiń Otanymyzǵa qaýipti ekenin aıtyp, prezıdenttikke úmitkerdiń saılaýaldy tuǵyrnamasynda batystyń yqpaly men jalǵan qundylyqtarynan bas tartý máselesi kórsetilgenin málimdedi. Shtab jetekshisi Qazaqstannyń árbir azamaty eldiń bolashaǵyna jaýapty ekenin alǵa tartyp, saıası naýqannyń mańyzdylyǵyna toqtaldy jáne kópshilikti 9 maýsymǵa belgilengen saılaýǵa belsendi qatysýǵa shaqyrdy.
Sonymen qatar Kommýnıstik halyq partııasynyń ókilderi jer-jerde túrli is-sharalar uıymdastyryp jatyr. Sonyń biri Pavlodar oblystyq qoǵamdyq shtabynyń Ertis ózeninde teplohodpen serýen jasaǵany boldy. Onda serýendeýshiler keńestik mýzykalardy tyńdap, J.Ahmetbekovke daýys berý úndeýine qulaq túrdi. Teplohod úgit plakattarymen bezendirildi. Al partııa nyshanymen ádiptelgen kıim kıgen belsendiler saılaýshylarǵa úgit materıaldaryn taratty.
Serýen barysynda uıymnyń Pavlodar oblystyq komıtetiniń birinshi hatshysy G.Nuǵmanova qatysýshylarǵa J.Ahmetbekovtiń saılaýaldy tuǵyrnamasynyń negizgi tezısterin tanystyrdy. Ol jurtqa úmitkerdiń kórshi eldermen Eýrazııalyq ekonomıkalyq odaq jáne «Bir beldeý, bir jol» jobasy aıasyndaǵy halyqaralyq qarym-qatynastyń jáne ekonomıkalyq ıntegrasııanyń jalǵasýyn qoldaıtyndyǵyn jetkizdi.
* * *
Nur Otan partııasynan prezıdenttikke kandıdat Qasym-Jomart Toqaevtyń respýblıkalyq qoǵamdyq shtaby Almaty qalasyndaǵy Mádenıet úıinde halyqpen júzdesti. Aporttyń otanyndaǵy patrıot turǵyndar bul kezdesýge belsendi qatysty.
Respýblıkalyq shtab jetekshsi Máýlen Áshimbaev bastaǵan delegasııa jınalǵan qaýymnyń nazaryn Q.Toqaevtyń saılaýaldy baǵdarlamasynda aıtylǵan ózekti máselelerge aýdardy. Máselen, baǵdarlamadaǵy quqyq qorǵaý organdaryn reformalaý jónindegi talaptardyń mańyzdylyǵy atalyp ótti. Sondaı-aq kandıdattyń árbir qazaqstandyqtyń tabysy men turmysyn túzeýge, áleýmettik qamtamasyz etýdi jetildirýge kúsh salatyny aıtyldy. «Qurmetti almatylyqtar, 9 maýsym kúni saılaý ýchaskelerine shaqyramyz. Barshańyzdy atsalysýǵa shaqyramyn. Barlyǵyńyz beıbitshilik pen turaqtylyqty saqtaý úshin daýys berińizder. Kandıdatty saılaı otyryp, sizder Qazaqstannyń bolashaǵy úshin daýys beresizder!», dedi M.Áshimbaev.
Sonymen qatar Q.Toqaevtyń senim bildirilgen adamdary bıznes-qoǵamdastyq ókilderimen kezdesti. Bıznes salasyndaǵy ózekti máselelerdi talqylaý barysynda M.Áshimbaev kandıdattyń saılaýaldy baǵdarlamasynyń «О́rleý» atty bóliminde sý, jol salý men mektep qurylysy jáne medısınalyq kómek jaıy qamtylǵany aıtyldy. «Eger eldi meken taza aýyzsýmen qamtylǵan bolsa, onda sapaly jol salynady. О́z isine berilgen ustazdar eńbek etetin mektepter paıda bolyp, alǵashqy medısınalyq kómek kórsetetin oryndar bolady. О́rleýdiń máni de osynda. Buǵan qosa, órleý uǵymy memlekettiń óz kásipkerlerin tıimdi qorǵaýynan kórinedi. Baǵdarlamada bıznesmenderge júıeli ári kóp qyrly qoldaý kórsetý jaıy basa aıtylǵan», dedi respýblıkalyq qoǵamdyq shtab jetekshisi.
* * *
«Ult taǵdyry» ulttyq-patrıottyq qozǵalysy atynan prezıdenttikke kandıdat retinde tirkelgen Ámirjan Qosanovtyń Almaty qalasyndaǵy saılaýaldy qoǵamdyq shtabynyń músheleri Ulttyq kitaphanada mádenıet qyzmetkerlerimen kezdesti. Úgit-nasıhat tobyn shtab jetekshisi Maqsat Jaqaý bastap bardy.
Á.Qosanovtyń senim bildirilgen adamdary kópshilikke saılaýaldy tuǵyrnamada kórinis tapqan negizgi baǵyttardy tanystyryp, kandıdattyń túrli máselege kózqarasy jaıly baıandap berdi. Olardy muqııat tyńdaǵan qatysýshylar ózderiniń suraqtaryn da qoıyp, halyqtyń ál-aýqatyn kóterý turǵysynda pikir almasty.
Elimizdiń jer-jerinde ótip jatqan osyndaı kezdesýlerde kandıdattyń saılaýaldy tuǵyrnamasynda kórsetilgen basty ustanymdar keńinen túsindirilip jatyr. Onyń baǵdarlamasyndaǵy «Sóz júzindegi emes, is júzindegi Táýelsizdik» atty taraýynda syrtqy saıasatta kóp vektorly dıplomatııa, aýmaqtyq tutastyqty qurmetteý, teń quqyqtyq qarym-qatynas tájirıbesine qaıta oralý, Ortalyq Azııadaǵy kórshiles memlekettermen ózara senimdilikti, odaqtastyq pen ujymdyq qaýipsizdikti nyǵaıtý, sondaı-aq túrki tildes elderdiń yntymaǵyn odan ári tereńdetý týraly aıtylǵan.
Sonymen qatar Petropavl qalasynda prezıdenttikten úmitker Á.Qosanovtyń oblystyq qoǵamdyq shtabynda saılaý kúni ýchaskelerde daýys berý prosesin qadaǵalaıtyn baıqaýshylar úshin semınar ótkizildi. Mundaı jıyndar saıasattanýshy Dos Kóshimniń bastamasymen uıymdastyrylýda. Ol eki kún ishinde baıqaýshylar daıyndaý jumystaryn belsendi júrgizýde. Saıasattanýshy trenıng aıasynda baıqaýshylardyń quqyqtary men mindetteri, saılaý kezinde oryn alýy yqtımal túrli jaǵdaılardaǵy áreketteri jaıly túsindirdi. Sonymen qatar shtab músheleri turǵyndarmen kezdesip, kandıdat týraly baıandap berdi, úgit-nasıhat materıaldaryn taratty.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgeldiń Túrkistan oblysyndaǵy saılaýaldy qoǵamdyq shtabynyń ókilderi óńirdegi kıeli jerlerdi aralady.
Aımaqtaǵy shtab jetekshisi Ázız Ánetov bastaǵan nasıhatshylar toby saparlaryn aldymen qazaq handary men bı-sheshenderi súıegi jatqan tarıhı qala Túrkistan qalasynan bastady. Munda Qoja Ahmet Iаsaýıdiń kesenesine soǵyp, táý etti. Sol mańda týrıster men zııarat etip kelgenderge kandıdattyń basty ustanymdary túsindirilip, sonyń ishinde ulttyq qundylyqtardy ulyqtaý týraly keńinen aıtyldy. «Jer – janymyz, til – tuǵyrymyz» dep urandatqan S.Túgel osy Túrkistan sekildi qasıetti jerimizdiń qadirin bilip, dál osy óńirdegi halyqtyń taza saqtalǵan tili men qaımaǵy buzylmaǵan dástúri búkil qazaqqa úlgi bolǵanyn kókseıdi.
Sonymen qatar nasıhatshylar toby odan ári qaraı jyljyp, irgedegi Otyrar aýdanyna jol tartty. Onda Áziret Sultannyń ustazy, babtardyń baby Arystan babtyń kesenesi bar. Kandıdattyń senim bildirilgen adamdary bul jerde de belsendi jumys istep, kelgen-ketken jurtqa úgit materıaldaryn taratty.
Buǵan qosa S.Túgeldiń Almaty oblysyndaǵy qoǵamdyq shtaby da qarqyndy jumys istep jatyr. «Bizdiń negizgi maqsatymyz – oblystaǵy árbir turǵynyn óz kandıdatymyzdyń saılaýaldy tuǵyrnamasynan habardar etý. Baǵdarlamanyń basty baǵyttary – memlekettik tildiń mártebesin kóterý, jemqorlyqpen tabandy kúres, jumyssyzdyq máselesin sheshý, elimizdiń demografııasyn basa kóńil bólý jáne ulttyq oıyndarymyzdy, ásirese at sporty túrlerin damytý. Úgit-nasıhat jumystary barlyq aýdandardy qamtyp jatyr. Ár aýdanda kem degende úsh ókilimiz jumys isteýde. Barlyǵy – 60 adam», dedi óńirdegi kandıdattyń senim bildirilgen adamy Laýra Áshenova.
Daıyndaǵan
Orynbek О́TEMURAT,
«Egemen Qazaqstan»
