Naqtyraq aıtsaq, Shardara SES-in túbegeıli jańǵyrtý baǵdarlamasy aıasynda 2020 jylǵy naýryzǵa deıin stansadaǵy 4 sý agregatynyń bárin de aýystyrý josparlanyp otyr. Jobanyń jalpy quny 38 mlrd teńge, qarjylandyrý 32% óz qarajaty esebinen, 68% nesıe esebinen. Joba merdigeri – aýstrııalyq-germanııalyq «Andtitz Hidro GmbX» kompanııasy.
Mamandardyń esebinshe, qaıta qurý SES-tiń qýatyn 26 paıyzǵa – qazirgi 100 MVt-tan 126 MVt-qa deıin ulǵaıtýǵa múmkindik beredi. Jyl saıyn qosymsha 57 mln kVt/saǵat elektr energııasy óndiriletin bolady. Jańa jabdyq sý stansasynyń qyzmet etý merzimin 35-40 jylǵa deıin uzartyp, SES-ti paıdalaný senimdiligin arttyrady jáne apat qaýpiniń deńgeıin tómendetedi. Josparlanǵan 4 sý agregatynyń ekinshisi jýyrda paıdalanýǵa berildi. SES-te tehnologııalyq jabdyqtyń synaǵy oıdaǵydaı aıaqtalyp, negizgi qurylys-montaj jumystary júrgizildi.
Paıdalanýǵa 1967 jyly berilgen Shardara SES-tiń normatıv boıynsha qyzmet etý merzimi 25 jyl bolsa, tehnologııalyq jabdyǵy 50 jyldan astam ýaqyt boıy paıdalanylyp keledi. Mamandardyń aıtýynsha, jańǵyrtý jobasynyń bastalýyna qaraı jabdyqtyń tozýy shamamen 100%-ǵa jetken. Sý stansasynda ornatylǵan elektr jabdyǵynyń bir bóligin ony jasaǵan zaýyttar qazir shyǵarmaıdy jáne ony óndiristen alyp tastaǵan. Únemdiligi men paıdalaný senimdiligi turǵysynan jabdyqty odan ári paıdalaný maqsatqa saı bolmaı qalǵan. Alǵashqy eki sý agregatyn paıdalanýǵa tapsyrýmen birge, úshinshi agregat boıynsha qurylys jumystary qatarlasa júrýde. Sonymen bir mezgilde tórtinshisi ornynan alynady. Bekitilgen kestege saı, bul ýaqytta osyǵan deıin iske qosylǵandary jumys istep turady. «Shardara SES» AQ-nyń basqarma tóraǵasy B.Jańabaevtyń aıtýynsha, 4 sý agregatynyń bárin de jańartý kózdelýde.
Túrkistan oblysy
