Sonymen birge, oqýshylardyń túrli úıirmelerge, mádenı is-sharalarǵa, sport seksııalaryna qatysýlaryna jaǵdaı jasalady. Balalardy júzýge úıretýge jáne basseınderdi kóbeıtýge septigin tıgizetin «Qaýipsiz sý» jazǵy aksııasy ótkizilmek. Bul málimetter oblys ákimdigi janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komıssııa májilisinde keltirildi. Jıynda oblys ákiminiń orynbasary Málik Otarbaev bala tárbıesi, bilim berý salasynda kemshilik jibergen birqatar jaýapty basshylarǵa jumysty shıratýdy tapsyrdy. «Qazirgi tańda qoǵamnyń aldynda turǵan basty mindetterdiń biri – balalar men jasóspirimder arasyndaǵy quqyq buzýshylyqtyń aldyn-alý. Bul sala oblys ákimi О́mirzaq Estaıulynyń tikeleı qadaǵalaýynda tur. Sondyqtan kámeletke tolmaǵandar jónindegi keshendi is-sharalar jospary qaıta qaralyp, bekitilsin. Mektep oqýshylarynyń jazǵy demalysyn tıimdi ótkizý baǵytynda jumystar júrgizilsin», - dedi M.Otarbaev.
Oblysta BAQ jáne ınternet-keńistikte zorlyq-zombylyq pen qatygezdikke qarsy aqparattyq naýqan ótkizilip, qala, aýdandardaǵy balalardy tasymaldaıtyn kólikterdiń qaýipsiz-tehnıkalyq erekshelikterine taldaý júrgiziletin bolady. Sonymen qatar, saýyqtyrý lagerleriniń, aýla klýbtarynyń, ózge de mektepten tys mekemelerdiń jelisin arttyrý, úıirmelerge qatysýshylardyń sanyn kóbeıtý baǵytynda jumys kúsheımek. Oıyn alańdary men attraksıondaryna monıtorıng jasalady.
