Rýhanııat • 31 Mamyr, 2019

Eki keshtiń arasynda

4600 ret

kórsetildi

2 mın

oqý úshin

Kún batyp, kóz baılana bastaǵan shaq. Aýyl shetindegi toqal tamnyń irgesine kelip, úsh-tórt salt atty kisi tizgin tartty. Ishte otyrǵan otaǵasy olardyń «Kim bar-aý?» degen daýsyn estigen boıda qalbalaqtap syrtqa atyp shyqty. Semiz tory atqa mingen dóńgelek júzdi, murtty kisi esik aldyna taıap kelip: «Shyrshyqqa baratyn tóte jol osy ma?» dedi tam artyndaǵy qasqa joldy qamshysynyń sabymen nusqap. «Iá, – dedi otaǵasy tez basyn shulǵyp. – Osy jol». «Á-á, Alla razy bolsyn», dep álgi kisi atynyń basyn keri burdy. О́zi sirá, atqosshy bolsa kerek. О́ıtkeni onyń ar jaǵyndaǵy at basyn irkip turǵandar qalalyq qyzmettegi kisilerge uqsaıdy.

Nurǵalı ORAZ

Otaǵasynyń jaýabyn estigen boıda jolaýshylardyń úzeńgisi syńǵyr ete túsken. Aı jaryǵymen áýdem jerge sheıin aǵarańdap kórinip jatqan qasqa jol olardy Shyrshyq qalasyna emes, basqa jaqqa, tiri janǵa beımálim bir tylsym túnekke qaraı jeteleı jónelgendeı kórindi.

«Qap-áı, – dep ókindi otaǵasy basyn shaıqap. – Ishke kirip, shaı ishińizder degende bolar ma edi? Áı, biraq... Mynandaı dókeı myrzalar bizdiń jaman tamǵa kirer deımisiń?!».

Al erteńine...

Tús áletinde OGPÝ-diń eki qyzmetkeri álgi toqal tamnyń esigin syndyryp jibererdeı serpip ashyp, ishke basa-kóktep kirip keldi de: «Tez jınal!» dep buıyrdy otaǵasyna. Sóıtip aı men kúnniń amanynda ne bolǵanyn túsinbeı, ekeýine jaltaq-jaltaq qaraǵan álgi baıǵusty ózderi minip kelgen arbanyń artqy jaǵyna otyrǵyzyp, qalaǵa qaraı aldy da ketti.

Sol kúni oǵan «Asa iri halyq jaýlarymen sybaılas bolyp, jol kórsetti» degen aýyr aıyp taǵylyp, tabany kúrekteı on jylǵa ıt jekkenge aıdalyp kete bardy...

Bul oqıǵa 1937 jyldyń kókteminde, bizdiń aýylda bolǵan eken. Ony estigen jurt áli kúnge deıin: «Qudaı-aý, sonda nemene, eki keshtiń arasynda tanymaıtyn-bilmeıtin kisilerge jol siltegeni úshin be?» dep suraıdy tańǵalyp. «Iá, – deıdi oǵan bizdiń atalarymyz ben apalarymyzdyń bireýi aqyryn ǵana. – Sondaı da zaman ótken ǵoı bastan...».