Mádenı sharanyń ashylý saltanatynda oblys ákiminiń orynbasary Rýslan Álishev Tuńǵysh Prezıdentimizdiń bastamasymen búginde dástúrge aınalyp, jas urpaq úshin ónege-taǵylymy mol konkýrstyń tárbıelik mańyzdylyǵyn atap ótti.
«El dep kelgen baýyrlar», «Ana júreginiń jylýy», «Urpaq sabaqtastyǵy», «Sheberdiń qoly ortaq», «Týǵan jerge týyńdy tik» atalymdaryna Nurseıit, Núsipov, Eskendirov, Qasymov, Topaev otbasylary ıe boldy.
Birinshi oryndy Aıyrtaý aýdanynyń namysyn qorǵaǵan Ýshakov, al ekinshi, úshinshi oryndardy Mashıkov pen Shatarbaı otbasylary jeńip aldy.
Gran-prı bas júldesi ýálıhanovtyq Muhamedııarovtar otbasyna tapsyryldy. Otaǵasy Bolat Qazyuly energetıka salasynda 31 jyl eńbek etken. Ol qudaı qosqan qosaǵy Mafrýza ekeýi alty ul tárbıelep ósirgen. Bir uly «Shabyt» halyqaralyq festıvaliniń laýreaty. Bir uly Birjan sal atyndaǵy mýzykalyq kolledjdiń dırektory. Qalǵan uldary men nemereleri de shetinen ónerli, ánshi, bıshi, kúıshi.
«Otbasylardyń qaı-qaısysy bolsyn qurmetteýge ábden laıyq. Meni basqa ulttyń eki balasyn baýyryna basqan Topaevtar otbasynyń ismerlikpen aınalysatyny, ulttyq buıymdar jasaıtyny qatty qyzyqtyrdy. Bir shańyraq astynda shırek ǵasyrǵa jýyq tútin tútetip kele jatqan Qanafınder tórt jetim balany tárbıelep otyr. Ońtústikten kóship kelgen Nurseıitter otbasy orys mektebinde qazaq synyptarynyń ashylýyna uıytqy bolǵan. Erli-zaıyptylar ustaz bolsa da, qosalqy sharýashylyqpen aınalysady», deıdi isker áıelder assosıasııasynyń tóraıymy, qazylar alqasynyń múshesi Baqytjan Sámıeva.
Jeńimpazdar men júldegerlerge baǵaly syılyqtar tartý etildi.
