Kosovonyń arnaıy qaýipsizdik kúshteri (ROSU) 28 mamyr kúni tańerteń uıymdasqan qylmys pen kontrabandaǵa qarsy reıd júrgizý jeleýimen ólkeniń soltústigindegi serbter turatyn aýdandarǵa basyp kirdi. Shamamen 200 jaýyngerden quralǵan, 73 brondalǵan kólik jumyldyrylǵan operasııa alty saǵatqa sozylǵan. Arnaıy jasaqtyń bul áreketine jergilikti turǵyndar narazylyq tanytyp, Zýbın-Potok jáne Kosovska-Mıtrovısa mýnısıpalıtetterinde barrıkadalar ornata bastady. Sondyqtan Kosovo polıseılerine kúsh qoldanýǵa týra kelip, jolyna bóget qylyp qoıǵan júk kólikterin túgel ysyryp tastaǵan, sońy atysqa ulasqan. Nátıjesinde 30-ǵa jýyq adam ustalǵan. Olardyń deni – serbter, arasynda biren-saran albandar da bar. Kosovo astanasy Prıshtınadan uıymdasqan qylmysqa, korrýpsııaǵa qatysy bar degen kúdikpen 19 quqyq qorǵaý organynyń qyzmetkeri ustalǵany habarlandy. Sondaı-aq Kosovodaǵy ýaqytsha ákimshilik isteri jónindegi mıssııamen júrgen BUU-nyń eki qyzmetkeri ustalǵan. Onyń bireýi – reseılik Mıhaıl Krasnoshekov. Ol keıin bosatyldy.
Serbııa prezıdenti IIM áskeri men arnaıy jasaqtaryn tolyq jaýyngerlik ázirlikke keltirýdi buıyrǵan. Jáne mundaı jaǵdaılar tyıylmaıtyn bolsa, ony jaýapsyz qaldyrmaıtynyn eskertken. Serbııa úkimetiniń ókili Marko Dıýrıch Kosovo polısııasy óńirdegi beıbit halyqtyń shyrqyn buzdy, etnıkalyq serbterdi qýyp shyǵarýǵa árekettendi dep aıyptady.
Al Kosovonyń premer-mınıstri Ramýsh Haradınaı Twitter-degi paraqshasynda azamattardy tynyshtyq saqtaýǵa shaqyryp, respýblıkanyń soltústigindegi operasııa uıymdasqan qylmysqa qarsy jáne polısııa men keden organdardaryn tekserý maqsatynda júrgizilgenin málimdedi. Sondaı-aq Serbııa úkimetinen bul is-sharaǵa qarsy kúsh jumsamaýyn surady.
Qalaı degenmen de Kosovo polısııasynyń atalǵan reıdi shıelenisken jaǵdaıdy ýshyqtyrdy. Buǵan deıin de osyndaı arandatýshylyq áreketter oryn alǵan. Onyń ústine dál osy oqıǵadan bir kún buryn Serbııa prezıdenti Aleksandr Výchıch parlament minberinde eki saǵat sóz sóılep, Kosovonyń ýystan shyǵyp ketkenin moıyndaıtyn kez kelgenin málimdegen. Ol búginde Kosovo Belgradtyń qadaǵalaýynda emestigin aıtyp, depýtattardy shyndyqqa týra qaraýǵa shaqyrdy. «Serbııanyń iri ulttyq jeńiliske ushyrap, terrıtorııasynyń bútindigin saqtaı almaǵanyn, edáýir ekonomıkalyq shyǵynǵa tap bolǵanyn moıyndaý qajet. Kosovo men Metohııanyń ústinen bizdiń úkimet bılik júrgize almaıdy. Budan ári óz-ózimizdi aldarqatýdy, óz qoǵamymyzdy soǵan sendirýdi toqtatýymyz kerek. Onsyz biz bul aımaqtaǵy serbterdiń qandaı jaǵdaıda ekenin naqty bile almaımyz», dedi prezıdent.
A.Výchıchtiń aıtýynsha, Kosovo problemasyn sheshýdiń eki joly bar. Biri – osylaı kvo-mártebesin, ıaǵnı qatyp qalǵan qaqtyǵys qalpyn saqtap, ymyrasyz yryldasyp kún keshe berý. Ekinshi nusqa – Belgrad pen Prıshtına arasyndaǵy qarym-qatynasty bir qalypqa keltirý. Serbııa prezıdenti ekinshi joldy jaqtaıtynyn jetkizdi. Jáne bul jol – problemanyń jalǵyz sheshimi ekeni shyndyq. О́ıtkeni Kosovony endi qaıtarý múmkin emesi anyq. Bul A.Výchıchtiń Kosovonyń táýelsizdigin moıyndaýǵa jaqyn ekenin ańǵartady. Al Kosovo Serbııanyń býynsyz jerine pyshaq uryp, ıaǵnı soltústigindegi serbterge qysym jasap, prosesti tezdetýge asyqqan sııaqty. Buǵan deıin eki el prezıdentteri A.Výchıch pen H.Tachıdyń qatysýymen aýmaqtyń almasý yqtımaldyǵy týraly kelissózder júrgizilgen. Áńgime Kosovo Serbııaǵa serbter mekendeıtin soltústik aımaǵyn berý, al Serbııa Kosovaǵa ońtústigindegi albandar turatyn eki aýdanyn ótkizý turǵysynda bolǵan. Biraq Serbııanyń dármensizdigin paıdalanǵan Kosovo soltústiktegi serbterdi jedel ketýge májbúrleı bastaǵan sekildi.
