«Nátıjeli jumyspen qamtýdy jáne jappaı kásipkerlikti damytýdyń» memlekettik baǵdarlamasy aıasynda «Igilik», «Yntymaq», «Kásipker», «Birlik» jáne «Eginjaı» nesıe ónimderi, Agroónerkásip keshenin damytý memlekettik baǵdarlamasy aıasynda - «Yrys» jáne «Sybaǵa» nesıelik baǵdarlamalary qarjylandyrylady.
«Qazirgi ýaqytta Qordyń oblys ortalyqtaryndaǵy, sondaı-aq Nur-Sultan, Almaty, Semeı qalalarynda jumys isteıtin barlyq fılıaldarda «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda ótinimder qabyldap, nesıe berip jatyr, - deıdi «Aýyl sharýashylyǵyn qarjylaı qoldaý qory» AQ Basqarma tóraǵasy Jandar Omarov. - Baǵdarlama boıynsha nesıeler túrli maqsattarǵa jyldyq 6%-tik syıaqy stavkasy boıynsha beriledi, jyldyq tıimdi syıaqy mólsherlemesi 6,7%-ten aspaıdy. Qor óziniń nesıelik ónimderiniń kómegimen aýyl turǵyndary men aýyl sharýashylyǵy taýarlaryn óndirýshilerdiń jobalaryn túrli maqsatty baǵyttar boıynsha qarjylandyrady. Mysaly, «Igilik» baǵdarlamasy boıynsha iri qara mal, usaq mal, jylqy, túıe, qustar, bal aralaryn satyp alý qarastyrylǵan bolsa, «Birlik» baǵdarlamasy boıynsha sút qabyldaý pýnktterine arnalǵan jabdyqtar satyp alynady. «Kásipker» aýyldaǵy barlyq bıznes túrlerin damytýǵa baǵyttalǵan».
Aýyl sharýashylyǵyn qarjylaı qoldaý qory jylyna 10 myńnan astam kásipkerdi qarjylandyrady. Sonyń 80%-ke jýyǵy startap-jobalar ekenin eskersek, Qordyń qoldaýymen qanshama jańa joba júzege asyp jatqanyn ańǵarý qıyn emes.
«Qor shaǵyn nesıe berýdi bastaǵannan beri aýyl turǵyndary men aýyl sharýashylyǵy taýaryn óndirýshilerge 280 mlrd. teńgege jýyq qarjy bergen ekenbiz. Bul 150 myń nesıe degen sóz. Negizinen bular shaǵyn bızneske berildi, ıaǵnı, jeke qosalqy sharýashylyqtar men fermerlik qojalyqtar. Bank sektorymen salystyratyn bolsaq, bul segmentte Qor kóshbasshy dep aıta alamyz. Mysaly, statıstıka boıynsha ekinshi deńgeıli bankter aýyl sharýashylyǵy salasyna 490 mlrd. teńge baǵyttaǵan bolsa, sonyń tek 14,7 mlrd. teńgesi jeke tulǵalarǵa berilgen. Al, Aýyl sharýashylyǵyn qarjylaı qoldaý qory bir jyldyń ishinde 53,8 mlrd. teńgeniń nesıesin bergen. Sondaı-aq, Qordyń sharttary nesıe alýshylar úshin óte qolaıly. Bizdiń baǵdarlamalar boıynsha jyldyq ortasha syıaqy stavkasy 6%. Al, bankterde 10-16%», - deıdi «Aýyl sharýashylyǵyn qarjylaı qoldaý qory» AQ Nesıelendirý departamentiniń dırektory Gerrard Baal.
Sharty jeńil tıimdi nesıeni alýshylardyń sany jyl saıyn artyp keledi. Solardyń ishinen birqataryn naqty mysal retinde atap ótýge bolady. Aıtalyq, Qyzylorda oblysynyń Aqjarma aýylynda turatyn altyn alqa ıegeri Jeńiskúl Iztileýova Nátıjeli jumyspen qamtý baǵdarlamasyna qatysyp, «Aýyl sharýashylyǵyn qarjylaı qoldaý qory» AQ Qyzylorda oblystyq fılıaly arqyly 4 mln.teńge nesıege qol jetkizgen. Bul qarjyǵa 24 bas sıyr satyp alǵan. Qazir sıyrlarynyń sútinen paıda kórip otyr. Endi mal basyn odan ári kóbeıtpek.
Aqmola oblysynyń turǵyny Lıýbov Býgaeva óz sharýashylyǵyn damytý úshin Qordyń nesıeleý baǵdarlamalaryn birneshe ret paıdalanǵan. Kompanııamen birlese óz bıznesin júrgizý arqyly otbasyn da asyrap, aýyl turǵyndaryn da jumyspen qamtyp keledi.
«2018 jyly Zerendi aýdanyna qarasty Aıdabol aýylynyń turǵyndaryn - 24 jeke qosalqy sharýashylyqty biriktirip, «Nadejda» aýyldyq óndiristik kooperatıvin uıymdastyrdym. Sol jyly Qordan «Yntymaq» nesıe baǵdarlamasy boıynsha 8,7 mln. teńgeni nesıege alyp, oǵan kólemi 1,5 myń tonna bolatyn sút tasyǵysh kólik satyp aldym. Jańa avtokólik sútti zaýytqa jetkizý ýaqytyn qysqartýǵa, shıkizattyń ózindik qunyn tómendetýge múmkindik berdi. Munyń aldynda bizdiń ferma 500 lıtr sút óndirse, búgingi kúni óndirýshi kásiporynǵa 1,3 myń lıtr sút tapsyramyz. Qordan alynǵan taǵy bir nesıege úlken tanker-salqyndatqyshty satyp aldyq. Baǵasy - 2,8 mln. teńge, al onyń bir bóligin memleketten alynǵan sýbsıdııamen óteımiz», - deıdi Lıýbov Býgaeva.
Pavlodar oblysyna qarasty Kemeńger aýylynyń turǵyny Qaısa Aqylbekov óziniń bir tehnıkasy azdyq etkendikten Aýyl sharýashylyǵyn qarjylaı qoldaý qory arqyly taǵy bir jańa júk tıegish tehnıka satyp alǵan.
«Baǵdarlama boıynsha tegin oqyp, bıznes jospar jasaǵanda basty maqsatym aýyl turǵyndaryna kómektese otyryp, kásip isteý ekenin kórsettim. Qysta qar tazalaýǵa, jazda aýyldyń basqa da sharýalaryna taptyrmaıtyn eki júk tıegish tehnıkam bar qazir. Jyl on eki aı jumys tabylyp turady. Nesıe tólemin jarty jylda bir jaýyp otyrýdyń ózi qarjy jınaýǵa úlken kómek», - deıdi Qaısa Aqylbekov.
Bulardan basqa da myńdaǵan aýyl kásipkeri Qordan nesıe alyp, kásipterin dóńgeletip otyr. Nátıjeli jumyspen qamtýdy jáne jappaı kásipkerlikti damytý baǵdarlamasy boıynsha bıyl qarjy túskennen bastap Qor tarapynan aýyl kásipkerlerine 966 nesıe berildi. Jalpy somasy – 3,7 mlrd teńge.
Aýyl turǵyndary barlyq týyndaǵan másele boıynsha aýdandyq jumyspen qamtý ortalyǵy, Kásipkerler palatasynyń aýdandyq fılıaly, oblys ortalyǵynda ornalasqan Qor fılıaly qyzmetkerlerinen keńes ala alady. Sonymen qatar, óz suraqtaryńyzǵa 8 800 080 35 05 tikeleı jeli telefony arqyly jaýap ala alasyzdar.
