Golovkın nokaýtpen jeńdi

Soǵan oraı, dańqty sport­shy­myzǵa Tuńǵysh Prezıdent – Elbasy Nursultan Nazar­baev, Memleket basshysy Qasym-Jomart Toqaev óz qut­tyq­taýlaryn joldap, aq tilekterin jetkizdi.

El­ba­sy hatynda boks­sh­y­­nyń joǵary dárejedegi erik-jigeri men talmas rýhyn ta­nytq­anyn aıta kelip: «О́ziń­di udaıy shyńdaýyń jáne alǵa um­ty­lysyń saǵan kóptegen sport shyń­­daryn baǵyndyrýǵa múm­kindik berdi, ol qazaq­stan­dyq sport­shylardyń jańa býy­ny ú­shin úlgige aınaldy», dep atap ótken. Elbasynyń quttyqtaýyn bas­pa­sóz hatshysy Aıdos Úki­baı óziniń Tvıtter­degi paraqshasynda jarııalady. 

Al Qazaqstan Prezıdenti Q.Toqaev óziniń Tvıtterdegi paraqshasynda: «Elimizdiń maqtanyshy Gennadıı Golov­kın kezekti senimdi jeńisimen qazaqstandyqtardy qýantyp, taǵy da óziniń jigerli rýhy men sheberligin kórsetti! Jaraısyń, Gena! Qazaqstandyqtar qashan­da seni maqtan etedi! Jeńis qutty bolsyn!» dep jazdy.

Álemdik boks mamandary men jankúıerleri bul jekpe-jek­ti taǵatsyzdana kútkeni anyq. О́ıtkeni bul kezdesý Golov­­kın úshin taǵdyrsheshti aı­qas edi. Otandasymyz byltyr qyr­­­­kúıek aıynda meksıkalyq Saýl Alvaresten jeńilgennen keıin birqatar boks mamandary Golovkınniń dáýiri aıaqtalyp, budan keıingi qarsylastaryna shamasy kelmeıdi degen syńaı­daǵy pikirlerin aıtyp jatqan-dy. Bapker aýystyrǵanda da­ Golov­kınniń tarapyna­ biraz synı pikir aıtyldy. Al bul aıqas sol aıtylǵan pikir­ler­ge, otandasymyzǵa senim­siz­dik bildirgen boks jankúıer­le­rine beretin naqty jaýap bo­latyn. Boks keshine kelgen jankúıerlerdiń kóbi osy suraq­qa jaýap alý úshin kel­gen-di. Sondaı-aq osydan bir apta buryn ótken asa aýyr salmaq­taǵy brı­tanııalyq Entonı Djoshýa men meksıkalyq Endı Rýıs ara­syndaǵy jekpe-jektiń ssena­rııi qaıtalana ma eken degen oı búkil jankúıerdi Madison Square Garden arenasyna jetelegeni de belgili. Ol kezdesý de dál osy sport kesheninde ótken bolatyn. Tip­ti kanadalyq Stıv Rolls Go­lov­kınge qarsy jekpe-jek aldynda yrymǵa balap, Rýıstiń kıim aýystyratyn bólmesin de tańdap alǵanyn BAQ betterinen oqyp, kózimiz shalyp qaldy.

Jekpe-jekke toqtalar bol­saq, birinshi raýndta eki boks­shy da ańdysýmen, birin-biri baqy­laýmen júrdi. Golovkın asa sal­qyn­qan­dylyqpen qımyldap, aıaq­ta jáne qorǵanysta ábjil qımyldaıtynyn ańǵartty. Ekinshi raýndta Golovkın azdap sheginip, jekpe-jek tizginin Rollsqa berýdi jón sanady. О́z kezeginde kanadalyq boksshy bul múmkindikti utymdy paıdalanýǵa tyrysyp, Golovkınge soqqy da­ry­týǵa umtyldy. Biraq Golov­kın­­­ kanadalyq boksshynyń ózine esh­qandaı qaýqar kórsete almaıtynyn ańǵaryp, úshinshi raýndtan bastap qarsylasyn soqqynyń astyna aldy. Tipti Golovkınniń dál soqqylary Rollsty eseńgi­retip jibere jazdady. Soǵan qa­ramastan, kanadalyq boks­shy­ tó­pelegen soqqydan syty­lyp shy­ǵyp shabýyldaýǵa tyrys­ty. Al tórtinshi raýndta Golov­kınniń serııaly soqqylary Rol­lsty nokaýtqa túsirip tyndy. Bas­­­tan jáne jaqtan tıgen aýyr soqqydan keıin kanadalyq boks­shy ornynan kóterile al­ǵan joq. Bul Golovkınniń karera­syndaǵy 39-y jeńisi.

Golovkınniń bul jekpe-jek­tegi resmı gonorary 2 mıllıon dol­lar. Biraq jarnama, teletranslıasııadan túsetin tabysyn qosa eseptegende shamamen 15 mıllıon dollar shamasynda qarjy tabady. Al qarsylasy Stıv Rolls 300 myń dollar qarjyǵa keneldi. Bul soma onyń karerasyndaǵy eń kóp gonorar.

Sondaı-aq bul boks ke­shin­de Gennadııden bólek, taǵy eki otandasymyz judy­ryq­­tasty. Ekinshi orta sal­maq­ta judyryqtasatyn Álı Ahmedov jergilikti boksshy Markýs MakDenıelmen WBC International beldigi úshin synǵa túsip, jerlesimiz úshinshi raýndta tehnıkalyq nokaýtpen jeńiske jetti. Al taǵy bir jerlesimiz Baq­tııar Eıýbov amerıkalyq boks­shy Braıan Sebaloden upaı sany boıynsha jeńilip qady.

Golovkınniń bul jeńisinen keıin kóp jankúıerdiń kókeıinde «kúz mezgilinde Golovkın- Kanelo arasyndaǵy jekpe-jektiń trılogııasy bola ma?» degen suraq saırap turǵany anyq. Gennadııdiń ózi de bul aıqasqa qarsy emes eke­nin jetkizdi.

Reseılik boks sarapshysy Grı­gorı Stangrıttiń sózinshe, orta salmaq alyptarynyń kez­desýi bıyl bolmaıdy. «Golovkın men Alvares arasyndaǵy úshin­shi jekpe-jek ótetinine se­nim­dimin. Biraq kúzde ótedi degenge senbeımin. О́ıtkeni qazirgi tań­da eki boksshy da DAZN tele­serik­testigimen kelisimshartqa otyr­­ǵan soń, atalǵan telearnanyń maq­saty eki boksshynyń úshinshi jek­pe-jeginen qyrýar qarjy tabý bolatyn. Sondyqtan kezdesý ýaqytyn sozǵan saıyn jan­kúıerdiń qyzyǵýshylyǵy artyp, kóp qarjyǵa keneledi», deıdi Stan­grıt. Al Golovkınniń ózi bıyl jyl sońyna deıin úsh jekpe-jek ótkizýdi josparlap otyr.