Qazaqstan Prezıdenti shahar aktıvimen kezdesýde buǵan deıingi Nur-Sultan qalasynyń ákimi Baqyt Sultanovtyń atqarǵan jumysyna joǵary baǵa berdi.
– Qazaqstan Respýblıkasynyń Konstıtýsııasyna sáıkes, qala ákimi Baqyt Sultanovty qyzmetinen bosatý jóninde sheshim qabyldadym. Aldymen Baqyt Turlyhanulyna osyndaı tarıhı ári jaýapty kezeńde ózine artylǵan senimdi aqtap, tapsyrylǵan mindetti abyroımen atqarǵany úshin rızashylyǵymdy bildiremin, – dedi Memleket basshysy.
Qasym-Jomart Toqaev qalanyń jańa ákiminiń aldynda mańyzdy mindetter turǵanyn atap ótti.
– Nur-Sultan qalasynyń ákimi bolyp Altaı Kólginov taǵaıyndaldy. Ol uıymdastyrýshylyq qabileti men biliktiligi joǵary jas maman. Batys Qazaqstan oblysynda birneshe jyl tabysty eńbek etip, jergilikti halyqtyń aldynda zor bedelge ıe boldy. Onyń bilimi men tájirıbesin eskere otyryp, Nur-Sultan qalasynyń ákimi qyzmetine taǵaıyndaý týraly sheshim qabyldadym, – dedi Memleket basshysy.
Qazaqstan Prezıdenti halyqtyń ómir súrý sapasyn arttyrý máselesine egjeı-tegjeıli toqtaldy.
– Azamattardyń ál-aýqatyn arttyrýǵa basa mán beriletin bolady. Jaqyn kúnderi turǵyndardyń áleýmettik máselelerin sheshýge baǵyttalǵan mańyzdy sheshim qabaldanady. Bul úderisterden astanamyz qalys qalmaýy kerek. Kerisinshe, áleýmettik máselelerdi sheshý isinde aldyńǵy qatarda júrýi qajet, – dedi Qasym-Jomart Toqaev.
Jıyn sońynda Memleket basshysy jańa ákimge birqatar naqty tapsyrma berdi.
