Jalpy, ózine unaǵan sózder men turaqty sóz tirkesterin, maqal-mátelder men óleń joldaryn arnaıy qoıyn dápter arnap erinbeı jazyp júrý – kóbine yjdaǵatshyl, shyǵarmashyl adamdarǵa tán dástúr. Munyń ózi olardyń oı teńizin keship, odan injý-marjan súzip, únemi izdenis ústinde júretinin aıǵaqtaıdy. Eldiń muńy men muratyn, tili men tilegin, úreıi men úmitin, ańsary men armanyn 93 jyl boıy úzdiksiz júreginde terbetip, byltyr ǵana dúnıeden ótken qazaq sóz óneriniń alyby, akademık Shora Shamǵalıuly Sarybaev óziniń uzaq ǵumyrynda artyna osyndaı birneshe qoıyn dápter qaldyrǵan naǵyz parasat ıesi bolatyn. Búgin oqyrmanǵa jol tartqan bul jınaq solardyń ishinen iriktelip, suryptalyp alynyp, toptastyrylyp, alǵash ret kópshilikke usynylyp otyr.
Kitaptyń alǵysózin jazǵan Maıra Shoraqyzy bylaı deıdi: «Poezııa – ákemizdiń ómir boıǵy eń súıip oqıtyn janry edi jáne onyń uzaq ǵumyrynyń bólinbes bir bólshegine aınaldy. Ol osy bir ádebı janrdy janymen súıdi jáne onyń shabytty oqyrmany, jankúıer tyńdaýshysy jáne naǵyz zertteýshisi bola bildi. Onyń jeke kitaphanasynda júzdegen óleń toptamalary, gazetten jáne jýrnaldan qıyp alynǵan poezııalyq týyndylar kóptep saqtalǵan. Ony ǵylymı jáne pedagogıkalyq jumysyna derekti materıal retinde óziniń fılologııalyq sheberligin arttyrýdyń ımpýlsi jáne poetıkalyq shyǵarmashylyǵyn nasıhattaýdyń birden-bir quraly retinde paıdalandy. Poezııanyń ulttyq qundylyq retindegi rólin janymen uǵynyp, sol arqyly ómirdiń aqıqı mánin túsinýge umtyldy».
Sondaı-aq kitapshada Shora Shamǵalıulynyń óz qolymen qaǵazǵa túsirgen qoljazbalary arhıvtik qujat retinde qosymsha berilgen. Bul qujattardyń til bilimi men ǵylymy salasynda jan-jaqty jemisti qyzmeti men ǵumyrbaıany týraly zertteý júrgizgisi keletin jas izdenýshilerge negizgi qujat kózi bolyp tabylady dep oılaımyz.
