Alǵashqy qarsylastar anyqtaldy

«Astana» myqtylarmen oınaıdy

Eń aldymen Chempıondar lıga­synyń jerebesi tartyldy. 2013-2014 jylǵy maýsymnan beri Eý­rokýbok básekelerine tu­raq­ty túrde qatysyp kele jat­qan elimizdiń bes dúrkin chem­­pıony bıylǵy maýsymda Rýmynııanyń tórt dúrkin jeńim­pazy ChFR (Klýja) komandasymen kelesi kezeńniń joldamasyn sarapqa salady. Jerebe qorytyndysynan keıin otandyq fýtbol mamandary «Astanaǵa» jerebe joldas bolmaǵanyn aıtady. Qazaq fýtbolynyń ardageri Iýsýp Shadıev «Astana» aldaǵy ýaqytta daıyndyǵyn kúsheıtip, quramyn tolyqtyrmasa, Rýmynııa komandasyn jeńý qıynǵa soǵady deıdi. «Qazir Rýmynııa fýtboly qarqyndy damyp keledi. Sondyqtan «Astanaǵa» ońaı qar­sylas jolyqty dep aıta almaı­myn. Elorda komandasy el birinshiliginiń sońǵy týryn­da «Qaısardy» iri eseppen jeńge­nimen, sońǵy kezde ala-qula óner kórsetip júr. Degenmen, eki koman­danyń da múmkindikterin 50/50 dep baǵalaımyn. «Astana» úshin syrt alańdaǵy oıyn qıynǵa soǵa­dy, sondyqtan myqtap da­ıyndalý kerek», deıdi ol.

Jerebeden keıin pikir bil­dirgen ChFR komandasynyń sporttyq dırektory Bogdan Mara jerebe joldas bolmaǵanyn aıtady. «Árıne biz jerebede «Astana» men «Srvena Zvez­dadan» basqa komandany kú­tip edik. Biraq qalamaǵan ko­man­damyzdyń birine tutyldyq. Jalpy, bıylǵy jerebe biz úshin aýyr bastaldy. Endi bizdi alda óte qıyn eki match kútip tur. Sondyqtan daıyndyǵymyzdy eki ese kúsheıtýimiz kerek. «Astana­nyń» Eýropaǵa jaıylǵan dań­qyn bilemiz. Olardy kezinde Ispanııanyń azýly «Atletıko» komandasy da jeńe almaǵan. Jalpy aıtqanda, biz Eýropanyń qazirgi tańdaǵy óte myqty ujy­myna qarsylas boldyq», deıdi B.Mara.

Al «Astana» komandasynyń bas bapkeri Roman Grıgorchýk mundaı deńgeıdegi qarsylasty jeńý úshin jaqsy daıyndyq pen tolyqqandy quram qajet ekenin aıtady. «Men jerebe tartý rásimine árdaıym sabyrmen qaraımyn. Sońǵy ýaqytta meniń komandama yqtımal qarsylastardyń eń myqtylary tap kelýde. Osy jyly da sol úrdis jalǵasyn tapty. Bizge mundaı deńgeıdegi qarsylasty jeńý úshin jaqsy daıyndyq jáne tolyqqandy quram qajet. Degenmen, rýmyndarǵa qarsy kezdesýge deıin biz chempıonat aıa­synda mańyzdy úsh oıyn ótki­zemiz. Dál qazir bar kúshti sol oıyndarǵa salýymyz kerek», deıdi bas bapker.

Endi eki komanda týraly az-kem statıstıkany sóıletsek. ChFR komandasy qazirgi tańda ÝEFA reıtınginde 110-orynǵa taban tiregen. Germanııanyń «transfermarkt.de» saıtynyń aqparaty boıynsha, komandadaǵy fýtbolshylardyń jalpy quny 25,45 mln eýro. Quramnyń orta jasy – 27,9 jas. ChFR óz eliniń jáne Rýmynııa kýbogynyń 4 dúrkin chempıony. Sondaı-aq 3 ret Sýperkýbokta top jarǵan. Al «Astana» komandasy ÝEFA reıtınginde 57-orynda tur. Fýt­bolshylardyń jalpy quny – 23,73 mln eýro. Orta jasy – 26,8 jas. Eki klýb arasyndaǵy alǵashqy kezdesý 9 shilde kúni Nur-Sultanda, qarymta match bir aptadan soń syrt alańda ótedi.

Qarsylastardyń deńgeıi birdeı

Chempıondar lıgasy jere­besiniń izin ala Eýropa lıgasynda baq synaıtyn koman­dalarymyzdyń qarsylas­tary anyqtaldy. Qazaq fýtbolynyń ardageri Pavel Evteevtiń sózinshe, qazaqstandyq komandalarǵa jerebe jaqsy túsken. «Menińshe, «Astanaǵa» qaraǵanda, Eýropa lıgasynda oınaıtyn komandalarǵa jeńil qarsylastar tústi. Kezdesý eki oıynǵa sozylatyn bolǵan soń, elimizdiń komandalary esh qıyndyqsyz kelesi kezeńge ótedi dep senemin. Bárinde kelesi kezeńge ótýge múmkindik bar», deıdi P.Evteev.

Eýropa lıgasyndaǵy otandyq komandalardyń qarsylastaryn tanystyryp ótsek.

«Qaırat». Eýropa lıga­sy­nyń alǵashqy irikteý keze­ńinde Almatynyń komandasy bosnııalyq «Shırokı-Brıeg» komandasymen kúsh synasady. Jalpy, bosnııalyq klýb qazaqstandyq fýtbol jan­kú­ıerlerine jaqsy tanys. Eýro­pa lıgasynyń 2013-2014 jyl­ǵy maýsymynda Pav­lo­dar­dyń «Ertisimen» kezde­sip, eki oıyn qorytyndysy bo­ıynsha 4:3 esebimen basym túsken. Araǵa úsh jyl salyp 2017-2018 jylǵy maýsymnyń alǵashqy irikteý kezeńinde Shym­kenttiń «Ordabasy» koman­dasymen joly túıisti. Bul joly da eki oıyn qorytyndysy boıynsha «Shırokı-Brıegtiń» mereıi ústem bolǵan. Endi mine, bosnııalyq klýb qazaqstandyq komandamen úshinshe ret kez­deskeli tur. Osy matchta «Qaı­rat» «Shırokı-Brıegtiń» je­ńis­ti jolyna núkte qoıady dep senemiz. Jalpy, «Shırokı-Brıeg» Eýrokýbok dodalaryna jyl saıyn qatysady. Biraq qazirge deıingi eń úzdik nátıjesi úshinshi irikteý kezeńine joldama alýy. 1948 jyly qurylǵan komanda el chempıonatyn nebári eki ret utqan.

«Tobyl». Qostanaıdyń komandasy Eýropa lıgasynyń alǵashqy irikteý kezeńinde Lıýk­sembýrgtiń «Jeness» klýbymen kezdesedi. «Jeness» óz eliniń 28 dúrkin jeńimpazy. Sońǵy ret 2010 jyly top jarǵan. Eýrododa oıyndaryna ótken ǵasyrdyń 60-jyldarynan bastap qatysqanymen, ekinshi irikteý kezeńinen ary asyp kórmegen. Bylaısha aıtqanda, tómen deń­geıdegi komanda. Jalpy, «To­byl» kelesi kezeńge esh qıyn­dyqsyz ótýi kerek.

«Ordabasy». Shymkenttik komanda Eýropa lıgasyna bıyl besinshi ret qatysyp otyr. Buǵan deıin Serbııa, Norvegııa, Izraıl jáne Bosnııa jáne Gersegovına eliniń komandalarymen oınasa, bıyl Grýzııanyń «Torpedo» komandasymen kezdesedi. Jal­py, «Torpedo» klýby da qazaq­standyq komandalarǵa bóten emes. Eýropa lıgasynyń 2012-2013 jylǵy maýsymynda «Aqtóbe» komandasymen kez­desip, eki oıyn qorytyndysy boıynsha 1:2 esebimen jeńilip qalǵan. О́z eliniń tórt dúrkin jeńim­pazy sanalatyn «Torpedo» byltyr Eýropa lıgasynyń pleı-off kezeńine deıin jetken. Bul komanda «Ordabasy» úshin asa qıyn qarsylas emes, degenmen fýtbol boljaýǵa kelmeıtin oıyn ekenin eskerý kerek.

Qoryta aıtqanda, aldaǵy kezdesýlerdiń qandaı nátıjemen aıaqtalatynyn boljam emes, ýaqyt kórsetedi. Degenmen, «As­tana» klýbynan basqa Eýro­maýsymǵa qatysqaly turǵan úsh klýbymyzdyń qarsylastary ózderimen deńgeıles klýbtar. Eýropa jasyl alańdarynda el namysyn qorǵaıtyn koman­dalarymyzǵa jeńis tilep, sáttilik serik bolsyn deımiz.