2018 jylǵy respýblıkalyq bıýdjettiń oryndalýy týraly baıandaı otyryp, QR Premer-Mınıstriniń birinshi orynbasary – qarjy mınıstri Álıhan Smaıylov 2018 jyldyń bıýdjettik saıasaty memlekettik qarjynyń turaqtylyǵyn nyǵaıtýǵa jáne ekonomıkany odan ári damytýǵa baǵyttalǵanyn atap ótti.
Bıýdjet qarajattaryn jumsaýdyń basym baǵyttary — ekonomıkanyń naqty sektoryn qoldaý, jumys oryndaryn saqtaý jáne áleýmettik salany damytý boldy. 2018 jyldyń qorytyndysy boıynsha ekonomıka ósimi 4,1% qurady. Bıýdjetke 8,8 trln teńge túsim tústi. Shyǵystar boıynsha oryndalýdyń joǵary paıyzy qamtamasyz etildi – 99,8%.
«Bıýdjettiń áleýmettik baǵyttylyǵy saqtaldy. Atalǵan maqsattarǵa barlyq shyǵyndardyń jartysyna jýyǵy paıdalanyldy, ıaǵnı bul – 4,3 trln teńge. Áleýmettik kómek pen áleýmettik qamsyzdandyrýǵa 2,6 trln teńge bólindi. Bıýdjetten 3 mln 530 myń adamǵa zeınetaqy men járdemaqylar tólendi», — dedi Á. Smaıylov.
Otyrys barysynda QR Parlamenti Senatynyń depýtaty S. Plotnıkov, QR Parlamenti Májilisiniń depýtaty Q. Jabaǵıev memlekettik baǵdarlamalardy iske asyrý, respýblıkalyq bıýdjetti atqarý, sondaı-aq, otandyq avtoónerkásipti damytý máselelerin qozǵady.
QR Premer-Mınıstri A. Mamın bıýdjetti josparlaýdyń tıimdiligin odan ári arttyrý jáne tolyqtaı ıgerýdi qamtamasyz etý maqsatynda osy jyldyń sońyna deıin engiziletin birqatar reforma daıyndalyp jatqanyn atap ótti.
Avtoónerkásipti damytýǵa qatysty, QR Úkimetiniń basshysy osy jyldyń bes aıynyń qorytyndysy boıynsha avtoónerkásiptiń 46%-ǵa óskenin málimdedi. Búginde avtoónerkásip salasy Qazaqstanda ekonomıkanyń negizgi draıverine aınalýda. О́tken jyly 30 myńǵa jýyq avtokólik shyǵaryldy, bıyl 50 myńnan astam avtokólik shyǵarý kózdelgen.
2021 jylǵa qaraı jergiliktendirý deńgeıin 50% deıin jetkizý jumystary júrgizilýde. Avtonesıelendirý aıasynda qoljetimdilikti arttyrý maqsatynda ótken jyly 3 myńǵa jýyq avtokólik qarjylandyryldy.
Bıyl Ulttyq Bankpen birlesip nesıelendirý kólemin 15 myń avtomobılge deıin jetkizý josparlanǵan. Otandyq avtomobılderdi satyp alý boıynsha nesıelendirý kólemi bes esege arttyrylady.
«Bul óndiristi damytý úshin tıisti serpin beredi, al Qazaqstan azamattary avtokólik satyp alý úshin jeńildikpen qarjy quralyna ıe bola alady. Bul jerdegi dınamıka jaqsy, ony arttyratyn bolamyz», — dep jaýap berdi Premer-Mınıstr.
Otyrys sońynda Premer-Mınıstr A. Mamın depýtattarǵa birlesken tıimdi jumysy, Úkimettiń 2018 jylǵy respýblıkalyq bıýdjettiń oryndalýy týraly esebin tyńdaý boıynsha ashyq ári syndarly usynystary úshin alǵys bildirdi.
«Depýtattar kótergen barlyq saýaldar, eskertýler men usynystar boıynsha naqty jumystar uıymdastyrylady. Qajetti sharalar shuǵyl qabyldanady», — dedi A. Mamın.
Sonymen qatar QR Parlament Palatalarynyń birlesken otyrysynda 2018 jylǵy respýblıkalyq bıýdjettiń oryndalýyn baqylaý jónindegi Esep komıtetiniń esebi jarııalandy.
Esep komıtetiniń tóraǵasy Natalıa Godýnova 2018 jyly respýblıkalyq bıýdjettiń oryndalýy Úkimettiń Parlament pen Esep komıtetiniń ótken jylǵy usynystaryn eskerýmen bıýdjet prosesinde júrgizgen aýqymdy ózgeristeriniń aıasynda ótkenin aıtty.
«О́tken jylǵy qarastyrý qorytyndysy boıynsha Esep komıtetiniń Úkimet pen memlekettik organdarǵa bergen usynystar qatarynan 72%-y iske asyrylǵan jáne oryndalý satysynda, bul bıýdjettiń oryndalýy boıynsha jaǵdaıdy jaqsartýǵa septigin tıgizdi. Bıýdjetke 2 ese az túzetýler engizildi, bıýdjet qarajatyn tıimsiz paıdalaný 4 esege derlik tómendedi, oń dınamıka nyǵaıdy», — dedi N. Godýnova.
