Jańa ákimdi qala aktıvine arnaıy tanystyrǵan aımaq basshysy onyń aldaǵy jumysyna sáttilik tileı otyryp, qyzmet barysynda Elbasy bekitken baǵdarlamalardy sapaly júzege asyrý qajettigin aıtty.
- Qalada turǵyn úımen qamtý, kóp balaly analardyń áleýmettik jaǵdaıyna ońdy yqpal etý, ekologııalyq jaǵdaıdy qalypqa keltirý boıynsha, júıeli jumystar júrgizilýde. Qala turǵyndarymen aýyzbirshilikte jumys jasaıdy dep senemin, jańa ákim osy baǵyttaǵy jumystardy jedeldetip, sapaly túrde atqarý qajet, -dedi Ońdasyn Orazalın.
Mavr Erǵalıuly Abdýllın 1973 jyly týǵan. Batys Qazaqstan aýyl sharýashylyǵy ınstıtýtyn ekonomıst-menedjer mamandyǵy boıynsha bitirgen. Oıyl aýdandyq mádenıet bóliminiń meńgerýshisi, Oıyl aýdany ákiminiń orynbasary, oblystyq aýyl sharýashyǵy basqarmasy basshysynyń orynbasary, Oıyl, Alǵa aýdandarynyń ákimi qyzmetterin atqardy.
Oblys ákimi Aqtóbe qalasyn 3 jyl basqarǵan Ilııas Ispanovtyń qalanyń damýyna qosqan úlesin, áleýmettik-ekonomıkalyq jaǵdaıyn kóterýge atsalysqany úshin alǵysyn bildirip, jańa qyzmetine sáttilik tiledi.
