Batqan kemeniń beıbaqtary
Seısenbi, 9 sáýir 2013 2:20
Qazirgi kúnderi batyp bara jatqan kemeniń ishinde alasuryp, buryshtan buryshqa qashyp júrgen atjalmannyń keıpin keltiretin BTA-Banktiń bir kezdegi dırektorlar keńesiniń tóraǵasy Muhtar Ábilázov pen onyń sybaılas jemqorlyq sıpatyndaǵy sarbazdaryn burynǵydan beter tuıyqqa tireıtin taǵy bir oqıǵa oryn aldy. Bul atyshýly «Álı baba jáne onyń qyryq qaraqshysy» atanǵan komandaǵa jyǵylǵan ústine judyryq bolyp tıip jatyr.
Seısenbi, 9 sáýir 2013 2:20
Qazirgi kúnderi batyp bara jatqan kemeniń ishinde alasuryp, buryshtan buryshqa qashyp júrgen atjalmannyń keıpin keltiretin BTA-Banktiń bir kezdegi dırektorlar keńesiniń tóraǵasy Muhtar Ábilázov pen onyń sybaılas jemqorlyq sıpatyndaǵy sarbazdaryn burynǵydan beter tuıyqqa tireıtin taǵy bir oqıǵa oryn aldy. Bul atyshýly «Álı baba jáne onyń qyryq qaraqshysy» atanǵan komandaǵa jyǵylǵan ústine judyryq bolyp tıip jatyr.
Álbette, biz basqasha bir jaǵdaı bolsa, jyǵylyp jatqanǵa bulaısha kúlmegen bolar edik. Al myna jaǵdaı – tipti de bólek. Bul eldegi erteli-kesh belin jazbaı eńbek etken qarapaıym halyqtyń taban aqy, mańdaı terinen quralǵan adal aqshasyn qoparyp alyp ketken qaraqshylyqty taıǵa tańba basqandaı etip kórsetip turǵan kórinistiń keskini bolyp tabylady. Bul – eldi tonaýshylyqtyń ózgeshe bir úlgidegi dáıekti deregi.
Al qara qyldy qaq jaratyn qazylar toby Albıon jerinde de bar eken. Anglııanyń Joǵarǵy soty atalmysh noıandarǵa qarsy prosess júrgizý barysynda kezekti isti eshbir bultaryssyz taǵy da BTA-Banktiń paıdasyna sheship berdi. Bul joly «Drey isi» (nemese «DCM isi») degen atpen belgili bolǵan qylmystyq isti talqylaý sheńberinde másele qaraǵan sot M.Ábilázovten 2 mlrd. AQSh dollary kólemindegi qarajatty ústeme paıyzymen qosyp óndirip alýǵa úkim etti. Sot, sondaı-aq, osy istiń aıasynda banktiń burynǵy basqarma tóraǵasy Roman Solodchenkodan 400 mln. dollar mólsherinde tólem óndirý jóninde uıǵarym jasady.
Sýdıa Naıdjel Tır shyńyraý túbinen shyndyqty izdeý barysynda budan da ary ketti. Ol «Drey», «Granton» jáne «Vıtıno» dep atalǵan isterdi qaraýdyń nátıjesinde qazaqstandyq BTA-Banktiń joǵarydaǵy jemqor jylpostardyń arqasynda qoldy bolyp, qyr asyp ketken qyrýar aqshasynyń izin tap bastyrmaı taýyp, olardy qaıtarýdyń joldaryn qarastyrdy. Atap aıtqanda, bank basqarmasy tóraǵasynyń orynbasary bolǵan Jaqsylyq Járimbetovke shamamen 1,5 mlrd. dollar kólemindegi qarjyny paıyzdyq ústemesimen qaıtarýdy mindettedi. Sot nazarynan Kıprdiń osy obyrlar tobyna qyzmet kórsetken «Usarel Investment Limited» dep atalatyn kompanııasy da shet qalǵan joq. Ol osy qyzmeti arqasynda asa qundy aktıv – Reseıdiń Aq teńizdegi Vıtıno portyna ıelik etip qoıǵan eken. Femıdanyń bezbenin berik ustaǵan aǵylshyn sýdıasy taǵy tyrs etkizgen joq, sózge kelmesten kompanııanyń osy jónindegi aksııalaryn onyń zańdy ıesi – BTA-Bankke qaıtarýdy júktedi. Ol, sonymen birge, mundaı aksııalardyń quny 120 mln. dollardan aspaıtyn bolsa, olarǵa paıyz qosyp tóleýdi tapsyrdy. Sot qaraǵan osy iste banktiń Máskeýdegi burynǵy ókili Ildar Hajaevqa qatysty da tarmaqtar bar. Ol joǵarydaǵy Vıtınoǵa baılanysty biraz tólemdi úıirimen úıip qaıtarýǵa tıisti.
Sýdıa Naıdjel Tır isterdi qaraý qorytyndysynda BTA-Bankke asa iri kólemdegi tıesili aqshalaı qarajattaryn qaıtarýǵa sheshim shyǵarý arqyly onyń talap-aryzyn tolyǵymen qanaǵattandyryp qana qoıǵan joq, ol, sonymen birge, Ábilázov pen onyń Járimbetov, Hajaev jáne basqalary sekildi sybaılas sıpattaǵy kómekshileriniń jeke bastarynyń múddeleri maqsatynda alaıaqtyq operasııalardy qalaı jáne qashan oryndaǵandaryn óte jiti tekserip, jeke-jeke uıǵarymdar jasap shyqty. Sot sondaı-aq bank aktıvinen zańsyz jolmen shyǵarýdyń alaıaqtyq mazmundaǵy operasııalary nysanasyna aınalǵan qarjylardyń elge tolyq qaıtarylýyn da budan ári udaıy qadaǵalap otyratynyn tanytyp otyr. Al BTA-Bank burynǵysynsha Anglııadaǵy, TMD elderi men basqa da memleketterdegi Ábilázov pen onyń komandasy áketken kóp qarjysyn qaıtaryp alý prosesine belsene qatysyp turatyn bolady.
Osymen, Ábilázov pen onyń qaraqshylaryna qatysty taǵy bir qamal alyndy. Uıattan jurdaı ujdansyz urlyqtyń taǵy bir temir qorǵany buzyldy.
Ázirge osymen sóz támam.
Jyry uzaqqa sozylǵan bul hıkaıanyń jalǵasyn keler joly aıtyp berermiz. Batqan kemeniń beıbaqtary týraly áńgime munymen bitpeıdi.
Rýslan IGILIK.
