Ekspedısııa baǵyty erkindikke jiberilgen búrkitter mekendeıtin Almaty oblysynyń aýmaǵyndaǵy Arqarly men Malaısary, Úlken jáne Kishi Buǵyty, Sógeti taýlaryn, Toraıǵyr men Sharynnyń joǵarǵy bóligin qamtydy.
Esep boıynsha bul aýmaqta búgingi tańda 36 búrkit bar eken. Mamandar 14 tastúlek pen muzbalaqty jáne 11 jupty tirkegen.
– Birinshi kezeńde Jońǵar Alataýynyń silemderi zertteldi. Saparymyz bastalǵannan keıingi birneshe kún ishinde eki búrkit jubyn anyqtadyq. Ekinshi kezeńde Ile Alataýy aýmaǵyn jáne alty jyl boıy búrkitter erkindikke jiberilgen Almaty oblysynyń jerlerin qarap shyqtyq. Tekserilgen telimderde biz tastúlekterdi de, uıa salatyn búrkitterdi de kezdestirdik, – deıdi top jetekshisi, ornıtolog Sergeı Shmygalev.
Ekspedısııa Qazaqstanda 2012 jyly qolǵa alynǵan «Úlesińdi qos. Tabıǵatty aman saqtap qal» atty «Efes Qazaqstan» kompanııasy jobasynyń aralyq qorytyndysyn shyǵaryp otyr. Osy aralyqta «Suńqar» tálimbaǵynda 25 búrkit balapany ósirilip, tabıǵat aıasyna jiberildi.
Qazaqstan aýmaǵynda mekendeıtin búrkitterdiń sanaǵy sońǵy ret 7 jyl buryn eseptelgen eken. Esepteý nátıjesi men ornıtologterdiń baǵalaýynsha 2012 jyly búrkitterdiń popýlıasııasy azaıǵan, Almaty oblysynyń Úlken jáne Kishi Buǵyty aımaǵynda bar-joǵy 4-5 jup qana qalǵan bolatyn.
– Kóp jyl boıǵy eńbegimizden osyndaı tamasha nátıje shyqqanyna asa qýanyshtymyz. 2012 jylmen salystyrǵanda qazir uıa salatyn búrkit juptarynyń birneshe ese óskeni anyqtalyp otyr. Qazaqstannyń memlekettik baıraǵynda beınelengen ulttyq nyshandy saqtap qalý – bizdiń kompanııanyń korporatıvtik áleýmettik jaýapkershilik salasyndaǵy basym mindetteriniń biri, – deıdi «Efes Qazaqstan» AQ korporatıvtik qatynastar departamentiniń dırektory Shyńǵys Qaskeev.
Búrkitterdi qorǵaýǵa arnalǵan baǵdarlama ári qaraı da júzege asyryla bermek.
ALMATY
