Aǵylǵan kómekte esep joq

24 myńnan asa adam evakýasııalanǵan ortalyqtarda sábılerdiń jan dúnıesindegi soqqyny emdegen geshtalt-terapevt psıhologtar qazir sol jerde emdik sharalardy jalǵastyrýda. Búgingi tańda turǵyndardyń bastan keshken emosııalaryn zertteý, bolǵan oqıǵany túsindirý psıhologtardyń negizgi terapııasy bolyp otyr.

Sondaı-aq eriktiler halyq arasynda «bakterıologııalyq qarý-jaraqtan, radıasııadan jáne apattan kóptegen adam qaıtys boldy» degen aqparattyń jalǵan ekenin túsindirip júr. Áleýmettik jelilerde jurtty dúrliktirgen «Arystyqtar dalada bosyp júr. Olarǵa azyq-túlik jetpeı jatyr» degen aqparat shyndyqqa janaspaıdy.

Sebebi apattan zardap shekken arystyq­tarǵa Qazaqstannyń túkpir-túkpirinen kómek kelýde. «Arys, biz birgemiz!» aksııasy búkil respýblıka boıynsha uıymdastyryldy.

Jergilikti bılik ókilderi sol kómekti ret-retimen qala turǵyndaryna úles­tirýde. Al baspanasyz qalǵan turǵyndar­dy ýaqyt­sha qonystarǵa ornalastyrý bo­ıynsha júıeli jumys jolǵa qo­ıyl­ǵan. Arys qalasyndaǵy Erejepbaı Mol­­dabaev atyndaǵy orta mektepte tur­ǵyndar ýaqytsha qonystanatyn 800 oryn daıyndaldy. Munda jarylys saldarynan úıleri tolyq buzylǵan jáne jaramsyz kúıge túsken turǵyndar ornalasýda. Bul ortalyqta qonystanýshylar 3 mez­gil tamaqpen jáne jatyn oryndar­men qamtyldy. Balalarǵa arnalǵan oıyn alańshalary da qarastyrylǵan. Al jary­­lys­tan zaqym kelgen úıler tolyq jón­del­gen soń turǵyndar óz shańyraq­taryna oralmaq.

Arys qalasyndaǵy jarylystan zardap shekken turǵyndarǵa jan-jaqtan kelip jatqan gýmanıtarlyq kómek kún sanap ulǵaıýda. Búgingi kúnge deıin qoımaǵa 270 tonna qajetti azyq-túlik ónimderi, kıim-keshek, gıgıenalyq zattar jınalsa, sonyń 198 tonnasy turǵyndarǵa berildi. Gýmanıtar­lyq kómektiń 70 tonnasy keshe taratyldy. Qosymsha Arysqa qaraı 10 júk kóligi kele jatqanyn aıta keteıik.

Kúni keshe Qaraǵandy, Jambyl, Qyzylorda, Aqtóbe, BQO, SQO, Pavlodar, Qos­tanaı, Almaty oblystary men Almaty jáne Shymkent qalalarynan Arysqa jiberilgen 150 tonna zattyń 80 tonnadan astamy turǵyndarǵa taratyldy. Nur-Sultan qalasy men ózge de aımaqtardan azyq-túlik tıelgen júk kólikteri Arysty betke aldy.

Arystaǵy tótenshe jaǵdaıǵa baılanysty «Túrkistan» korporatıvtik áleýmettik damý qory­na túsken qarjy kólemi 1 mlrd teńgeden asty. Qor áli de shotta jınaqtalyp, arnaıy ko­mıs­sııa arqyly turǵyndarǵa beriletin bolady.

Qaladaǵy barlyq úıge sýyq sý keldi. Alaıda keshe ortalyq jelide shyqqan aqaýdan 1500-deı abonent ýaqytsha sýsyz qal­ǵan edi. Jóndeý jumystary barysynda sý jetkizý jelisin úzgen snarıad tabyldy. Aqaýdy jóndeý jumystary aıaqtalǵan soń turǵyndarǵa sý turaqty berile bastady.

30 maýsym kúni Arys qalasynyń 140 oqý­shysy Aqmola oblysyndaǵy Býrabaıǵa oqý­shy­lar lagerine demalysqa ketse, 200 oqý­shy Nur-Sultan qalasyna jol júrdi. Olar­dyń qaýip­sizdigine tálimgerler jaýap beretin bolady.

Arystyq balalardy demalysqa jiberýdegi basty maqsat – tótenshe jaǵdaı faktorlary saldarynan mektep oqýshylaryna psıhologııalyq kómek kórsetý. Osy oraıda jıyny 340 oqýshyny ata-analary Shymkent qalasyndaǵy temir jol vokzalynan shyǵaryp salyp, sát-sapar tiledi.

Aıta keteıik, Arys qalasyndaǵy 40 mektepte 19 916 bala bilim alady, mektepke deıingi uıymdarda 5071 bala tárbıelenip jatyr. Jalpy, búgingi kúnge deıin arystyq 570 bala jazǵy saıahatqa jiberildi.