Naqtyraq aıtar bolsaq, bıletterdi satýda alaıaqtyqtyń joly kesilip, ıaǵnı ańdyp otyryp bosaǵan bıletti «ustap alý» endi múmkin bolmaıdy.
«1 shildeden bastap bılet satý júıesiniń damyǵan túri paıdalanylyp jatyr. Jańa júıeniń basty ereksheligi – bul alypsatarlarǵa qarsy qoıylǵan bóget. Eki aptadan keıin alǵashqy nátıjelerin baǵalaıtyn bolamyz», deıdi «Jolaýshylar tasymaly» AQ resmı ókili Dıas Ahmetshárip.
Onyń aıtýynsha, «Jolaýshylar tasymaly» AQ-na qarasty 233 kassa bolsa, bılet satatyn jekemenshik 4500-den astam kassa jáne taǵy 4000-nan astam óz betinshe qyzmet etetin termınal bar eken. Sonymen qatar on shaqty ınternet resýrs ta bılet satýmen aınalysady. Bulardyń ishinde komıssııasyz bılet satatyn resmı epay.railways.kz jáne bilet.railways.kz saıttary bar.
«Júıeniń jumys isteý prınsıpine toqtalar bolsaq, eger kassır otyz sekýndtyń ishinde bes ret qatarynan bir tıpti, ıaǵnı bir baǵyttaǵy bıletti izdese, onda onyń kassasy bes mınýtqa jabylady. Úsh ret tapsyrys bergen kezde júıe eskertý jasaıdy. Demek, bir baǵytta ár ýaqytta bir tapsyrysty bere berýge bolmaıdy. Bul júıe buryn bylaı isteıtin edi. Jeke kassalarda otyrǵan kassırler bir tapsyrysty qaıtalap bere beredi de, aınalymǵa túsken bos bıletti ustap alady. Sosyn ony alyp óziniń sybaılasyna satyp jiberip, olar basqa bir qujattarmen birneshe bılet satyp alady da, artynan vokzalda jolaýshylarǵa qymbatqa satady. Endi jańa júıe boıynsha mundaıǵa jol berilmeıdi», deıdi Dıas Ahmetshárip.
Júıeniń ekinshi artyqshylyǵy – elektrondy kútý kezegi. Eger belgili bir baǵytqa bılet bolmasa, jolaýshy kassaǵa júginip, óziniń qujattaryndaǵy málimetterdi qaldyryp, elektrondy kezekke turady. Munda sizdiń málimetterińizdi keıin kassır ózi ózgertip basqa adamnyń málimetterin tirkeı almaıdy. Siz kezekke turǵannan keıin atalǵan baǵytta jańa bıletter shyǵyp jatsa, júıeden jolaýshynyń elektrondy adresine avtomatty túrde habarlama keledi. Eki saǵattyń ishinde álgi bılet elektrondy kezekte kezegi kelip turǵan adam satyp ala alady. Bir aıta keterligi, siz bıletti satyp alý úshin elektrondy kezekke turǵan kassaǵa barýyńyz mindetti emes, kez kelgen bılet satatyn jerden ala beresiz.
Bul júıeniń tehnıkalyq máselelerine jaýapty qazaqstandyq IT kompanııa ókili Mádına Jańabaevanyń aıtýynsha, bılet satýmen aınalysatyn birneshe mekeme bar. Solardyń catqan bıleti bılettiń bekitilgen baǵasymen birdeı ekenin, ıaǵnı jolaýshyny artyq tóletpeı jatqanyn anyqtaý úshin júıeden baǵany tekserip, bılettiń qashan jáne qaıda rásimdelgenin de kórýge bolady.
Sonymen qatar júıede alynǵan bıletterge analız jasaý qyzmeti de bar. Bul da bılet alypsatarlarynyń jolyn kesetin qural. Aıtalyq, áldebir adam bireýge bılet satyp alyp berý úshin ústine aqsha qosyp satatyn bolsa, júıe onyń bul áreketterin tanyp, keıin qulyptap tastaıdy.
Baýyrjan MUQAN,
«Egemen Qazaqstan»
