Qol-aıaǵyn qımyldata almaıtyny, aıaq-qoly shyntaq pen tizeden tómen qaraı damymaı qalǵany ómirge kele salysymen belgili bolǵan. Ata-anasy: «Ortalyqta júrse qatarǵa qosylyp kete me?» degen úmitpen Gaznı provınsııasynan Kabýlge qonys aýdarady.
«Kabýldegi medısına taǵdyrǵa moıynsunýdan basqa amalyń joq» degennen ári asa almady. Al men moıynsunǵym kelmedi. 5 jasymnan bastap qaryndashty tisimmen tistep, ernimmen basqaryp aıaq-qolym jete almaǵan aınalamdaǵy kórinisterdi qaǵaz betine túsire bastadym. Alǵashqy kezde tis pen ernim erkime baǵynbady. Keıin bári qalypqa túskeni, meniń erkime baǵynǵany sonshalyqty, Qudaı aýyz, erin, tis kóz aldymdaǵy jaryq álemdi qaǵaz betinde zerdeleý úshin jaratqandaı bolyp kórinedi», – deıdi Robaba bizben áńgimesinde.
Robaba qylqalamnyń qudireti ony sharasyzdyq pen úmitsizdiktiń shyrmaýynan alyp shyqqanyn, ómirine jaryq sáýle syılaǵanyn aıtady.
«Qazir men ómirimdi sýretshilikke deıin jáne sýretshilikten keıin dep ekige bólemin. Qylqalam qudireti arqyly denem kóterile almaıtyn bıikke kóterildim. О́zimniń qol-aıaǵyn qımyldata almaıtyn sharasyz ekenimdi umyttym», – deıdi Robaba.
Robaba Kabýlde otyryp, Batys áleminiń terezesin ashýǵa yqpal etipti. «AQSh-tyń, Japonııa jáne Germanııanyń jýrnalısteri kelip jaǵdaıymmen, shyǵarmashylyǵymmen tanysty, men týraly dúnıelerdi basylymdarynda jarııalady. Meni qazir Azııa emes, Eýropa, Batys elderi kóbirek biledi. Qazir sol elderde dostarym kóp. Sol dostarymnyń qarjylaı, aqparattyq qoldaýymen «Robaba» mádenı-estetıkalyq ortalyq ashtym. Aýǵanstannyń álemdik órkenıetke degen ıntegrasııasyna men basqaratyn ortalyq yqpal ete alsa, eńbegimniń janǵany. Al Azııadan, Ortalyq Azııadan, tipti musylman memleketterinen siz birinshi bolyp baılanysqa shyǵyp tursyz», – deıdi Robaba.
Robabanyń portrettik stıldegi avtorlyq shyǵarmalarynyń arasynan Qazaqstannyń Tuńǵysh Prezıdenti Nursultan Nazarbaevtyń sýreti birden kózge tústi. «Qazaqstannyń Tuńǵysh Prezıdentiniń sýretin úsh aı buryn aıaqtadym. Alty aı boıy saldym. Qalamdy tispen tistep, erinmen basqaryp erkińe baǵyndyrý ońaı emes. Men kartınany bitirgen kúni prezıdentterińiz otstavkaǵa ketti. «Qazaqstan Prezıdentiniń sýretin salýǵa ne sebep boldy?» degen suraǵyńyzǵa jaýap berý maǵan qıyn. Shyndyqty aıtsam – maqtaý bolyp kórinedi. Aýmaly-tókpeli zamanda Qazaqstandy qaqtyǵysqa jol bermegen, shekarasy shegendelgen memleket retinde saqtap qalǵan Prezıdentterińiz qandaı qurmetke bolsa da laıyqty», – deıdi Robaba áńgime arasynda.
Robaba sóz arasynda Qazaqstandy túsinde kóretinin aıtty. Sebebi aınalasynda ózi quralpylas joldastarynyń arasynda Qazaqstanda oqyp jatqandar kóp eken. Bizdiń el jaıly túsinigi solardyń áńgimesimen qalyptasypty.
Uzaq jyldarǵa sozylǵan qaqtyǵystar, qaıyrshylyq múgedek aýǵandardyń óz maqsattaryna jetýine jol bermeıdi. «Álemdi aıaq-qolmen emes, salqyn júrek, mımen basqarady. Sol sııaqty júregiń súzgiden ótkizgen qundylyqtardy qaǵaz betinde túsirýge aıaq-qoldyń bolmaýy kedergi emes eken», – deıdi Robaba.
Robabanyń úsh sińlisi bar. О́zinen 3 jas kishi sińlisi Shakıla Mohammadı apasyna sýretti ernimen basqaryp, tisimen salýǵa Qudaıdyń ózi múmkindik bergenin, daryny tabıǵattan daryǵanyn aıtty. «Biz onyń talantyna kúmándanǵan emespiz. Ol múmkin emesterdiń bárin sátti oryndap shyǵady. Robabanyń Aýǵanstanǵa qatysty salǵan kartınalarynyń bárinde muń bar. Basqasha salýǵa júregi ruhsat bermeıdi. Júrekti aldaý múmkin emes qoı», – deıdi ol bizben áńgimesinde.
Robaba sińlisiniń aıtqanyna keliskendeı únsiz qaldy. «Meniń Aýǵanstanyma qatysty taqyrybym ózgeredi. Áli bizdiń aýylda da toı bolady. Men aldaǵy ýaqytta qaqtyǵystar men soǵystardan qaljyraǵan Aýǵanstandy emes, shaıqalǵan tunyǵy bastapqy qalpyna kelgen, birligi men berekesi jarasqan Aýǵanstan týraly sýretterimdi kóretin bolasyzdar. Qazir-aq salǵym keledi. Biraq oǵan jaǵdaı múmkindik bermeıdi ǵoı. Atys pen jarylystardan adam emes, qalam da selk etedi eken. Selk etken qalam tek muńdy ǵana kóredi», – dep sózin túıindedi Robaba.
Biz de onymen qalam da, júrek te selk etpeıtin jaqsy kúnderde kezdeseıik dep tiledik.
ALMATY
