Qazaqstan men Belarýs elderi – egemendik alǵannan beri bir-birimen baılanysyn úzbegen baıyrǵy seriktester. Jáne 25 jyldyń ishinde qýatty saıası jáne ekonomıkalyq yntymaqtastyqtyń negizin qalady. Eki memleketti tabysty saýda-ekonomıkalyq qarym-qatynasyn 70-ten astam mámileli qujattar baılanystyrady. 2018 jyly eki eldiń arasyndaǵy saýda aınalymy 895 mıllıon dollardy qurasa, 2017 jylmen salystyrǵanda bul kórsetkish 30 paıyzǵa ósti. Qazaqstan óndirýshileriniń kórmesi osy kórsetkishti ulǵaıtýǵa jáne jańa seriktestik kelisimderdi jasaýǵa jańa serpin beredi dep kútilýde.
Belarýssııadaǵy Qazaqstannyń elshisi Ermuhamet Ertisbaev kórmeniń ashylý saltanatynda: «Qazaqstandaǵy barlyq dúkenderde, oblystyq qalalarda, onyń ishinde qala túrindegi aýyldy jerlerde belarýssııalyq taǵamdyq ónimder keńinen taralǵan. Qazaqstan belarýssııalyq ónimder úshin naryqtyń esigin keńinen ashty. Iskerlik keńestiń jumysy barysynda qazaqstandyq taǵamdyq ónimderden basqa ónimder de Belarýssııada keńinen taralýǵa jol ashady degenge senemin» deıdi.
«Belarýssııanyń Qazaqstanmen qarym-qatynasy yrǵaqty da ońdy damyp keledi. Qazaqstanda 40 taýar ótkizýshi sýbekt jáne Belarýssııanyń qatysýymen 256 kásiporyn jumys isteıdi. Bizdiń elde qazaqstandyq kapıtalmen jumys isteıtin 49 kásiporyn bar. Taýar aınalymy turaqty ósip keledi, biz 1 mlrd dollarǵa jetýdi kózdeımiz», – deıdi BelTPP tóraǵasy Vladımır Ýlahovıch.
Kórmede qazaqstandyq óndirýshiler un jáne makaron, tuzdyq pen maı, et konservileriniń, tabıǵı sýsyndar men kondıterlik ónimderin usyndy. Kórmege kelýshiler Qazaqstanda jasalǵan ónimderden aýyz tıip, ónimderdi baǵalaýǵa múmkindik aldy.
«Qazaqstandyq taǵamdyq ónimder búgingi tańda joǵary sapa deńgeıine jetti. TMD elderiniń jetekshi óndirýshilerine básekeles bola alady. Makaron, nan-toqash, sút, kondıterlik jáne et ónimderin jasaýda biz jaqsy deńgeıge jettik. Menińshe, qazaqstandyq óndirýshiler osy jetistikpen toqtap qalmaýy kerek. Osy satyda sheteldik naryqty belsendi jaýlap alý úshin bizde qajettiniń barlyǵy bar», – deıdi «Novo-Aldjanskıı melkombınat» JShS bas dırektory Kanat Tapaev.
Iskerlik keńestiń jemisti jumysynyń bir nátıjesi «Hyundai» arnaıy tehnıkalyq modelderiniń qataryn bekitý jáne Podsnab pen MAZ belarýssııalyq seristestermen jetkizilim jónindegi eksporttyq kelisimderi bolyp otyr.
Qazaqstandyq óndirýshilerdiń belarýssııalyq taýarlyq jelilerdiń ókilderimen jáne dıstrıbıýtorlarymen ótken kezdesýlerinde de naqty kelisimder jasalǵan. Osylaısha, quramyna 29 dúken men 4 meıramhana kiretin «Radzıvıllovskıı» jelisiniń ókilderi qazaqstandyq taǵamdyq ónimderdiń barlyq usynylǵan túrlerin satyp alýǵa qyzyǵýshylyq týdyrdy. Taraptar synaýǵa partııany jetkizý týraly kelisti.
Belarýssııalyq gıpermarketterdiń kóshbasshy «Gıppo» qazaqstandyq ónimderdi ımporttaýdy bastaıtyn birinshi jeli bolýǵa nıet bildirgen. Erekshe suranystaǵy taýarlar un, makaron ónimderi jáne tabıǵı sýsyndary bolyp tabylady.
