Tasqa qashalǵan jyr

Ekinshi dúnıejúzilik soǵys jyldary óńir turǵyndary maıdanǵa attanǵan aýyl azamattaryn «aman-saý oralsyn» dep Áýlıe tastan shyǵaryp salǵan eken. Keıin uzaq saparǵa shyǵatyn jolaýshylar men otaý quratyn jastar da osy kıeli jerden bata alatyn bolypty.

Jýyqta atalǵan tas jergilikti óńirlik qasıetti nysandar tizimine alynyp, aýdan basshysy Berikjan Ábýtá­lipov bastaǵan top onyń ashylý rásimin ót­kizdi.

Bul sharaǵa qadirli qonaq retinde Kókterek aýylynyń týmasy, qalamy júırik jýrnalıst, arqaly aqyn, Zerendi aýdanynyń qurmetti azamaty Qorǵanbek Amanjol aǵamyz qatysyp, kıeli tastyń qabyrǵasyna qashalyp jazylǵan óziniń «Áýlıe tas» atty óleńin oqyp berdi. Jyrdyń tolyq mátini mynaý:

Aýylymnyń qasynda Áýlıe tas,

Ańyzyndaı ótkenniń kárııa tas.

Qadym zaman qaldyrǵan qasıetteı,

Qormalyna jurtymnyń han ıe tas.

Áýlıe tastyń kóp edi áńgimesi,

Álimsaqtan aımaqtyń máńgi ıesi.

«Áýlıe tas-aı, jaryqtyq!» dep kúrsinse,

Aqsaqaldy terbeıtin jan kıesi.

Bala jastan janynda oınap óstik,

Bal dáýrenniń qyzyǵyn toılap óstik.

Áýlıe tastan áldebir tylsym uǵyp,

Eseıgende oıynnan oıǵa kóshtik.

Sonaý soǵys kóp qaıǵy ala kelgen,

Taýqymetin ana men bala kórgen.

Azamatym aman-saý oralsyn dep,

Áýlıe tastan shyǵaryp sala bergen.

Áýlıe tastyń qasynda qara jol bar,

Qara joldyń quzyryn bala da ańdar.

Qara joldyń qydyryn joldas qylǵan

Qam kóńildi qapasqa qamaǵandar.

Jas jubaılar osynda shat bolady,

Áýlıe tastyń basynan baq tabady.

Jolaýshylap alysqa ketken jandar

Áýlıe tastan bata alyp attanady.

Kókterekte qaldyryp kóktem elin,

Áýlıe tastan attanyp ketken edim.

Qazyǵyma baılandym kindikpenen,

Qara joldan eshqashan shettemedim.

Áýlıe tastyń kıesin yrym etken,

Aınalyp-aq keteıin qudiretten.

Jan sabatyn jaılaımyn áli de osy

Júregimnen óshpeıtin súgiretten!..

Aqyn aǵasynyń óleńin áýeli qymbat granıtke bádizdep jazyp, ony shoqpar tastyń qabyrǵasyna oıyp ornalas­tyrǵan azamattyń esimi – Jumaǵul Jol­dyqov eken. Bul jigit de Kókterek aýylynyń týma­sy, aımaqqa belgili ká­sipker. Ju­maǵul Shaıahmetuly bola­shaqta Áýlıe tastyń basyna kelýshi týrıs­terge arnalǵan úı salýdy da jos­parlap qoıǵan kórinedi.