Ardager-aqsaqal Ahat Bekmádıuly bilgen janǵa bir dáýirdiń tiri kýágeri. Soǵystan keıin orta mektepte ustaz, mektep dırektory qatarly qyzmet atqaryp, 1983 jyly zeınetke shyqqan. 1998 jyly el qatarly elordaǵa qonys aýdarǵan. 2005 jyly Uly jeńistiń 60 jyldyq merekesine oraı bas qalaǵa baýyr basqan 25 soǵys ardagerine bir úıdiń bir kireberisinen 25 páterdi qatar bergen eken, sol maıdanger qarııalardan qazir Ahat aqsaqal ǵana tiri.
Bir qyzyǵy, 1923 jyly týǵan atamyz qazir Sátbaev kóshesindegi 23-úıdiń 23-páterinde turyp jatyr. Qarııany kenje uly – alpysty alqymdaǵan Esilbek aǵa qamqorlyǵyna alǵan. Úlken qyzy Sábıra 72 jasta Qaraǵandy qalasynda turady.
Biz barǵanda qarııa «Egemenniń» kezekti sanyn oqyp otyr eken. Tipti kózine kózildirik te salmaıdy. Sol kúni basylym betinde jarııalanǵan Myrzataı Joldasbekov aǵamyzdyń jazýshy Rollan Seısenbaev týraly «Adamzat taǵdyryn oılaıtyn tulǵa» atty essesin súısine oqyǵanyn aıtyp, jyly iltıpat tanytty. Onymen qoımaı esse keıipkeriniń abaıtaný jolynda Eýropa álemine sińirgen eńbegi jaıly da aqtaryla aıtyp ótti.
– Buryndary «Egemenniń» barlyq sanyn jipke tizgendeı nómirlep tigip qoıýshy edim, qazir kárilik jeńgen be, bul isim aıaqsyz qalyp barady, – deıdi abzal qarııa ókingen keıipte. Rasynda bul adam etegine súrinip júrip, 96-ǵa aıaq basqan qatardaǵy qarııanyń biri emes. Kózi ashyq, kókiregi oıaý. Oń qolynda gazet, sol qolynda kitap. «Sherhan Murtazanyń «Namys naızaǵaıy» kitabyn («Egemenniń» kitaphanasy» serııasymen shyqqan) bir aıda oqyp shyqtym, osyndaı keremet dúnıeni jastar oqysa shirkin» dep, bir kúrsinip qoıdy abyz qarııa. Ras-aý. Ǵasyrǵa jýyq jasaǵan qarııanyń myna sózin estip, biz de bir kúrsinip alyp, abyz-ataǵa qosh aıtystyq.
