Áýe keńistiginiń tranzıttik múmkindigi zor

Elimizdiń Azamattyq avıasııa komıtetiniń tóraǵasy Talǵat Las­taev, sońǵy 7-8 jyldyń ishinde Qazaqstanda tranzıttik jolaýshylar aǵyny 20 esege artqanyn aıtty. Máselen, ótken jyly el arqyly attanǵan jolaýshylardyń sany 900 myńǵa jetti dedi ol.

– Bul forým áýe baǵyttaryn damy­týǵa septesedi degen úmit­temiz. Birtindep lıberalızasııa­laý saıasatyna kóshýdi qolǵa al­dyq. Ol óz jemisin bere bastady. Ony eldegi kompanııalardyń ashylýy­nan baıqaýǵa bolady. Búginde juma saıyn Qazaqstannan álemniń 27 memleketine shamamen 500-ge jýyq reıs oryndalady. Bul 98 áýe marshrýtyn qurap otyr. Atalǵan kórsetkish ósý ústinde. Bıyl Praga, Ulan-Batyr baǵy­tymen qatar jýyrda Elbasy­nyń tap­syrmasymen Nur-Sultan – Tokıo reısi ashyldy. Osy iske qy­taılyq áriptesterimizdiń de qosyl­ǵany qýantýda. Jaqyn arada Nur-Sultan – Shanhaı jáne Nur-Sultan – Sıngapýr áýe reısterin de ashýdy josparlap otyrmyz. Munyń barlyǵy eldegi týrızmdi damytyp, «Astana» halyqaralyq qarjy ortalyǵynyń jumysyn jandandyrýy tıis. Sondyqtan «Routes Silk Road 2019» forýmynan bizdiń kúterimiz kóp. Bul eldegi azamattyq avıa sektorǵa tyń serpin berip, dúnıejúzilik kompanııalarǵa elordamen jaqynyraq tanysýdyń múmkindigi, – deıdi Talǵat Lastaev.

Nursultan Nazarbaev halyqara­lyq áýejaıynyń Basqarma tór­aǵasy Rádilbek Ádımolda, áýe aı­­­la­ǵy búginde aımaqtyq habqa aı­nal­­ǵanyn, onda 5 qazaqstandyq jáne 16 sheteldik kompanııa 22-39 ha­lyq­aralyq áýe marshrýttary boıyn­sha jumys istep jatqanyn jetkizdi.

– Táýligine áýejaıymyz 17 myń jolaýshyny qabyldaıdy. Taǵy bir aıta keterligi, 9-11 shilde aralyǵynda jer sharyn aınalyp ushý boıynsha rekord tirkeldi. Ol soltústik jáne ońtústik polıýs arqyly oryndaldy. Ushaq Flo­rıda shaharynan áýege kóterilip, 10 shilde kúni bizdiń áýejaıymyzǵa qondy. Bul el astanasy men Nursultan Nazarbaev halyqaralyq áýejaıynyń bedelin kóteretin aıtýly shara boldy. Osy­dan-aq áýe termınalymyz teh­nı­kalyq turǵydan tartymdy ekendigin dáleldedi. Ármen qaraı da marshrýttyq jeliler artady degen senimdemiz, – dedi óz kezeginde Rádilbek Ádımolda.

Al IATA qaýymdastyǵynyń Ortalyq Azııa boıynsha aımaqtyq menedjeri Djordan Karamalakov, «Bir beldeý, bir jol» ıdeıasyn júzege asyrýda avıasııanyń múm­kin­digi orasan ekendigin aıtady. Ol búginge deıin júk aǵy­nyn qamtýda tek avtokólik jáne temir joldarymen birge teńiz baǵyty ǵana qarastyrylyp kelgenin sabaqtap, osy turǵyda áýe jolynyń basym­dyqtary durys ıgerilmeı jatqa­nyna nazar aýdardy.

– Kóptegen memleket basshy­lary júk aǵyny týraly sóz qoz­ǵaǵanda únemi teńiz, temir jáne tas joldaryna mán berip jatady. Al avıasııa qaıda qaldy son­da? Búginde biz baıqap otyrmyz, naryqqa 13 qytaılyq avıa­kom­panııa kelip otyr. Olar­dyń teh­nıkalyq parki 1600 úlken kólemdi transporttyq ushaqtardy quraýda. Bul taptyrmas múmkindik. Osylaısha avıasııa bul jobadan óz ornyn taba alatynyn aıǵaqtap tur. Jańa Jibek jolyn damytýda áýe keńistiginiń mańyzy erekshe bolmaq. Osy arqyly Qıyr Shyǵys pen Ortalyq Azııanyń ekonomıkasyn óristetýge jol ashylady, – dep túıindedi Djordan Karamalakov.