Jyl basynan beri elimizde birneshe marafon ótkizildi. Jarystar negizinen Nur-Sultan jáne Almaty qalalarynda uıymdastyryldy. О́tken jeksenbide el astanasynda trıatlonnan álemdegi eń basty jarystyń biri ótken bolatyn. Ironman 70.3 dep atalatyn mýltısporttyq dodaǵa álemniń 50 elinen 1400-qa jýyq qatysýshy jınaldy. Úsh kezeńnen turatyn marafon elordamyzda osymen ekinshi ret ótkizilip otyr. Marafon erejesi boıynsha, sportshylar Esil ózeninde 2 shaqyrym júzip, odan keıin 90 shaqyrym velosıpedpen júrip, 21,1 shaqyrym júgirýi shart edi. Týrnırdiń tolyq marshrýty 113 shaqyrymǵa sozyldy. London Olımpıadasynyń chempıony, veloshabandoz Aleksandr Vınokýrov qatysýshylar qatarynan kórindi. Aıta ketetini, jarysqa qatysýshylar arasynda kósh bastaǵan Aleksandr Vınokýrov pen Ekaterına Shatnaıa boldy.
Bıylǵy marafonnyń eń jas qatysýshysy – Sanjar Báziljanov. 18 jasar otandasymyz atalǵan sharaǵa bir aı daıyndalǵanyn aıtty. «Sharaǵa daıyndyqtyń ózi ońaı bolmady. Qoldaýshylarymnyń, bapkerimniń arqasynda búgingi nátıjege qol jetkizdim. Barlyq kezeńdi artta qaldyrǵan soń, qoldaýy bar adamnyń qolynan kelmeıtini joǵyn túsindim», deıdi jas qatysýshy. Sanjar Adal Volunteer Club dep atalatyn talantty eriktiler uıymynyń negizin qalaýshy. Basqaryp otyrǵan uıymy elimizdiń birneshe qalasynda jumys isteıdi.
Uıymdastyrýshylardyń aıtýynsha, marafonnyń orta jasy jyl saıyn azaıyp keledi eken. Bul qatysýshylardyń kóbi jastar bolyp jatqanyn kórsetedi. Máselen, mamyrda ótken BI Marathon 2019 sharasyndaǵy 1931 qatysýshynyń 953-i jastar. Jyl basynan beri ótkizilgen marafondardyń jartysy qaıyrymdylyq maqsatynda bolǵanyn aıtyp ótken de jón. Bul jastardyń salamatty ómir saltymen birge qoǵamdyq sharalarda da kómek kórsetýge degen nıetin kórsetedi.
