2012 jyldan bastap jaldamaly páterde júrgen áskerılerge ótemaqy tólenip kelse, endi ol turǵyn úı tólemderine aýystyrylǵan. Iаǵnı, qarajat ekinshi deńgeıli bankterde ashylǵan arnaıy jeke shottarǵa aýdarylady. Osy aýdarymdardy ár áskerı qyzmetshi «Áskerı baspana», «7-20-25» jáne «Nurly jer» baǵdarlamalary arqyly baspana alýǵa jumsaı alady. Nesıeniń mólsherlemesi jylyna 7%-dan aspaıdy jáne tóleý merzimi de tıimdi.
«Munyń bári áskerı qyzmetshilerdiń ál-aýqatyn jaqsartýǵa baǵyttalǵan», deıdi qorǵanys isteri departamenti bastyǵynyń orynbasary Dáýlet Tolybaı.
Bıyl Petropavl áskerı garnızonynyń 20 áskerı qyzmetshisi jaıly páterge qol jetkizdi. Solardyń biri – bólim bastyǵy Ánýar Ibraev. Ol úı kezeginde 10 jyl turǵan. Oǵan deıin otbasymen páter jaldap kelgen. Endi 3 bólmeli páterge jaıǵasty. «Turǵyn úı-qurylys jınaq bankinde» jınaǵan qarajat bastapqy jarna retinde quıylyp,zeınetke shyqqanǵa deıin tólem jasalady. Sosyn bul páter otbasynyń atyna aýdarylady.
Baspasóz qyzmetiniń jetekshisi Aıman Ábjapparova óz sózinde baspanasy joq áskerı qyzmetshilerdiń barlyq sanattaǵylar úshin biryńǵaı turǵyn úı tólemi jasalatynyn jetkizdi. Sonymen qatar áskerı salada 20 jáne odan kóp jyl eńbek etken áskerılerge qyzmettik úıdi óteýsiz jekeshelendirý quqyǵy qaıtaryldy. Al qyzmettik turǵyn úılermen qamtamasyz etilgen áskerı qyzmetkerlerge ekinshi deńgeıli bankterdegi jeke arnaıy shottaryna turǵyn úı tólemderiniń 50 prosenti aýdarylady. Turǵyn úılermen qamtamasyz etilmegen áskerı qyzmetshilerge ekinshi deńgeıli bankterdegi jeke arnaıy shottaryna turǵyn úı tólemderiniń 100 % -y salynady.
40-qa jýyq áskerı qyzmetshige turǵyn úıdi jaldap turǵany úshin aqshalaı ótemaqy tólenedi.
