Kúndelikti ómirde kóshedegi buzaqylardy quryqtap, uryny aýyzdyqtap, tóbeleskendi tezge salyp, joǵalǵandy izdep, zábir kórgendi jaqtap, adamdardy qyzyl jalyn órt arasynan alyp shyǵyp, nebir qandyqol qylmyskerlermen betpe-bet kelip, san-sapat qaýipti isterdiń arasynda júrgen olardyń árbir saǵaty qaterge toly.
Qyzmet babynda qylmyskerlerdi ustaý nemese qıyn jaǵdaıǵa tap bolǵan turǵyndardy qutqarý kezinde qaza bolǵan polıseılerdiń ajalyn joǵaryda aıtylǵandaı «qyzmet babynda» degen tirkestiń aıasyna syıǵyzyp, qınala otyryp óziniń mindetti jumysyn atqarý kezinde qaza tapty dep jubanýǵa týra keledi.
Al polısııa bireý úshin ómirin qııýǵa mindetti me?..
О́tken jyly teńizdiń asaý tolqyndary aqkóbik bolyp jaǵaǵa uryp, alyp qazan burq-sarq qaınaǵandaı bolǵan kúni jaǵalaýǵa jete almaı sýǵa bir batyp-bir shyǵyp júrgen áıel janushyra kómek suraı aıqaılady. Demalýshylar kómek bergisi kelgenmen, alyp tolqyndardyń óz ómirlerine qaýip tóndiretinin sezip, irkilip qaldy. Osy sátte kóptiń nazary polıseı formasyndaǵy eki-úsh jigitke aýdy. Bul – olar úshin syn saǵat edi. Sheshinip jaǵaǵa barǵanymen, olar da táýekel ete almady. Jandármen belbeýlerin jalǵap, áıelge laqtyrýdyń qamyna kiristi. Budan da eshteńe shyqpady, óıtkeni áıel tolqynmen jaqyndaı túse alystap, qaqpaqyl kúıge tústi. Al jaǵalaýdaǵy osharylǵan halyq tek polıseılerge úmit etip, ajal aýzyndaǵy áıeldi qutqarý solardyń mindeti dep qazdııa siresip tur. «Kómektespedińder! Qorqaqtar! Nege sýǵa sekirmeısińder!» dep kinálaı daýystap jatqandar da joq emes. Polıseı de adam, ol – qoǵamdyq tártipti qamtamasyz etýshi, biraq súńgýir emes. Onyń da ómiri qymbat, tiri qalmaıtynyn bilip turyp jankeshtilikpen ajal aýzyna ózin laqtyrýǵa ózgeler syndy olardyń da táýekel ete almaıtynyn túsinýge bolady. Múmkin, sýda júze almaıtyn shyǵar... Tipti sý túbine súńgýge mamandanǵan, arnaıy qurylǵylarmen jabdyqtalǵan súńgýirlerdiń ózi ruqsat etilmeıtin sátterde tolqyn qushaǵyna enip ketýdiń qaýipti ekenin aıtyp, daýyl ishin tartqan sátti kútedi. «Qyryq jyl qyrǵyn bolsa da ajaldy óledi» degendeı, janushyrǵan áıeldi taý-taý tolqyndar aqyry jaǵalaýǵa alyp keldi, osy sátti ańdyp turǵan polıseıler belbeýlerin laqtyryp, birimen biri tirkese amaldap, qolynan súırep alyp shyqty. Biraq olarǵa qatysty birde-bir jaqsy sóz aıtylǵan joq – óńkeı boqtaý men dattaý...
Bıyl Atyraý qalasynda kópirden sekirgen boıjetkendi qutqaramyn dep, bar qyzyǵy aldyndaǵy órimdeı serjanttyń opat bolǵany bar. Otbasynyń jalǵyz asyraýshysy, eki aıdan soń otbasyn quryp, týystaryn qýantamyn dep júrgen soqtaldaı jigit oılamaǵan jerden kóz jumdy. О́kinishti-aq.
Elimizde sýısıdtiń aldyn alǵan polıseılerge qatysty mysaldar jetkilikti. Aldyn alǵan jaqsy, al óz ómirine qaýip tóndirip kózsiz áreketterge barý – polıseı úshin mindet emes jáne sol úshin olardy kinálaýdyń qajeti joq.
Mańǵystaý oblysy
