Almaty qalasynda Ulttyq ekonomıka mın ıstrliginiń qoldaýymen, Eýropa qaıta qurý jáne damý banki uıymdastyrǵan «Shaǵyn bıznestegi áıelder» atty qanatqaqty joba qorytyndysyna arnalǵan májilis osylaısha márege jetti. Uıymdastyrýshylar osy baǵdarlamaǵa qatysqan áıeldermen birlese otyryp, joba nátıjelerimen bólisip, shaǵyn bıznestiń máseleleri men múmkinshilikterin ortaǵa saldy.
2019 jylǵy aqpan aıynan bastap elimizdiń 14 qalasynda turatyn 373 kásipker-áıel marketıng, aqparattyq tehnologııalar jáne qarjyny basqarý salalaryndaǵy tájirıbeli keńesshiler men bıznes-sarapshylar ótkizgen tórt trenıngke qatysqan bolatyn.
Alynǵan derekterge súıensek, 166 qatysýshy satý kólemderiniń 10 paıyzdan bastap 100 paıyzǵa deıin óskenin, 148 kásipker áıel – ortasha chekty ósirgenin, 239-y – klıentter bazasyn keńeıtkenin, 258-i – avtomattandyrý quraldaryn qoldana bastaǵanyn jáne saıtty ázirleýge kiriskenin, 56 – qyzmetkerler quramyn qulshyndyrý júıesin ózgertkenin, 218 kásipker – qarjy esebin jáne josparlaýdy engizgenin, 4 adam– memlekettik jáne jeke qorlardyń granttaryn utyp alǵanyn habarlasa, 1 qatysýshy alǵashqy franshızasyn satqan.
Odan ózge, Petropavldan kelgen qatysýshylar WomenPartners atty áıelder klýbyn qurǵan, mundaǵy maqsat – áıelder arasyndaǵy kásipkerlikti alǵa tartý, ony damytý jáne óz bıznesi úshin jańa aýdıtorııa izdestirý bolyp otyr.
Osyǵan oraı, bilim berý baǵdarlamasy jarııalanǵan sátten bastap, qatysýǵa 1243 adam tirkelgenin atap ótken abzal. Eń kóp tapsyrys túsken oblystar qatarynda – Qaraǵandy, Shymkent jáne Aqtóbe óńirleri bar. О́ziniń tapsyrystarynda kásipker-áıelder «Klıentterdi qalaı tartýǵa bolady?», «Jarnama qaı kezde qaýqarsyz?», «Qarjyny basqarý júıesin qalaı ońtaılandyrý kerek?», «Eńbekaqyny kóterýge múmkindik bolmaǵanynda qyzmetkerler quramyn qalaı ustap qalýǵa bolady?» sekildi uqsas qıynshylyqtaryn atap otyr.
Baǵdarlama qatysýshylarynyń basym bóligi, ıaǵnı kásipker-áıeldiń 60,8% qyzmet kórsetý salasynda jeke kásibi bar. Bıznestiń ekinshi keń taraǵan baǵyty – saýda, onymen kásipker-áıelderdiń 22,9 % aınalysady. Sondaı-aq bıznes-hanymdardyń arasynda tanymal salalardyń úshtigine jeńil jáne tamaq ónerkásibi kiredi. Bul saladaǵy kásipker-áıelder sany 14,5% quraıdy.
Oqytý baǵdarlamasyn «Dıalog» atty trenıng jáne konsaltıng kompanııasy atqarǵan.
