Z.Orazalıevanyń sózinshe, bul azamattar úshin qosymsha tosqaýyldar týdyrmaýy tıis. Kerisinshe, tirkeý prosesin ashyq, obektıvti júrgizýge múmkindik beredi.
«Halyqqa qyzmet kórsetý ortalyǵynda kezekke turýdyń qajeti joq. Onda ózine-ózi qyzmet kórsetýge arnalǵan buryshtar bar. Arnaıy mamandar elektrondy sıfrlyq qoltańbany paıdalanyp, emhanaǵa tirkelýge kómektesedi. Al, eger sıfrlyq qoltańbańyz bolsa eshqaıda barmaı-aq, egov.kz elektrondy úkimet portaly arqyly da tirkelýge bolady», dedi Zabıra Orazalıeva.
Basqarýshy dırektordyń sózine súıensek, Qor basshylyǵy tirkeý prosesin emhana qyzmetkerleriniń aralasýynsyz uıymdastyrý maqsatynda osyndaı qadamǵa baryp otyr. О́ıtkeni, emhananyń tirkeý bólimi tirkelý úshin mekenjaı anyqtamasyn, tipti, analız tapsyrýdy talap etkeni jaıly aryz-shaǵym kóp kórinedi. Shyn máninde, tirkelý úshin jeke kýálik pen bas dárigerdiń atyna jazylǵan ótinishten basqa qujat qajet emes.
«Tirkelýdiń ózindik tártibi bar. Úıge dáriger shaqyrý, «tórtinshi» sanat boıynsha jedel járdem shaqyrý úshin aýmaqtyq prınsıp saqtalýy qajet. Mysaly, eger siz turatyn aýdanda úsh emhana bolsa, sonyń kez-kelgenin tańdaı alasyz. Biraq biz úıge jaqyn mańda ornalasqan emhanany tańdaýǵa keńes beremiz. Bul qajet bolǵan kezde ýchaskelik dárigerdiń úıge tez jetýine, tıisinshe kómek kórsetýine múmkindik beredi. Ádette, óz ýchaskesindegi pasıentterdiń densaýlyq jaǵdaıyn ýchaskelik terapevt jaqsy biledi», deıdi MSQ basqarýshy dırektory.
Esterińizge sala ketsek, azamattar ózi turatyn mıkroýchaskeden tys jerdegi emhanaǵa da tirkele alady. Jan basyna shaqqandaǵy normatıv boıynsha, mundaıda dáriger shaqyrtý boıynsha naýqastyń úıine baryp qyzmet kórsetýge mindetti.
«Byltyr arnaıy buıryqqa ózgerister engizilgen bolatyn. Azamattardan «úıge dáriger shaqyrý qyzmetinen bas tartý» týraly ótinish jazdyryp alýǵa emhanalardyń quqy joq. Mundaı zań buzýshylyqtar bolyp jatsa Qor mindetti túrde aralasady. Eger ózińiz turatyn mıkroýchaskeden tys ornalasqan emhanany tańdasańyz, atalǵan emdeý mekemesi sizge bastapqy medısınalyq-sanıtarlyq qyzmettiń barlyq túrlerin kórsetýge mindetti. Al, tórtinshi sanattaǵy shaqyrtýlar boıynsha siz turatyn aýdandaǵy emhanamen qosymsha kelisimshart bekitýi tıis. Sonda qajet bolǵan jaǵdaıda, jedel járdem tirkelgen emhanadan emes, jaqyn mańdaǵy emhanadan keledi», deıdi Z.Orazalıeva.
