Mindet – ınvestısııalyq tartymdylyqty jaqsartý

О́ńirdegi negizgi is-qımyl ınvestı­sııalyq tartym­dy­lyq­ty odan ári tereńdetip, jańasha serpilis berýge ba­ǵyt­talýǵa tıis. Bul rette óz qyzmetin byl­tyr bastaǵan jobalyq keń­seniń ekinshi tynysyn ashý kózdelgen. Atalǵan alań tıimdi túrde paıdalanylsa, bul qadam ınvestısııalyq jobalar­dyń kedergisiz júzege asýyna sep­tigin tıgiz­bek. Sonymen birge ınvestorlardyń bo­ıynda sybaılas jemqorlyqqa qarsy tura bilý daǵdylary men ım­mýnıtetin qalyptastyrýǵa jol ashpaq. Mundaı front-keńse ınvestısııalyq sıpat­taǵy bıznes-klımattyń jaqsarýyna da áser ete alatyny belgili bolyp otyr. Aıtalyq, oblysta atalǵan qurylym ashylǵan ýaqyttan beri ınvestorlardy sybaılas jemqorlyqqa qarsy súıemeldeý boıynsha 24 kelisimge qol qoıylǵan. Sondaı-aq óńirde alǵash­qy atalǵan jobamen enshiles «Aqtóbe – adaldyq alańy» jobasy sybaılas jemqorlyq deńgeıin qysqartýǵa ári osy dertke teris kózqaras qalyptastyrýǵa áser ete bastaǵany anyq baıqalady. Osy arqyly azamattardyń memlekettik bılik ınstıtýttaryna degen senimin tereńdete túsý qarastyrylǵan.

Búginde oblysta Prezı­denttiń Úki­met­tiń keńeıtilgen oty­rysynda jer­gilikti at­qa­rý­shy organdarǵa bergen tap­syrmasyn oryndaý úshin júıeli jumystar júr­gizile bastady. Munyń bir ar­nasy ınvestısııalyq qara­jat­tar kólemin odan ári ósi­rýge baǵyttalǵan. Osyǵan oraı keıbir derekterdi kel­tire ketsek, 2019 jyldyń alǵash­qy jarty­jyldyǵynyń qorytyndysy boıyn­sha óńirde ınvestısııa tartý ósimi 100,2 paıyz­dy qurapty. Eseptik kezeń aralyǵynda oblysta 210 mıllıard teńgeniń ınvestısııasy tartylǵan. Onyń 30 paıyzy syrtqy ınvestısııa bolyp tabylady. Bul qanaǵat tutýǵa turarlyq kórsetkish­ter ekeni kámil. Áıtse de bıyl óńirde ınvestısııa tartý jónindegi meje tabany kúrekteı 620 mıllıard teńgeden asatynyn eskersek, alǵashqy jartyjyl­dyq­ta alynǵan asý tutastaı jyldyq mól­sher­diń nebári úshten bir bóligi ekenine kóz jetkizemiz. Bul kólem ótken jyldyń deńgeıinen 10 paıyzǵa artyq ekendigi de ınvestısııanyń jańa tolqynyn tý­ǵyzý úshin tyń tásilder men izdenisterdi qarastyrý kerektigin kórsetedi.

Osy oraıda óńirde ınves­tı­­sııalyq tartymdylyqty odan ári tereńdetý úshin ke­shendi kóz­­­qaras qalyptas­tyrý qa­­jet­t­igi talas týǵyzbaıdy. Bıyl­­ǵy sáýir aıynda Kásip­ker­lik kodeksine birqatar óz­­ge­rister en­gizil­di. Kodekste ın­ves­­­tor­­lar­ǵa «bir tereze» qa­­ǵı­daty bo­ıynsha mem­­­leket­tik turǵy­dan qol­­daý kórsetý sharalary belgi­lengen.

Iаǵnı, jeńildetilgen ári ońaı­latylǵan rejim jaǵ­daıynda ınvestorlarǵa jer berý men bólý arqyly olar­dyń salyq tóleý jónin­degi máseleleri bir­shama oń­taı­lana túspek. Inves­tor­larǵa arnalǵan «bir tereze» qaǵıdasy tek munymen shek­telmeıdi. Bul ózgeris qar­jylaı kómek pen adamı kapıtal boıynsha barlyq qajetti máselelerdi toǵystyra alady, deıdi. Aqtóbe oblystyq kásipkerler palatasynyń basshysy Anar Darjanova.

Túıip aıtqanda, aımaqta ınvestısııa tartý jóninde bıik mindetter belgilengen. Bul rette oblys ákimdigi tarapynan qolǵa alynǵan is-sharalar jaýapty istiń ná­tıjeli bolýyna negiz qa­laı­dy degen oıdamyz.

AQTО́BE