Qazir beınebaqylaý kameralary eshkimge tańsyq emes. Qala kóshelerinde, ǵımarat ishinde baqylaý kamerasy ómirimizdiń ajyramas bólshegine aınalyp ketkenimen, birneshe eldi mekennen turatyn úlken aýdandy bir ortalyqtan qadaǵalaı alatyn mundaı júıe bizde joq edi. Endi mine, zamanaýı tehnologııa aýylǵa da jetti.
– Beınebaqylaý kameralary kópshilik oılaǵandaı aıyppul salý, jazalaý quraly emes. Bul eń aldymen qoǵamdyq tártipti saqtaý, qaýipsizdikti qamtamasyz etý isinde profılaktıkalyq yqpalǵa ıe. Jańa joba boıynsha ornatylǵan kameralar Báıterek aýdanynyń ortalyǵy – Peremetnyı aýylynan bólek, Mıchýrın, Asan, Darııan, Kalının, Úlken Shaǵan jáne Kóshim sekildi iri-iri alty eldi mekendi qamtıdy. «Sunkar smart sity» júıesiniń basqarý pýlti Peremetnyıda ornatylǵan. Osy ortalyqqa barlyq eldi mekennen aqparat túsip otyrady. Operator qajetti jaǵdaıǵa oraı tıisti aımaqty onlaın túrde baqylaı alady. Bir ereksheligi, ár núktede eki kamera ornatylǵan, onyń birin operator kez kelgen baǵytqa buryp qaraı alady, al ekinshi kamera turaqty bolady. Bul baqylaý aımaǵynan eshteńe de tys qalmaıdy degen sóz, – deıdi jobany júzege asyrýshy «Elaıts» JShS-niń tehnıkalyq dırektory Aleksandr Molchanov.
A.Molchanovtyń aıtýynsha, «Elaıts» JShS kóp jyldan beri kúzet fýnksııasymen, beınebaqylaý qondyrǵylaryn jetildirýmen aınalysyp keledi eken. Sondyqtan da kompanııa álemdik baqylaý kameralarynyń eń jaqsy qasıetterin alyp, biriktirgen. Onyń ústine kompanııa Báıterek aýdany ákimdigimen arada jasalǵan kelisimshartqa sáıkes «Sunkar smart sity» júıesine úsh jyl boıy qyzmet kórsetip, jetildirip otyrmaq.
– Jańa júıeniń tıimdiligin mynadan-aq ańǵarýǵa bolady: Baǵdarlama áli tolyq iske qosylyp úlgermegen eki apta ishinde osy kameralardyń kómegimen úsh aýyr qylmys ashyldy. Onyń úsheýi de jeke tulǵanyń múlkin zańsyz ıemdenýge baılanysty zańbuzýshylyq, – deıdi oblystyq Polısııa departamenti bastyǵynyń mindetin atqarýshy Serik Súıinbaev. Onyń aıtýynsha, búginde Oral qalasynda jedel basqarý ortalyǵynyń (JBO) 97 kamerasy jumys istep tur. «Qaýipsiz aýla» júıesi boıynsha 346 kamera ornatylǵan. Sondaı-aq oblystyń ár aýdanynda JBO-ǵa qarasty baqylaý júıesi, barlyǵy 148 kamera bar. Bıyl jyl basynan beri osy kameralardyń kómegimen polısııa 48 qylmysty izin sýytpaı ashypty. Onyń ishinde 13 tonaý, 15 buzaqylyq faktisi bar.
Qazirgi tańda Báıterek aýdandyq polısııa bóliminiń 15 qyzmetkeri «Sunkar smart sity» júıesin paıdalanýǵa oqyp úırenip jatyr. Bolashaqta Báıterek aýdany tájirıbesiniń tıimdiligin ózge aýdandar kórse, «Sunkar smart sity» jobasy ózge aýdandarǵa da taraýy múmkin.
– Biz usynyp otyrǵan jobada qarjynyń qomaqty bóligi optıkalyq-talshyqty kabel júıesin tartýǵa ketedi. Biraq ol júıeni keıin basqa da túrli maqsatqa paıdalanýǵa, mysaly joǵary jyldamdyqty ınternet qyzmetin taratýǵa, baılanys júıesin damytýǵa, basqa da jumystarǵa paıdalanýǵa bolady. Osy arqyly jobanyń ózindik qunyn tómendetip, alys aýyldardyń kóptegen máselesin sheshýge bolar edi. Bolashaqta «Sunkar smart sity» jobasyna basqa aýdandar da qosylyp jatsa, biryńǵaı oblystyq baqylaý júıesi qurylýy múmkin. Osylaısha bolashaqta JBO-da otyrǵan kezekshi ınspektor ınteraktıvti kartadan ózi qajet etken aýdan men aýyldy jáne onda qoıylǵan kamerany tańdap, ol jerde bolyp jatqan oqıǵany onlaın rejimde baqylaı alady, – deıdi Aleksandr Molchanov.
Batys Qazaqstan oblysy
