Belgilengen iste bereke mol
Seısenbi, 15 qańtar 2013 8:03
«Nur Otan» HDP atqarylǵan is-sharalardy qorytyndylap, alda mejelengen jumystardyń basym baǵyttaryn aıqyndady
«Nur Otan» HDP Ortalyq apparatynda partııanyń oblystyq fılıaldary tóraǵalarynyń birinshi orynbasarlarymen keńes ótkizildi. Keńeste partııanyń 2012 jylǵy is-sharalary qorytyndylanyp, taıaý merzimde qolǵa alynatyn jumystardyń basym baǵyttary aıqyndaldy.
Seısenbi, 15 qańtar 2013 8:03
«Nur Otan» HDP atqarylǵan is-sharalardy qorytyndylap, alda mejelengen jumystardyń basym baǵyttaryn aıqyndady
«Nur Otan» HDP Ortalyq apparatynda partııanyń oblystyq fılıaldary tóraǵalarynyń birinshi orynbasarlarymen keńes ótkizildi. Keńeste partııanyń 2012 jylǵy is-sharalary qorytyndylanyp, taıaý merzimde qolǵa alynatyn jumystardyń basym baǵyttary aıqyndaldy.
Partııanyń ótken jyly atqarǵan is-sharalarynyń eń mańyzdysy – Parlament Májilisine jáne barlyq deńgeıdegi máslıhattarǵa depýtattar saılanyp, «Jas Otan» jastar qanatynyń II sezi ótkizildi. Partııanyń esep-berý saılaý naýqany, Elbasy N.Á. Nazarbaevtyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» baǵdarlamalyq maqalasyn túsindirý sharalary júrgizildi.
Partııa sońǵy jyldary qoǵamnyń barlyq salalaryna belsendi aralasyp, aımaqtardaǵy jumystardy kúsheıtti. Memlekettik baǵdarlamalardyń laıyqty iske asyrylýyna úles qosyp, halyqtyń turmystyq-áleýmettik máselelerin sheshýge atsalysty. Basqosýda «Nur Otannyń» osyndaı ilkimdi isteri aıryqsha atap ótildi.
Elbasynyń Qazaqstan halqyna Joldaýy – «Qazaqstan-2050» Strategııasy men partııanyń Saılaýaldy tuǵyrnamasyn iske asyrý partııanyń 2013 jyly atqarylatyn Jumys josparynyń negizgi baǵyty retinde belgilendi. «Nur Otannyń» Tóraǵasy N.Á.Nazarbaevtyń alǵa qoıǵan jańa mindetterine oraı, partııanyń jumys josparyna jańasha baǵdarlar belgilendi.
Partııanyń fılıaldaryna Memleket basshysynyń «Qazaqstan-2050» Strategııasyn iske asyrý jónindegi basym baǵyttardy jáne ındýstrııalyq-ınnovasııalyq damý, jastar saıasaty, shaǵyn jáne orta kásipkerlikti, halyqty eńbekpen qamtý, áleýmettik qamsyzdandyrý, densaýlyq saqtaý, sondaı-aq bilim berý men ǵylymdy damytý sekildi salalardy shıratý jóninde ortasha jáne uzaq merzimdi jumys josparlaryn daıyndaý tapsyryldy.
«Nur Otan» HDP Tóraǵasynyń birinshi orynbasary Baqytjan Saǵyntaev: «Biz Elbasy, partııa Tóraǵasy N.Á.Nazarbaevtyń aldymyzǵa qoıǵan jańa mindetterin eskere otyryp, partııanyń jumys baǵdaryn josparlaýdy qaıta qarap, pysyqtadyq. Soǵan oraı, respýblıkalyq jelilik jumys kestesin jumysshy toptary atqarǵan naqty is-sharalarynyń qorytyndysyn aıqyn kórýge múmkin bolatyndaı etip jasaqtaýymyz kerek. Mundaǵy maqsatymyz – parııanyń «buqaralyq qoldaý jelisi» men áleýmettik bazany barynsha ulǵaıtý», dep atap ótti.
B.Saǵyntaev áriptesteriniń nazaryn keńestiń mańyzyna aýdara kelip, Elbasy Joldaýynyń negizgi baǵyttaryn túsindirý úshin aqparattyq-nasıhat toptary eldiń eń shalǵaı aýyldaryn da mindetti túrde qamtýy qajettigin basa aıtty.
Búginde partııa jumysynyń negizgi baǵyttarynyń biri – azamattyq ınstıtýttardyń barlyǵymen tyǵyz yntymaqtastyqty jolǵa qoıý. «Nur Otannyń» fılıaldary partııamyzdyń óz ishinde jáne ózge partııalarmen arada aımaqtyq deńgeıdegi pikirtalas alańyn damytqany abzal.
Sondaı-aq, osy jıynda nurotandyqtar partııanyń óz ishindegi tártipti kúsheıtip, ar-ujdanyna kir keltirmeı, árqaısysy ózderine júktelgen memlekettik mindetterimen qatar, qoǵamdyq tapsyrmalardy minsiz atqarýda jaýapkershiligin abyroımen alyp júrýi qajettigi qaperge salyndy.
Aldaǵy ýaqytta aýyldyq aýmaqtardaǵy ákimder saılaýy keletinin eskere otyryp, sol saılaýda laıyqty úmitkerdi qapysyz tańdaý úshin Saıası keńestiń bıýrosy men fraksııalardyń keńesinde búgingi tańda is basyndaǵy ákimder – partııa músheleriniń esebin tyńdaýdy uıymdastyrý týraly usynys aıtyldy.
«Jas Otan» jastar qanaty 2013 jyldy «Jastar qanatymen jáne aýyl jastarymen jumys júrgizý jyly» dep jarııalady. Soǵan oraı, olar eńbek ujymdarynda, aýyldyq jerlerde «Jas Otan» jastar qanaty qolǵa alǵan bastaýysh bólimshelerin jasaqtaýdy shıratatyn bolady.
«Egemen-aqparat».
