Osylaısha Reseıdegi eń iri «Roza Hýtor» taý kýrorty taıaý kúnderi Qazaqstannan kelgen myńynshy týrısti qurmettep qarsy aldy. Osy maýsymda Sochıge myńynshy bolyp barǵan almatylyq Qaırat Qydyrálıevke sochılikter qonaqjaılyq syı kórsetken.
Oraıy kelip turǵanda, «Roza Hýtor» álemdik dárejedegi jyl boıy jumys isteıtin taý kýrorty ekendigin, 2014 jyly Sochıde ótken XXII Olımpııalyq jáne XI Paralımpıadalyq qysqy oıyndarynyń iri nysany bolǵanyn aıta ketý kerek.
Sol sııaqty Almatynyń taý týrızmindegi táji ispetti «Shymbulaq» taý kýrortyna da 2011 jyly Qysqy Azııa oıyndaryna daıyndyq barysynda kýrortqa eki ret jańǵyrtý jumystary júrgizildi. Joldyń uzyndyǵy 20 shaqyrymnan astamǵa deıin uzartyldy. Adam kóp baratyn jerlerde syrǵanaıtyn aýmaq 10-20 ese keńeıtildi. Sondaı-aq «Azıada-2011» daıyndyq barysynda «Medeý» sport kesheninen «Shymbulaq» taý shańǵysy bazasyna deıin, uzyndyǵy 4,5 shaqyrymdyq zamanaýı arqanjol salyndy. Kýrort aýmaǵynda 7 zamanaýı kótergish jumys isteıdi.
«Roza Hýtorǵa» birinshi ret kelgen myńynshy qazaqstandyq «Makrotehındastrız» servıstik kompanııasynda jumys isteıdi. О́z qurmetine jasalǵan mundaı mereke onyń esinde tamasha demalystyń biri bolyp qalatyny anyq.
Qaırat Qydyrálıev «Roza Hýtorǵa» «Shymbulaqta» birge demalatyn dostarynyń usynysymen kelgen eken. «Olardyń aqyl-keńesine qulaq asqanyma ókinbeımin. Jeti kún boıy Kavkaz taýlarynyń sulýlyǵyn tamashaladym jáne Qara teńiz jaǵalaýyndaǵy jaǵajaı demalysymen raqattandym. Árıne ataqty Sochı-2014 olımpıadalyq nysandarymen tanysý da óte qyzyqty boldy. Bul jer kórýge turarlyq, servısi de joǵary deńgeıde!», deıdi jerlesimiz.
Sonymen Qazaqstan men Reseı arasyndaǵy týrıstik aǵym sońǵy jyldary belsendi túrde artyp keledi. Buǵan belgili «Shymbulaq» pen «Roza Hýtor» taý kýrorttary arasyndaǵy Yntymaqtastyq týraly memorandým ájepteýir yqpal etip otyr.
2018 jylǵy qazanda qol qoıylǵan qujat kýrorttardyń ákimshilikteri týrızm men mádenı-saýyqtyrý demalys salasyndaǵy birlesken jobalardy iske asyrý, konferensııalar, semınarlar men basqa da is-sharalardy ótkizý úshin barlyq qoljetimdi mehanızmderdi paıdalanatyn bolady. Bul rette ózara aqparattyq, bilim berý, ádistemelik jáne konsýltasııalyq qoldaý kórsetý josparlanyp otyr. Mundaı qyzmettiń mańyzdy tarmaǵy – statıstıkalyq, anyqtamalyq jáne basqa da derekter almasý. Bul kýrorttarǵa kórshiles elderdiń taý shańǵysyn, taý, sporttyq týrızmin jaqsy túsinýge kómektesedi, al keleshekte qazaqstandyq belsendi demalýshylar arasynda «Roza Hýtordyń», reseılikter arasynda «Shymbulaqtyń» tanymaldyǵyn arttyrady.
«Júıeli áýe qatynasyn uıymdastyrýdyń arqasynda Qazaqstan týrısteri «Roza Hýtorǵa» jıi kele bastady. Bul jerge olardy belsendi jáne alýan túrli demalý múmkindigi tartady: taýǵa jaıaý shyǵý baǵdarlary, rodelban tárizdi tartymdy oıyn-saýyq, aspaly kópir, bıik taýdaǵy átkenshek, velosıped serýenderi, Qara teńizdegi fırmalyq jaǵajaı. Bizde balalardyń oıyn-saýyǵy da jaqsy uıymdastyrylǵany málim, meıramhanalardyń aýqymdy tańdaýy, mazmundy konserttik baǵdarlama da bar. Byltyr biz Qazaqstannan kelgen myńnan asa demalýshyny qarsy aldyq, qazir áli shilde aıy, al biz myńynshy týrısti quttyqtap otyrmyz!», dedi «Roza Hýtor» kýrorty bas dırektorynyń orynbasary Sergeı Hvorostıanyı.
Osy yntymaqtastyqtyń arqasynda bıyl «Roza Hýtorda» «Shymbulaq» kúnderi ótti. Kýrorttyń bas alańynda kıiz úı tigildi, qonaqtar qazaq taǵamdarynyń dámin tatyp, qazaq ulttyq ónerimen tanysty. Olardyń kóbi Qazaqstanǵa barý múmkindigine qyzyǵýshylyq tanytty. Oǵan qosa, eki kýrorttyń dostyǵy sheńberinde «Roza Hýtorǵa» qysqy syrǵanaqqa aptalyq skı-pass satyp alyp, al sosyn osyndaı kezeńde «Shymbulaqta» tegin syrǵanaýǵa bolady. Mundaı úlgi keri tártipte de áreket etedi: eger qazaqstandyq kýrortta aptalyq skı-pass satyp alynsa, reseılik kýrorttyń skı-pasy tegin.
«Mundaı birlesken marketıngtik baǵdarlamalar men aksııalar kýrorttarymyzdyń nasıhattalýyna múmkindik jasaıtyndyǵyna senimdimiz. Kúzde biz «Shymbulaqta» «Roza Hýtor kúnderin» ótkizýdi josparlap otyrmyz jáne bul baǵdarlamanyń qonaqtarymyzdy qýantatynyna, tamasha estelikter syılaıtynyna senimdimin», deıdi óz kezeginde «Shymbulaq» taý kýrortynyń bas dırektory Erjan Erkinbaev.
ALMATY
