Almatynyń Saıran kóliniń jaǵasyndaǵy saıystyń ereksheligi sol, bul dodada sportshylar tek júldeli oryndar úshin ǵana emes, Tokıodaǵy Olımpıada oıyndaryna qatysýǵa múmkindik beretin reıtıngtik upaılar úshin baq synasty.
Saıysqa birinshi bolyp názik jandylar shyqty. Bastapqyda +26°S aýa temperatýrasy men sý temperatýrasy +21°S kórsetip jarystyń qolaıly ótýine jol ashqandaı kórinse, bar joǵy bir saǵattyń ishinde Saırannyń jaǵalaýyn aptap ystyq býyp, aýa temperatýrasy 35 gradýske deıin kóterilip ketti. Bul keıbir sportshy qyzdardyń jarystaǵy nátıjelerine áserin tıgizdi – ystyqqa shydamaı koreıalyq bir sportshy jarystan shyǵyp qalsa, ońtústik afrıkalyq sportshy máreden keıin ózin nashar sezindi.
Doda bastalmastan buryn koreıalyq Iýn Chýn Chan (azııalyq reıtıngte 8-shi oryn), qazaqstandyq Arına Shýlgına (11-oryn) jáne japondyq Maıko Nıshı (16-oryn) júldeli oryndardan úmitker retinde tanylǵan bolatyn. Degenmen, trıatlonda nebir tosynsyılar bolyp turady. Qysqa «sprınterlik» (750 metr júzý, 20 shaqyrym velokezeń, 5 shaqyrym júgirý) qashyqtyqtyń kóshin eshkimniń nazaryna iline qoımaǵan, qurlyqtyq reıtıngte bar joǵy 80-orynda turǵan nemis sportshysy Lına Volker bastap ketti.
Qysqasha aıtqanda, jankúıerler úlken sporttyq sensasııa kútti. Áıtse de, velojarystan keıin ulttyq qurama múshesi Arına Shýlgına tizgindi qolǵa aldy. Júgirý kezeńinde barlyq qarsylastarynyń aldyn orap, 1 saǵat 3 mınýt 43 sekýnd nátıjesimen jeńimpaz atandy. Ekinshi orynda – koreılik Ie Djın Park. Ol 1 saǵat 3 mınýt jáne 57 sekýnd nátıje kórsetti. Úshinshi oryndy Parktyń jerlesi Gırı Kım 1 saǵat 4 mınýt 8 sekýnd nátıjesimen tuıyqtady.
– Júzý kezeńinde pozısııamdy durys tańdamadym, – deıdi máreden keıin Arına Shýlgına, – tranzıttik zonada qatelikter jiberip aldym. Biraq artynan velojarys kezinde durystalyp, qarsylastaryma jetip aldym, ári qaraı barlyǵy oıdaǵydaı aıaqtaldy. Onyń ústine meniń eń myqty qyrym júgirý ekendigine qaramastan, júgirý kezeńi óte aýyr boldy. Júgirý trassasy óte kúrdeli – burylystar bıik ári kún aptap ystyq boldy!
Erler arasynda sport sarapshylary álemniń úzdik 100 sportshylarynyń qataryna kiretin Gonkgontan kelgen Oskar Koggıns (qurlyqtyq reıtıngte 3-oryn), qazaqstandyq Aıan Beısenbaev (4-oryn), japondyq Ren Sato (6-oryn), Felıks Dıýshamp (25-oryn) jáne serb Ognen Stoıanovıch (49-oryn) syndy sportshylardy saıys favorıtteriniń qataryna qosty.
Nátıjesinde ITU atynan óner kórsetip júrgen Felıks Dıýshamp 55 mınýt 51 sekýnd ýaqytymen kúrdeli saıysta qarsylastarynyń aldyn orap, altyn júldege ıe boldy. Ekinshi oryndy 56 mınýt 9 sekýnd ýaqytymen Oskar Koggıns alsa, 56 mınýt 20 sekýnd nátıjesimen Ognen Stoıanovıch úshinshi orynnan kórindi. Aıan Beısenbaev bolsa 56 mınýt 35 sekýnd ýaqyt kórsetti.
Almatyda ótken trıatlonnan Azııa Kýbogin qorytyndylaı kele, bas ASTC (quramyna 35 el kiretin Azııalyq trıatlon konfederasııasy) tehnıkalyq delegaty Bıamba Sagaanbaatar (Monǵolııa) ońtústik astanamyzda ótkizilgen halyqaralyq is-sharaǵa óte joǵary baǵa berdi. «Qazaqstan trıatlonnyń damý ortalyǵyna aınaldy, - deıdi delegat. Qazaqstandyq trıatlon federasııasynyń prezıdenti Kárim Másimovtiń bastamasymen Orta-Azııalyq Trıatlon Assosıasııasynyń (SATA) qurylýy buǵan dálel bola alady. Búgingi tańda uıym quramyna Qazaqstan, О́zbekstan, Qyrǵyzstan, Iran jáne Aýǵanstan elderi kirip otyr.
Olımpıada oıyndaryna lısenzııa alý jaıyna keletin bolsaq, trıatlonnan Qazaqstan ulttyq quramasynyń bas bapkeri Andreı Glýshenko: «Arına Shýlgına lısenzııa jeńip alyp Olımpıadada óner kórsetetine 90 paıyzǵa senimdimin. Erler arasynda bizde Aıan Beısenbaevtyń úlken múmkindigi bar. Sonymen qatar, jap-jas Daryn Qonysbaev júgirýden búgingi tańda Azııa qurlyǵyndaǵy eń úzdik bolyp otyr. Bar joǵy 20-aq jasta bolsa da, júzýden sheberlik tanytyp keledi. Aldaǵy ýaqytta lısenzııa jeńip ala alatyn óte úlken múmkindikteri bar. Tokıo-2020 olımpıadasynda trıatlonnan Qazaqstanda keminde eki lısenzııa bolady dep oılaımyn», deıdi.
ALMATY
